Gubernur Koster Nrima Bakti Inovasi Indonesia saking Menristek/BRIN RI
- 23 Desember 2020
- 21:12 WITA
- News
BADUNG, Balitopnews.com - Gubernur Bali Wayan Koster nrima produk Bakti Inovasi Indonesia majeng wewidangan Provinsi Bali saking Menteri Riset dan Teknologi (Menristek) RI sane sapisanan pinaka Kepala Badan Riset dan Inovasi Nasional (BRIN) Bambang Brodjonegoro ring Ballroom Nusantara, The Westin Resort, Nusa Dua, Anggara (22/12). Panyukserahan kalaksanayang sesampun pamargin Lokakarya Desa Berinovasi sane ngunggahang unteng “Bakti Inovasi untuk Bali Kembali Bali Bernovasi”.
Gubernur Koster ngajiang becik saha ngaturang suksma antuk sampun kamargiangnyane parikrama puniki. Pinaka Provinsi sane banget ngandelang Pendapatan Asli Daerah (PAD) saking pariwisata, Bali majanten banget keni pawesana kaon sangkaning pandemi Covid - 19. Mawinan malarapan antuk makudang-kudang pidabdab saha program saking pemerintah pusat, kaaptiang prasida nangiang ekonomi Bali.
"Saking unteng sane kaunggahang puniki majanten kakantenang agengnyane uratian majeng Bali sane banget keni pawesana sangkaning Covid-19 pamekas ring widang pariwisata, sane pinaka dasar ekonomi ring Bali. Ri kala pariwisata mawali sakadi jati mula, ekonomi Bali prasida maurip napi malih prasida nglangkungin rata - rata nasional. Ri kala wenten pialang sakadi mangkin, ekonomi Bali majanten ngaonang. Ring salanturnyane mugi pemerintah pusat satata nyarengin sajroning nangiang ekonomi ring Bali, sekadi makudang-kudang program sane kalaksanayang mangkin," pangaptin Gubernur Koster sinambi nyaritayang malih sapunapi pariwisata Bali daweg riin ngarepin makudang-kudang bencana sakadi Bom Bali, pandemi virus SARS, kantos erupsi Gunung Agung, saha Bali prasida gelis mawali sakadi jati mula saantukan wisatawan dura negara satata akeh rauh ka Bali. Ri kala ngarepin pandemi Covid - 19 sane nibenin jagate sami, pariwisata taler kaosahang jagi suwe prasida sakadi jati mula. Malarapan antuk punika, kabuatang makudang-kudang kawijakan inovatif sane anyar.
Sadurung katiben pandemi, Gubernur Koster ngawit munggah ngenterang jagat Bali sampun ngamedalang makudang-kudang geguat sajroning ngwangun pariwisata Bali ring ajeng wisatawan internasional, sekadi ngirangin kawentenan luu plastik saha nyarengang samian krama mangda tedun langsung ngresikang palemahan, nglimbakang energi baru wiadin terbarukan sane nenten nyemerin palemahan, nitenin kalestarian toya tukad wiadin segara wiadin program sane tiosan. Program - program punika prasida nangiang malih pulo Bali, saha kaajiang becik antuk duta - duta besar negara, napi malih pangrauh wisatawan prasida nincap kantos 26% ring pangawit wiadin panguntat warsa 2019 saihang ring warsa sadurungnyane.
"Sangkaning kapialangin antuk pandemi, program - program sane sampun kakaryanin durung prasida kalaksanayang ring warsa 2020. Sane mangkin wantah uleng ngarepin pandemi kemanten," baos Gubernur sane sadurungnyane pinaka anggota DPR RI sinambi maosang makudang-kudang pamargi sane sampun kaambil sajroning ngwaliang pariwisata Bali antuk ngicen selah majeng wisatawan domestik saking bulan Juli, nanging antuk setata ngamargiang protokol. Tiosan punika majanten jagi digelis nglaksanayang makudang-kudang pangupaya sane kabuatang sajroning nangiang ekonomi wiadin pariwisata Bali.
"Iraga mangda prasida digelis ngamargiang inovasi ring widang pertanian, perdagangan wiadin industri. Majanten nenten prasida gelis, nanging patut kamargiang, saha jagi digelis makarya kelompok kerja sajroning makarya program wiadin ngamargiang program punika," baosnyane sane daweg punika taler kasarengin antuk Kepala Badan Riset dan Inovasi Daerah Provinsi Bali Made Gunaja miwah Kepala Dinas Kesehatan Provinsi Bali Ketut Suarjaya .
Menristek/BRIN RI Bambang Brodjonegoro nlatarang saha makarya diskusi kelompok sane ngunggahang unteng “Struktur dan Fundamental Pereknomian Bali ring Widang Pariwisata, Pertanian, Kelautan, miwah Industri” kasarengin antuk Sestama Bapenas/PPN Himawan Hariyoga Djojokusumo.
“Covid-19 majanten ageng pisan pawesanannyane majeng ekonomi ring Bali, nanging kawiaktiannyane Bali kantun madue pariwisata, pertanian, wiadin kelautan. Titiang nenten sangsaya malarapan antuk prakanti pantaraning triple helix sareng pemerintah, akademisi, wiadin industri, ekonomi ring Bali prasida kawaliang malih,” baos Menteri Bambang.(gix)
Komentar