Putri Koster Pikamkam Lomba Cipta Puisi Guru sa-Indonesia miwah Launching Virtual Buku Puisi Suara Hati Guru ring Masa Pandemi Covid-19
- 29 Oktober 2020
- 20:10 WITA
- News
DENPASAR, Balitopnews.com – Pinaka angga sane nelebang sastra pamekas puisi, Putri Suastini Koster ngaptiang mangda Bali prasida dados episentrum pengembangan sastra. Kasokong antuk makudang-kudang angga sane oneng ring sastra sekadi Ketua Dermaga Seni Buleleng Gde Artawan, Dewa Putu Sahadewa miwah Wayan Jengki Sunarta, rabinnyane Gubernur Bali Wayan Koster puniki ngamikamkam pamargin lomba cipta puisi guru sajebag Indonesia.
Parikrama karuntutin antuk ‘launching’ virtual buku puisi 'Suara Hati Guru se-Indonesia 2020', taler kasukserahang hadiah majeng para pemenang lomba cipta puisi guru sajebag Indonesia sane kalaksanayang antuk virtual saking Denpasar, Buda 28 Oktober 2020.
Putri Koster maosang, wentene pidabdab sekadi puniki kakawitin saking bebaosannyane sareng makudang-kudang seniman. Tiosan punika, ngamargiang lomba nasional taler kadulurin antuk nyantenang agengnyane pikedeh para jana sajroning ngamiletin lomba sane naenin kamargiang ring sajebag Bali.
“Puniki wantah pinaka pidabdab alit nanging titiang laksanayang madasar antuk kalascaryan. Pangaptine wantah sajroning ngicen genah majeng para guru sane madue bakat ngripta puisi sepisanan nyalurang hobi,” baosnyane.
Anak istri sane teleb saha sutindih pisan sajroning nglimbakang seni sastra puniki nureksain, puisi pinaka silih tunggil seni sane prasida ngolah rasa saha prasida ngicen kahanan degdeg ring kayun yening yakti-yakti manelebang.
Pamargin lomba cipta puisi guru sajebag Indonesia puniki dahat mabuat sajroning nglimbakang seni sastra. Manutnyane, penggiat sastra patut bangga riantukan Pemprov Bali antuk kapamucukan Gubernur Wayan Koster, tiosan ngicen genah majeng pangupaya nglimbakang seni tradisional, nanging taler ngicen genah majeng seni modern wiadin kontemporer malarapan antuk program Festival Seni Bali Jani.
Putri Koster nlatarang, festival punika ngicen pawesana becik majeng seni sastra pamekas puisi. “Tiang mapangapti mangda seni sastra sayan nglimbak ring jagate. Sampunang rumasa bangga yening kantos kaolemin rauh ke dura Negara, nanging sapunapi iraga bangga yening samian prasida wenten ring Bali rumasuk sesolahan sastra, mawinan sane oneng ring sastra pamekas saking dura negara, kantos rauh ke Pulo Dewata sangkaning seni sastrannyane,”.
Risampune prasida ngamargiang lomba cipta puisi guru sajebag Bali miwah lomba cipta puisi guru sajebag Indonesia, anggannyane jagi mikamkam lomba sane pateh kabuatang majeng sisia SMA wiadin mahasiswa ring warsa 2021, pamekas ring pakeling Hari Kebangkitan Nasional, sane untengnyane indik nasionalis.
Ketua Dermaga Seni Buleleng Gde Artawan ngajiang becik saha ngaturang suksma antuk uratian Putri Koster majeng panglimbak seni sastra, pamekas puisi. “Ring pangawitipun tiang narka yening pikedeh Putri Koster jagi rered majeng seni sastra risampune dados ibu gubernur. Nanging kawentenane matungkalik, Dane dahat sutindih saha sayan ageng pisan kedehnyane sajroning nglimbakang seni sastra,”.
Artawan maosang, lomba cipta puisi kasanggra becik antuk para guru. Lomba kamiletin antuk 618 guru sajebag Indonesia saha prasida wenten 1.261 puisi sane ngranjing. Mangda sayuwakti objektif, para panureksa wantah nrima murdan puisi sareng dagingnyane kemanten, mawinan kapolihang 10 pemenang miwah 90 nominasi, selanturnyane 100 puisi punika kaingkupang dados siki ring buku puisi 'Suara Hati Guru'.
Ring galahe punika, taler kasukserahang hadiah antuk simbolis, sepisanan wenten sane ngwacen puisi, inggian kawacen langsung wiadin virtual olih para nominator.(Gix_)
Komentar