Nyukserahang SK CPNS Pemprov Bali Formasi 2019, Gubernur Koster Nuekang Indik Visi Nangun Sat Kerthi Loka Bali
- 06 Januari 2021
- 21:01 WITA
- News
DENPASAR, Balitopnews.com - Gubernur Bali Wayan Koster nyukserahang antuk simbolis Surat Keputusan(SK) pengangkatan Calon Pegawai Negeri Sipil (CPNS) Formasi 2019 Pemerintah Provinsi Bali, sane kalaksanayang antuk hybrid (offline miwah online) ring panggung tertutup Gedung Ksirarnawa, Taman Budaya Art Centre Denpasar, Buda 6 Januari 2021.
Gubernur Koster nyarengang para CPNS sane sampun kapilih antuk seleksi sane ketat saha nglintangin passing grade, mawinan prasida makarya sabecik-becikne, saha sayuwakti nyokong program Pemerintah Provinsi Bali.
“(CPNS, red) sane lolos puniki majanten sampun pinaka suratan tangan sane becik, utsaha sane kalaksanayang prasida antuk sekala miwah niskala. Sangkaning punika majanten patut kasemertiang becik, antuk makarya sabecik-becikne, ulet, profesional, madue dedikasi, inovatif, kreatif saha proaktif,” baos Gubernur saking Desa Sembiran, Kabupaten Buleleng puniki.
“Produktif, sampunang mayus saha sampunang ‘nakal’, saantukan pikaryannyane majanten jagi katureksain,” Dane ngawewehin.
Pamargi sane objektif saha kaselehin becik, baos Gubernur Koster nenten wenten naur punapa-punapi ring pamargin CPNS puniki.
"Nenten wenten sane naur punapa-punapi. Yening wenten kantos ngangken sampun ngutsahayang, raris ngaptiang tombokan, mangda kauningayang langsung. Sampunang kantos keni uluk-uluk. Sampunang kantos wenten sane sakadi sapunika, saantukan titiang ngaptiang mangda ngamolihang tenaga sane sayuwakti becik,” Dane nuekang.
Pecak anggota DPR RI tigang periode puniki ngaptiang mangda para CPNS anyar puniki prasida digelis nyihnayang pikaryannyane.
"Yening inargamayang adik-adik puniki sane wau maingkupan sekadi kertas putih, sane patut kadagingin sesuratan nganutin visi pembangunan daerah Bali, pamekas Nangun Sat kerthi Loka Bali melarapan Pola Pembangunan Semesta Berencana Nyujur Bali Era Baru,” pangaptinnyane.
Visi puniki madue semerti nyaga kasucian miwah karahayuan jagat miwah sadagingnyane, nyujur kahuripan krama Bali sane sukerta miwah bagia, Sakala-Niskala nyujur kauripan krama miwah gumi Bali nganutin prinsip Trisakti Bung Karno, Berdaulat ring Politik, Berdikari ring Ekonomi, Berkepribadian ring Kebudayaan melarapan pewangunan sane Terpola, Menyeluruh, Terencana, Terarah, saha Terintegrasi ring Bingkai Negara Kesatuan Republik Indonesia nganutin Nilai-Nilai Pancasila 1 Juni 1945.
Visi sane kapikukuhang pinaka produk hukum miwah landasan pembangunan Provinsi Bali punika manut Gubernur Koster, patut kamargiang, napi malih olih PNS wiadin aparat pemerintah.
"Mabuat pisan iraga uning, nyemertiang saha nglaksanayang ring wewidangannyane soang-soang," baosnyane sinambi nlatarang indik visi punika taler pinaka pamargi nyujur Bali Era Baru, sane kacihnayang antuk tatanan kehidupan baru. Bali sane kawista, Bali kang yata-titi tentram kerta raharja, gemah ripah lohjinawi, antuk tigang dimensi utama minakadi nyaga kasukertan jagat, pawongan miwah kabudayan, kadagingin pabuat dasar wiadin pangaptin krama, saha kaping tiga wenten manajemen resiko sajeroning ngarepin makudang-kudang pikobet sane kaarepin ring benjang pungkur.
Gubernur sane taler pinaka Ketua DPD PDI Perjuangan Bali puniki maosang, pewangunan sane kalaksanayang puniki sayukwati sajeroning nyaga palemahan Bali, pawongannyane saha kabudayannyane.
“Nenten pinaka pewangunan sane tan padasar, nelasang jinah, nanging sayuwakti kaanggen nagingin pabuat Bali mangda setata rajeg saha prasida katamiang kantos ring kapungkur wekas," baosnyane.
" Bali puniki jagi kapidabdabin becik antuk komprehensif, desain sane tegep saha nenten pinaka pewangunan sane sporadis,” Dane ngawewehin.
Tiosan punika, alumni ITB Bandung puniki nyarengang para CPNS nyarengin ngwantu UMKM lokal Bali sane keni pawesana sangkaning pandemi Covid-19, antuk matumbasan ring pameran UMKM Bali Bangkit sane kalaksanayang ring Taman Budaya Art Center Denpasar.
"Pinih alit matumbasan limang atus tali, iraga sane kantun ngamolihang gaji, patut ngwantu sameton sane keni pawesana kaon sangkaning Covid-19,” baosnyane
Kepala Badan Kepegawaian Daerah (BKD) Provinsi Bali Ketut Lihadnyana nlatarang akeh formasi CPNS Pemprov Bali wantah 674 diri, minakadi majeng tenaga pendidik, tenaga kesehatan, pamong budaya, tenaga teknis miwah tenaga profesional tiosan.
“Paletan sane patut kalintangin majanten panjang, nganggen sistem online saha pamutus samian mawit saking pemerintah pusat,” baos Lihadnyana.
Saking samian formasi, Lihadnyana taler nguningayang yening nenten samian formasi prasida kadagingin saantukan nenten wenten sane prasida nagingin passing grade ring formasi punika.
“Akehnyane sane nrima SK rahina mangkin wenten 664 diri, saha satak diri rauh langsung utawi offline, saha sisannyane melarapan antuk online,” baosnyane.(gix)
Komentar