Koster Jagi Digelis Ngwangun Pelabuhan Segitiga Sanur, Nusa Penida & Nusa Ceningan ring Warsa 2020
- 29 Desember 2020
- 19:12 WITA
- News
KLUNGKUNG, Balitopnews.com – Pangapti Gubernur Bali, Wayan Koster sajroning ngardi Program Prioritas Pembangunan Infrastruktur Darat, Laut, miwah Udara sane terkoneksi wiadin terintegrasi sajeroning Visi Pembangunan Daerah Bali Nangun Sat Kerthi Loka Bali melarapan Pola Pembangunan Semesta Berencana ngulati Bali Era Baru prasida kawangun ring warsa 2020, silih tunggilnyane melarapan pewangunan Pelabuhan Sanur - Denpasar, Pelabuhan Penyebrangan Bias Munjul - Nusa Ceningan, miwah Pelabuhan Sampalan - Nusa Penida ring Kabupaten Klungkung.
Parindikan puniki kacihnayang antuk peletakan batu pertama olih Wayan Koster pamekas majeng pewangunan Pelabuhan Penyebrangan Bias Munjul ring Nusa Ceningan daweg Purnama Kepitu, Anggara Wage, Ugu 29 Desember 2020.
Wiwilan utama sane ngawinang Gubernur Koster ngwangun makatiga pelabuhan puniki saantukan mamanah ngicen ayah-ayahan pinih becik majeng krama Bali, rumasuk majeng wisatawan sane jagi nyebrang saking Sanur ngruruh Pulo Nusa Penida, miwah Pulo Nusa Ceningan ring Kabupaten Klungkung.
"Puniki nenten pinaka samaya daweg Pilgub Bali, nanging madasar antuk manah lascarya riantukan daweg warsa 2017 nyebrang ka Nusa Penida ri kala pamargin sosialisasi pinaka calon Gubernur Bali, ngawit saking Sanur rumasa kalangen riantukan akeh krama Bali wiadin wisatawan duranegara kantos magandong, kantos majingjingan, mungkah sepatu mangda nenten keni toya segara ri kala jagi munggah ring speed boat," baosnyane ring ajeng krama Nusa Ceningan.
Sangkaning punika, Gubernur saking Desa Sembiran, Buleleng puniki naenin nyarengang Wakil Walikota Denpasar, I Gusti Ngurah Jaya Negara, Anggota DPRD Bali, miwah Ketua DPRD Kota Denpasar I Gusti Ngurah Gede nyelehin kawentenan pelabuhan ring Sanur, saha ring galahe punika Wayan Koster masemaya ri kala prasida dados Gubernur Bali, jagi ngwangun pelabuhan ring Sanur, Nusa Penida, miwah Nusa Ceningan madasar antuk jaringan pemerintahan ring undagan nasional sane sampun kaduwenang.
"Patut ngrastiti saantukan pangrencana pewangunan Pelabuhan Segitiga Sanur, Nusa Penida miwah Nusa Ceningan prasida kakardinin, saantukan daweg warsa 2019 kanikain rauh ke Jakarta antuk Bapak Presiden Joko Widodo, irika raris nguningayang silih tunggil pangrencana pewangunan pelabuhan puniki saha raris kasanggra antuk Bapak Presiden, saha ring warsa 2020 raris prasida kamargiang antuk anggaran sane ageng," baosnyane.
Gubernur sane saderana puniki raris ngaturang suksma majeng Presiden RI, saha parindikan puniki prasida kakardinin saantukan uratian ageng saking Menteri Perhubungan RI, Budi Karya Sumadi majeng Pulo Bali.
Dirjen Perhubungan Darat Budi Setyadi maosang yening Menteri Perhubungan ngelingang mangda pewangunan pelabuhan puniki ngutamayang budaya lokal, saha mangda prasida mawiguna majeng krama saha ngicen kasukertan ring krama.
