Gubernur Bali : Nganggen Endek Satunggil Anggara ring Sakancan Parikrama
- 11 Februari 2021
- 15:02 WITA
- News
DENPASAR, Balitopnews.com - Gubernur Bali Wayan Koster mawali ngamedalang kawijakan anyar minakadi Nganggen Tenun Endek Bali/Kain Tenun Tradisional Bali satunggil rahina Anggara, ring rahina Wraspati Pon Landep, 11 Pebruari 2021, ring Jayasabha Denpasar.
Sadurungnyane, Gubernur Koster taler sampun prasida ngutsahayang mangda kain tenun endek Bali prasida ngamolihang Sertifikat Kekayaan Intelektual Komunal Ekspresi Budaya Tradisional saking Kementerian Hukum dan Ham RI, saha ngwangun prakanti sareng Rumah Model Christian Dior sajeroning nganggen Kain Tenun Endek Bali.
Manut Koster, kawijakan anyar puniki pinaka cihna kasumekenan melanin produk budaya lokal krama Bali, saking Industri Kecil dan Menengah (IKM) wiadin UMKM krama Bali minakadi kawijakan sane kaunggahang ring Surat Edaran Nomor 04 Warsa 2021 ngeninin indik nganggen busana Kain Tenun Endek Bali / Kain Tenun Tradisional Bali, sane sampun kalingga tanganin ring rahina Wraspati Wage, Watugunung, 28 Januari 2021 sane sampun lintang.
Kawijakan anyar puniki kadasarin antuk makudang-kudang tetimbang:
Kain Tenun Endek Bali/Kain Tenun Tradisional Bali pinaka tetamian budaya kreatif krama Bali sane patut lestariang saha pinaka cihna krama Bali madue karakter miwah integritas nganutin Visi Nangun Sat Kerthi Loka Bali melarapan Pola Pembangunan Semesta Berencana nyujur Bali Era Baru.
Kain Tenun Endek Bali sampun taler kaunggahang pinaka Kekayaan Intelektual Komunal Ekspresi Budaya Tradisional antuk Nomor Inventarisasi EBT.12.2020.0000085 olih Direktorat Jenderal Kekayaan Intelektual, Kementerian Hukum dan HAM Republik Indonesia, tanggal 22 Desember 2020.
Sampun wenten produk kain sane madue motif sekadi endek sane nenten pinaka pikaryan krama Bali saha nenten madasar antuk budaya kreatif lokal Bali, sane majanten prasida dados gageem majeng Kain Tenun Endek Bali/Kain Tenun Tradisional Bali.
Kain Tenun Endek Bali/Kain Tenun Tradisional Bali patut kaanggen saha katangiang mawinan prasida nincapang kasukertan krama Bali, saha Pemerintah wiadin krama Bali patut nyokong sumber daya lokal antuk nyarengin nglestariang, nyayubin saha ngawigunayang Kain Tenun Endek Bali/Kain Tenun Tradisional Bali.
Kebijakan anyar puniki pinaka panyalantarayan saking 3 Peraturan minakadi :
Undang-Undang Republik Indonesia Nomor 5 Warsa 2017 indik Pemajuan Kebudayaan;
Peraturan Daerah Provinsi Bali Nomor 4 Warsa 2020 indik Penguatan miwah Pemajuan Kebudayaan Bali;
Peraturan Gubernur Bali Nomor 79 Warsa 2018 indik Hari Penggunaan Busana Adat Bali; miwah
Peraturan Gubernur Bali Nomor 99 Warsa 2018 indik Pemasaran miwah Pemanfaatan Produk Pertanian, Perikanan, miwah Industri Lokal Bali.
Gubernur Bali ngelingang majeng Manggalaning Instansi Vertikal, Manggalaning Perguruan Tinggi, Bupati/Walikota, Pimpinan Perangkat Daerah, Manggalaning BUMN wiadin BUMD, Pimpinan Perusahaan Swasta, Pimpinan Organisasi/Lembaga Kemasyarakatan sajebag-Bali mangda ngajiang kawentenan Kain Tenun Endek Bali/Kain Tenun Tradisional Bali pinaka tetamian budaya kreatif krama Bali, antuk nganggen busana Endek Bali/Kain Tenun Tradisional Bali ring satunggil parikrama nemonin rahina Anggara. Wastra Endek punika kapatutang pinaka produk lokal krama Bali.
Kawentenan busana endek Bali satunggil rahina Anggara puniki nenten kawatesin, prasida nganggen motif sane matios-tiosan.
Nganggen busana endek Bali satunggil rahina Anggara jagi nenten kamargiang yening rahinane punika taler pinaka rahina Purnama, Tilem, wiadin pakeling wanti warsa Pemerintah Daerah.
Antuk nyobiahang kawentenan Kain Tenun Endek Bali/Kain Tenun Tradisional Bali ring parikrama lokal, nasional, wiadin internasional, wantah sajeroning nincapang ekonomi wiadin kasukertan krama Bali ; saha nyokong pangupaya kreatif wiadin inovatif majeng kawentenan Industri Kecil Menengah (IKM) krama Bali.
Antuk nganggen busana Tenun Endek Bali/Kain Tenun Tradisional Bali, sepisanan ngajiang prakanti sane kamargiang pantaraning Pemerintah Provinsi Bali sareng Rumah Mode Christian Dior ring Paris, perusahaan sane sampun kaloktah ring jagate, nganggen Kain Tenun Endek Bali pinaka busana, rumasuk motif Kain Endek Bali sane kaanggen pinaka produk tas wiadin sepatu ring warsa 2021.
"Prakanti sane mabuat puniki kalinggatanganin daweg tanggal 8 Januari 2021, saha pinaka kapertama, mawinan samian krama Bali sapatutnyane bagia, pangaptine mangda prakanti puniki dados jalaran becik sajeroning nglimbakang kaluihan saha kawibuhan produk budaya lokal krama Bali sane kreatif miwah inovatif," baosnyane.
Edaran puniki ngawit kamargiang saking rahina Anggara Kliwon, Kulantir, tanggal 23 Pebruari 2021, sane kacihnayang antuk nganggen busana endek Bali, sane prasida kamargiang antuk nganggen produk lokal IKM soang-soang Kabupaten/Kota.(gix)
Komentar