31.000 Vial Vaksin Covid-19 Sinovac Sampun Rauh ring Bali , 30.320 Tenaga Kesehatan Kautamayang
- 05 Januari 2021
- 09:01 WITA
- News
DENPASAR, Balitopnews.com - Gubernur Bali Wayan Koster kasarengin Pangdam IX/ Udayana Mayjen TNI Maruli Simanjuntak, Kapolda Bali Irjen Pol. Putu Jayan Danu Putra, miwah Kadis Kesehatan Provinsi Bali I Ketut Suarjaya nyanggra pagrauh 31.000 vaksin saking Biofarma Bandung sane kakirim (3 Januari 2021) saha rauh tanggal 5 Januari 2021 ring Kantor Dinas Kesehatan Provinsi Bali.
Gubernur Bali Wayan Koster maosang akeh vaksin sane katerima 31.000 vial produksi Sinovac. Sane mangkin vaksin kantun kaselehin olih BPOM. Vaksin kagenahang ring genah penyimpanan vaksin cool room Dinas Kesehatan Provinsi Bali sadurung kadistribusiang ring kabupaten/kota sajebag Bali.
Vaksin ring undagan kapertama wantah kautamayang majeng tenaga kesehatan sane akehnyane 30.320 diri, minakadi majeng Kabupaten Jembrana wenten 1.533 diri, Kabupaten Tabanan 3118 diri, Kabupaten Badung 5.551 diri, Kabupaten Gianyar 3.134 diri, Kabupaten Klungkung 1.691 diri, Kabupaten Bangli 1.246 diri, Kabupaten Karangasem 1.074 diri, Kabupaten Buleleng 3.590 diri, miwah Kota Denpasar 9.383 diri.
Pamargin distribusi ring Kabupaten/Kota kantun nyantosang pamutus saking BPOM Pusat miwah salanturnyane kamargiang antuk Dinas Kesehatan.
Manut Koster, puniki majanten pinaka panyokong saking pemerintah pusat majeng Provinsi Bali, sane kaicen 31.000 vial saha rumasuk akeh, saantukan kautamayang antuk pemerintah pusat, riantukan Bali sane kaaptiang mangda digelis mawali sakadi jati mula, mawinan prasida nangiang malih pariwisata ring Provinsi Bali.
Pangaptinnyane taler mangda ngicen kapercayan samian angga majeng pariwisata nasional rumasuk nagiang ekonomi ring Bali, wiadin Indonesia.
"Titiang ring makudang-kudang pamargin paruman sareng Bapak Menko Maritim wiadin Menteri-menteri sane mapaiketan sareng pikobet covid-19 puniki, Bali setata kautamayang saantukan Bali pinaka genah wisata sane kasub ring jagate mawinan kaaptiang mangda digelis mawali sakadi jati mula , sane mawesana majeng ekonomi Bali rumasuk Indonesia," baos Koster.
"Titiang ngaturang suksma pisan majeng pemerintah pusat sane ngicen uratian ageng majeng pemerintah Provinsi Bali melarapan antuk ngicen vaksin sane akeh. Mugi pidabdabe puniki prasida kamargiang becik nganutin ring geguat sane kamedalang antuk pemerintah pusat," baos Gubernur saking Desa Sembiran Kabupaten Buleleng ini.(gix)
Komentar