Saantukan pewangunan pelabuhan puniki nganggen APBN sane ageng kantos Rp 97 miliar saha kawangun antuk PT. Nindya Karya, mawinan ring galahe punika Dirjen Perhubungan Darat, Budi Setyadi ring ajeng angga saking Kejaksaan Tinggi Bali mangda setata kaicen pendampingan saking Kejaksaan, mawinan pewangunan prasida mamargi antar sekadi pangapti samian angga.
"Ri sampune pikaryan puniki puput, ring salanturnyane kapikayunin sapa sira sane dados operator pelabuhan puniki? Napi Pemerintah Provinsi Bali, utawi Pemerintah Kabupaten Klungkung. Napi malih indik mretenin wewangunan puniki majanten mangda kauratiang, mangda yakti-yakti ngicen rasa degdeg majeng krama wiadin wisatawan sane ngawigunayang pelabuhan," sinambi nguningayang kasiagayannyane nyokong kawijakan saking Bapak Gubernur Koster, saantukan Bali sane jagi kautamayang majeng pabuat pariwisata.
Mirengang parindikan punika, Gubernur Koster ngawewehin indik sapa sira sane jagi operator pelabuhan puniki, inggian Pemerintah Pusat, ASDP, Pemerintah Provinsi Bali, utawi Pemerintah Kabupaten/Kota, jagi kasukserahang ring Menteri Perhubungan.
Saantukan Nusa Penida madue panaut marupa spiritual, antuk kawentenan Pura Ratu Gede ring Dalem Ped wiadin parikrama krama wiadin wisatawan sane ageng saking Sanur ngruruh Nusa Penida, mawinan Wayan Koster ngaptiang majeng PT. Nindya Karya mangda pewangunannyane sayuwakti profesional, Pecak anggota DPR-RI 3 Periode saking Fraksi PDI Perjuangan puniki taler ngaptiang mangda desain pelabuhan nyihnayang seni budaya ring Nusa Ceningan, Kecamatan Nusa Penida.
"Titiang nyarengin mligbagang indik desain pelabuhan puniki, pangaptine Pelabuhan Segitiga Sanur, Nusa Penida miwah Nusa Ceningan prasida dados ikon," baos Gubernur Koster sane banget nguratiang indik budaya Bali.
Ring parikrama punika taler karauhin antuk Bupati Klungkung, Nyoman Suwirta, Ketua DPRD Klungkung, Anak Agung Gde Anom, angga saking Kejaksaan Tinggi Bali, Kepala Dinas Perhubungan Provinsi Bali, I Gede Wayan Samsi Gunarta, miwah Balai Pengelola Transportasi Darat (BPTD) Wilayah XII Provinsi Bali lan Provinsi Nusa Tenggara Barat.
Sadurungnyane, Menhub RI, Budi Karya Sumadi kasarengin Gubernur Bali, Wayan Koster sampun nglaksanayang Peletakan Batu Pertama cihna pangawit pewangunan Pelabuhan Sanur - Denpasar miwah Pelabuhan Sampalan ring Nusa Penida. Ring anggaran, pewangunan Pelabuhan Segitiga Sanur, Nusa Penida miwah Nusa Ceningan puniki mawit saking APBN Kementrian Perhubungan sane agengnyane Rp. 555 Milyar, minakadi majeng anggaran pembangunan Pelabuhan Sanur Rp. 376 Milyar, majeng Pelabuhan Sampalan Rp. 82 Milyar, miwah majeng Pelabuhan Bias Munjul agengnyane Rp. 97 Milyar.
Mawinan Pelabuhan Sampalan miwah Pelabuhan Bias Munjul ring Nusa Penida, Kabupaten Klungkung puniki karencanayang puput ring panguntat warsa 2021 miwah Pelabuhan Sanur, Kota Denpasar karencanayang puput ring tengahing warsa 2022.(gix)
Komentar