Gubernur Koster Dahat Nyokong BPD Bali pinaka Penggerak Ekonomi Daerah.
- 24 Desember 2020
- 21:12 WITA
- News
DENPASAR, Balitopnews.com - Bank Pembangunan Daerah (BPD) pinaka silih tunggil sumber daya potensial lokal daerah majanten patut kasokong mangda sayan kukuh mawinan prasida mawesana majeng panglimbak ekonomi daerah. Pemerintah daerah kapatutang mangda nyarengin ngicen sokongan majeng kawentenan BPD, parindikan punika sane taler kamargiang ring Bali.
Sekadi punika baos saking Gubernur Bali Wayan Koster ri kala ngicen sambrama wacana ring pamargin webinar Bank Pembangunan Daerah sajebag Indonesia sane ngunggahang unteng indik Sapunapi Nyokong Modal BPD sajroning Nincapang Panyarengan BPD sajeroning Ngwantu Pewangunan Ekonomi Nasional ri kala pandemi wiadin sesampun Pandemi Covid - 19, ring ruang Vicon, Jayasabha, Denpasar, Buda 23 Desember 2020.
"Ri kala tiang ngawit kapikukuhang pinaka gubernur, langsung nglaksanayang prakanti sareng BPD Bali pinaka silih tunggil agen pembangunan Bali. Titiang rumasa seneng prasida kasarengang sajeroning kawijakan pengembangan perekonomian daerah, saha sering taler ngicen tetimbang mangda BPD Bali taler sayan nglimbak, " baos Gubernur Koster sinambi nartayang indik pangupaya-pangupaya sane sampun kalaksanayang sajroning nyokong kawentenan BPD sekadi antuk ngawewehin ring modal, nincapang daya saing melarapan antuk sarana teknologi informasi mawinan daya saing saha panampen krama majeng BPD sayan becik.
"Titiang mapikayun ngwangun citra BPD Bali pinaka bank druwen krama Bali, mawinan samian krama Bali milih bank BPD. BPD Bali majanten dahat becik pamekas sajeroning nyokong kawentenan UMKM Bali. Sawetara 40 persen kredit sane kamedalang, kabuatang majeng UMKM," baosnyane sane kasarengin antuk Direktur Utama BPD Bali Nyoman Sudharma, Kepala Biro Perekonomian dan Administrasi Pembangunan Provinsi Bali Cok Bagus Pemayun.
Pangupaya-pangupaya tiosan sane majanten setata kautsahayang sajeroning nyokong kawentenan BPD wantah antuk setata nganggen layanan BPD majeng Aparatur Sipil Negara (ASN) inggian ring Pemprov Bali wiadin Pemkab/Pemkot sajebag Bali.
"Rauh mangkin majanten setata nyokong ring kawijakan mapaiketan ring pengembangan nasabah mangda nenten majeng perorangan kemanten nanging taler korporasi. Titiang nyarengang para pelaku usaha sane nglaksanayang bisnis ring Bali mangda mungkah rekening saha nganggen fasilitas BPD. Sekadi BUMN - BUMN sane makarya proyek ring Bali mangda nglaksanayang transaksi keuangan nganggen BPD Bali, mawinan sareng ngwangun ekonomi Bali, " baosnyane.
Parindikan sane pateh sakadi Gubernur Koster taler kabaosang antuk Ketua Komisioner OJK RI Wimboh Santoso pinaka narawakya utama sane taler ngaptiang mangda BPD prasida dados frontline wiadin leading penggerak ekonomi ring daerah, mawinan patut kasokong antuk pemerintah daerah, inggian ring modal wiadin kawijakan.
Narawakya utama sane tiosan inggih punika Dirjen Bina Keuangan Daerah Kemendagri Muhammad Alfian Novianto, sane ngaptiang mangda BPD prasida nglaksanayang fungsi intermediasi keuangan sane tiosan, sane prasida dados induk BPR. Tiosan prasida nambakin kawentenan intervensi utawi pangupaya saking makudang-kudang angga majeng utsaha saking BPD sane prasida mamurug majeng prinsip kehati-hatian wiadin integritas sistem keuangan.(gix)
Komentar