Putri Koster: Ngicen Genah saha Galah ring Anak Istri sajroning Nyujur Kesetaraan Gender
- 26 Desember 2020
- 21:12 WITA
- News
DENPASAR, Balitopnews.com - Ketua Tim Penggerak PKK Prov Bali Putri Koster rauh mangkin nenten surud-surud nyobiahang indik kesetaraan gender majeng para istri. Sekadi ring pamargin webinar sane kalaksanayang antuk Ikatan Bidan Indonesia (IBI) Provinsi Bali, Putri Koster nuekang indik mabuatnyane pangrembe anak istri ring kahuripan puniki, mawinan panyarengan saking angga istri mabuat pisan kauratiang.
"Mangda kaicen genah saha galah ring dija ugi, inggian ring rumah tangga, genah makarya wiadin ring tengahing krama, mawinan prasida nyihnayang kawagedannyane, mawinan pangapti nyujur kesetaraan gender prasida kakardinin" baosnyane.
Parindikan punika kabaosang ri kala ngicen sambrama wacana ring acara webinar sane kalaksanayang antuk IBI Provinsi Bali sane ngunggahang unteng ‘Nyemertiang Hari Ibu sajroning Nambakin Kawentenan Kekerasan wiadin Praktik P2GP’ saking kediaman Gubernur Bali, Jayasabha, Saniscara 26 Desember 2020.
Putri Koster maosang yening pangremba saking anak istri sampun mamargi saking riin adung sareng pangrembe anak lanang, saha makakalih saling tegepin.
"Parindikan punika prasida kakantenang ri kala sampun ngranjing grahasta asrama, ring tengahing krama pamekas ring Bali sane nenten lempas ring adat wiadin agama," baosnyane.
Putri Koster ngawewehin, sekadi antuk kawentenan webinar ring galahe mangkin sane tetujonnyane taler ngajiang kawentenan anak istri pamekas ibu, sane majanten dahat mabuat kawentenane. Napi malih ring webinar puniki ngunggahang unteng sane mabuat nganinin indik praktik 'Pemotongan dan Perlukaan pada Genital Perempuan' (P2GP). "Sujatine pinaka Ketua TP PKK tiang wau uning indik kawentenan praktik puniki, saha ri sampune tiang selehin majanten dahat kaon kawetenane majeng kesehatan anak istri mawinan patut katambakin," baosnyane.
Tiosan puniki, praktik puniki taler nenten anut sareng pangupaya samian angga sajroning nyayubin saha melanin hak anak istri. Sangkaning punika, Dane nyarengang para pamilet webinar mangda yakti-yakti ngamiletin saha mirengang panlataran saking para narawakya.
"Titiang ngelingang mangda yakti-yakti mirengang webinar puniki saha salanturnyane nyarengin nyobiahang parindikan puniki riantukan sunat majeng anak istri dahat kaon kawentenane saha baya pisan," baosnyane sinambi nuekang yening ri kala nyobiahang parindikan puniki prasida kalaksanayang antuk media sosial utawi kasobiahang ring wewidangannyane soang-soang.
Dane nureksain panyayub majeng hak wiadin pangupaya ngulati kesetaraan gender nenten prasida kalaksanayang antuk makudang-kudang angga, nanging muatang panyarengan samian angga mawinan pangapti ngicen kasukertan, kabagian majeng anak istri prasida kakardinin.
Sadurungnyane, Ketua Pengurus Daerah Ikatan Bidan Indonesia Provinsi Bali Luh Putu Sukarini taler maosang, webinar ring galahe puniki wantah pinaka runtutan sajroning nyanggra Hari Ibu sane kapakelingin ring tanggal 22 Desember sane sampun lintang. Tiosan punika, webinar puniki taler pinaka cihna bakti para bidan sajebag Bali majeng para ibu wiadin anak istri sane dahat mabuat ring kahuripan puniki.
Mapaiketan ring P2GP, Luh Putu Sukarini taler ngangkenin yening praktik puniki kantun wenten saantukan mapaiketan ring pamargin adat ring makudang-kudang genah. Dane maosang yening praktik punika nenten wenten kawigunannyane majeng anak istri, saha manut ring medis prasida ngwetuang baya majeng kesehatan reproduksi.
Melarapan antuk webinar ring galahe mangkin, Dane ngaptiang mangda krama sayan jimbar pamikayunnyane mawinan nenten malih nglaksanayang parindikan punika, nanging yening dados mangda prasida kaluputang saantukan banget ngaonang anak istri.
Webinar ring galahe mangkin ngrauhang narawakya saking widang kesehatan miwah perlindungan perempuan miwah anak, sekadi saking Dinas Kesehatan Provinsi Bali, Dinas Sosial, Pemberdayaan Perempuan dan Perlindungan Anak, tokoh agama miwah dokter.(gix)
Komentar