Pameran Foto 65 Warsa Pakilitan Hubungan Diplomatik Indonesia-Vietnam
- 14 Desember 2020
- 22:12 WITA
- News
DENPASAR, Balitopnews.com – Makelingin saha nyemertiang indik 65 warsa pakilitan Hubungan Diplomatik Indonesia sareng Vietnam, kalaksanayang pameran foto mapaiketan ring pakilitan makakalih panegara saking warsa 1955-2020.
Pameran puniki kalaksanayang antuk daring pamekas galeri virtual, miwah ring Ruang Pameran Monumen Perjuangan Rakyat Bali “Bajra Sandhi”, ngawit saking tanggal 15 kantos 20 Desember 2020.
Pameran kabungkah resmi melarapan kanal youtube Disbud Provinsi Bali rahina Anggara, 15 Desember 2020, Galah 17.00 WITA. Ring acara pamungkah punika jagi wenten sambrama wacana saking Presiden RI ka-5 Megawati Soekarnoputri, Duta Besar Vietnam majeng Indonesia Pham Vinh Quang miwah Gubernur Bali Wayan Koster.
Gubernur Bali Wayan Koster nyanggra becik pameran puniki, saha nlatarang indik mabuatnyane pakilitan rasa makakalih panegara sane kacihnayang antuk foto pakilitan makakalih founding father, minakadi Presiden Soekarno sareng Presiden Ho Chi Minh.
“Melarapan pameran puniki Titiang mapangapti mangda pakilitan rasa makakalih panegara puniki prasida sayan ngukuhang kemitraan strategis pantaraning Indonesia sareng Vietnam ring widang seni budaya, pendidikan, pariwisata wiadin ekonomi," baos Wayan Koster.
Pameran foto puniki pinaka prakanti pantaraning Pemerintah Provinsi Bali sareng Kedutaan Besar Vietnam ring Jakarta, sane kaaptiang prasida sayan ngelingang krama makakalih panegara pamekas angga yowana, indik pakilitan rasa sane dahat becik pantaraning makakalih panegara saking riin, sane kapikamkam antuk founding father soang-soang panegara, minakadi Presiden Soekarno sareng Presiden Ho Chi Minh.
Pakilitan rasa punika raket kantos mangkin, kakantenang saking foto-foto kunjungan kenegaraan saking dumun, sekadi panyanggra Presiden Tran Duc Luong miwah krama Vietnam antuk sapangrauh Presiden Megawati Soekarno Putri daweg warsa 2001, wiadin patemon Presiden Vietnam Truong Tan Sang sareng Presiden Indonesia Joko Widodo ring Jakarta warsa 2015, rauhing pangrauh Presiden Joko Widodo ka Vietnam daweg warsa 2018.
Duta Besar Republik Sosialis Vietnam majeng Indonesia Pham Vinh Quang, nlatarang yening daweg 65 warsa sane sampun lintang Indonesia pinaka panegara ring Asia Tenggara sane kapertama nglaksanayang hubungan diplomatik sareng Vietnam. Pakilitan punika becik rauh mangkin, napi malih ring warsa 2013 Indonesia sareng Vietnam ngwangun kemitraan strategis melarapan antuk prakanti becik ring sakancan widang.
“Parindikan sekadi mangkin majanten nenten prasida kapanggihin yening daweg dumun nenten wenten utsaha saha pakilitan rasa saking Presiden Ho Chi Minh sareng Presiden Soekarno. Pakilitan makakalih presiden punika, nenten ngadungang rasa pantaraning pamucuk nanging wantah pantaraning sameton. Nenten kadasarin sangkaning keturunan, nanging sangkaning visi sane pateh, minakadi antuk rasa nginggilang kebangsaan, patriotisme, kemerdekaan, wiadin perdamaian, “ baos Pham Vinh Quang.
Ring pameran puniki kapisuguhang 42 foto bersejarah saking warsa 1955 kantos mangkin. Foto sane kapamerang nyihnayang pakilitan sosial budaya makakalih panegara, rumasuk pakantenan palemahan rauhing geginan kramannyane sane nenten akeh pabinayannyane.
Pakilitan rasa pantaraning Indonesia sareng Vietnam kacihnayang taler antuk muhibah seni budaya, miwah prakanti sane becik pantaraning prakangge Vietnam sareng Indonesia, mawinan kamargiang prakanti ring sakancan widang.
Foto-foto sane kapamerang prasida kacingak ring galeri virtual antuk tautan https://artspaces.kunstmatrix.com/en/exhibition/3761959/pameran-foto-65-tahun-hubungan-diplomatik-indonesia-viet-nam.(gix)
Komentar