Gubernur Koster Lantik Serinah Dados Pjs Bupati Karangasem
- 06 Oktober 2020
- 21:10 WITA
- News
DENPASAR, Balitopnews.com - Gubernur Bali Wayan Koster ngelantik Karo Organisasi Setda Pemprov Bali I Wayan Serinah dados Penjabat Sementara (Pjs) Bupati Karangasem, ring Gedung Wiswasabha Utama, Kantor Gubernur Bali, Anggara 6 Oktober 2020.
Pelantikan puniki kemargiang santukan Bupati lan Wakil Bupati Karangasem definitif ngelaksanayang cuti ring jagi kampanye ring Pilkada Serentak warsa 2020.
Pelantikan kasarengin nyukserahang SK Menteri Dalam Negeri (Mendagri) RI sane memargi manut protokol kesehatan nambakin Covid-19.
Gubernur Koster maosan indik Karangasem pinaka ngeranjing nem kabupaten/kota ring Bali sane pacang ngelaksanayang Pilkada Serentak 2020 ring Desember sane jagi rauh.
Munggwing asapunika mangda roda pemerintahan, pembangunan miwah ayah-ayah majeng krama ring Karangasem presida tetep memargi, raris patut wenten Penjabat Sementara Bupati Karangasem.
Selanturne majeng Pjs Bupati Karangasem, Gubernur Koster nunas mangda ngelaksanayang penataan majeng pemerintahan miwah organisasi perangkat daerah (OPD) sane wenten. Tiosan saking punika taler kalaksanayang ngelisang realisasi penyerapan anggaran manut parikrama sane sampun kaigumin Bupati sareng DPRD Karangasem.
“Titiang nunas penjabat sementara bupati presida ngemargiang pemerintahan sane baik. Ulengan penyerapan anggaran kantos pemerintahan kaenterang becik lan akuntabel. Tincapan taler ayah-ayah majeng kramane kantos kramane taler kaayahin becik,“ ucap dane.
Raris indik pemargi Pilkada Karangasem, Gubernur Koster sane taler Ketua DPD PDIP Bali nunas Pjs Bupati Karangasem mangda ngelaksanayang rembug sane becik majeng makasami stakeholder, minakadi KPU, Bawaslu, angga TNI lan POLRI. Indik puniki anggen ngmastikayang Pilkadane memargi trepti, labda karya lan antar manut antuk awig sane kaangge.
Tiosan punika Gubernur Koster taler ngelingin mangda Pilkada kelaksanayang antuk ngutamayang protokol kesehatan. Santukan kantos mangkin kantun wenten mentik kasus Covid-19 ring Kabupaten Karangasem.
“Penjabat sementara bupati taler tunas titiang yukti-yukti netral ring Pilkada puniki. Sampunan mewirang majeng sinalih tunggil pasangan calon. Puniki mangda kauratiang, mangda yukti-yukti netral nenten sareng mapolitik ring pengenter pemerintahan,“ teges dane.
Tiosan raris, Pjs Bupati Karangasem I Wayan Serinah maosan, dane pacang setata marerembug sareng makasami stakeholeder kantos tata pemerintahan memargi becik.
Indik pemargi Pilkada, dane pacang maupanaya mangda Pilkada memargi labda karya, antar lan taler becik. Munggwing asapunika kramane mangda urati ring angga lan ngunggahang protokol kesehatan ngangsan katincapang.
“Antuk asapunika nenten wantah tata titi demokrasi sane memargi becik lan sane dados tetujon konstitusi kajujur, sakemaon kramane tetep seger oger," baosne.
Karo Organisasi Setda Pemprov Bali I Wayan Serinah kalantik dados Pjs Bupati Karangasem manut SK Menteri Dalam Negeri Nomor 131.51-2968 warsa 2020 indik Penunjukan Penjabat Sementara Bupati Karangasem .
Taler rauh ring pelantikan punika Bupati Karangasem definitif Mas Sumatri, Wakil Bupati Karangasem definitif I Wayan Artha Dipa, Sekretaris Daerah Provinsi Bali Dewa Made Indra, Sekda Kabupaten Karangasem, perwakilan KPU lan Bawaslu miwah Forkopimda Kabupaten Karangasem.(gix)
Komentar