Gubernur Koster Nyarengin Pamargin Peluncuran Bantuan Tunai se-Indonesia saking Presiden Jokowi antuk Virtual
- 04 Januari 2021
- 21:01 WITA
- News
DENPASAR, Balitopnews.com - Presiden Joko Widodo ngamikukuhang resmi program bantuan tunai se-Indonesia majeng ring warsa 2021 rahina Soma, (4 Januari 2021) sane kamiletin antuk virtual olih Gubernur Bali Wayan Koster saking Rumah Jabatan Jaya Sabha, Denpasar.
Sajroning tuntunannyane Presiden Jokowi maosang yening pemerintah sampun midabdabin anggaran bantuan sosial (Bansos) sane agengnyane Rp 110 triliun. Manut Presiden, wantuan puniki kaanggen sajeroning ngarepin pandemi Covid-19 sane kaicen antuk makudang-kudang paletan, saha kapastikayang sane ngamolihang jagi nerima sami wantuan tan madaging kapotong saha jagi katureksain pisan. "Titiang taler nuekang, sampunang wantuan punika kantos kaanggen majeng pabuat sane nenten utama, sekadi kaanggen numbas lanjaran," Presiden nuekang.
Presiden Jokowi ngawewehin, wantuan tunai 2021 puniki jagi kaicen majeng krama antuk makudang-kudang paletan. Kapertama, Program Keluarga Harapan (PKH) kaicen antuk petang paletan saking bulan Januari, April, Juli miwah Oktober melarapan bank sane maingkupan ring Himbara.
Raris, program wantuan sembako kasalurang saking bulan Januari kantos Desember 2021. Agengnyane satak tali asasih majeng siki Kartu Keluarga (KK).
"Kalanturang wantuan sosial tunai kaicen salami petang sasih , ngawit bulan Januari, Februari, Maret April sane agengnyane tigangatus tali ngasasih majeng soang-soang KK. Samian sampun tinas," baosnyane.
Kepala Negara ngaptiang wantuan puniki prasida ngirangin tategenan krama sane keni pawesana sangkaning Covid-19. Tiosan punika, taler kaaptiang prasida mawesana becik majeng ekonomi nasional.
Menteri Sosial Tri Risma Harini maosang sajeroning atur piuningnyane yening wantuan tunai se-Indonesia majeng ring warsa 2021 puniki wantah sajeroning nangiang ekonomi nasional. "Wantuan tunai puniki minakadi Program Keluarga Harapan saha Kartu Sembako miwah Bansos Tunai sane anggarannyane Rp 110 triliun," baosnyane.
Majeng ring paletan kapertama PKH kasalurang majeng 10 yuta kulawarga sane agengnyane Rp 7,17 triliun. Majeng ring Kartu Sembako jagi kaicen majeng 18,8 yuta kulawarga antuk anggaran Rp3,76 triliun miwah Bansos Tunai kaicen majeng 10 yuta kulawarga sane agengnyane Rp 3 triliun, mawinan samian anggaran wantuan tunai bulan Januari 2021 agengnyane Rp 13,93 triliun.
Ring galahe punika, Gubernur Bali Wayan Koster mastikayang jagi ngamargiang becik instruksi Presiden sapunapi mangda wantuan punika sayuwakti prasida kapolihang olih krama sane sayuwakti muatang wantuan. "Nenten wenten malih potongan, napi ja wastane punika, nenten dados. Yening wenten sane kantos keni potongan, uningayang ring tiang," baos Gubernur langsung sareng krama sane ngamolihang wantuan antuk simbolis, sane karauhin 24 krama saking wewidangan Bali. (Gix
Komentar