Gubernur Koster Nyanggra Kunker BKSAP DPR RI, RUU Pemerintah Provinsi Bali Ngranjing Prolegnas
- 01 April 2021
- 21:04 WITA
- News
DENPASAR, Balitopnews.com - Gubernur Bali Wayan Koster nyanggra Kunjungan Kerja (Kunker) Badan Kerjasama Antar Parlemen (BKSAP) DPR RI ring Provinsi Bali sane kapucukin antuk Wakil Ketua BKSAP DPR RI Putu Supadma Rudana, ring Wiswasabha Utama, Kantor Gubernur Bali, Denpasar, Wraspati (1 April 2021).
Gubernur sane sadurungnyane pinaka anggota DPR RI tigang periode puniki ngajiang becik antuk pamargin kunker BKSAP ring Bali, pinaka cihna panyokong majeng kahanan Bali sane kaon pisan sangkaning pandemi Covid- 19.
“Sadurungnyane Titiang ngaturang suksma antuk sapangrauh BKSAP ka Bali. Titiang nureksain tetujone sampun majanten sajeroning nguripang malih wisatawan sane rauh ka Bali pinaka genah wisata internasional. Bali majaten kaon pisan salami awarsa puniki sangkaning pandemi Covid – 19,” baos Koster.
Gubernur Koster sane taler naenin ring komisi sane pateh sareng Putu Supadma Rudana ring komisi X DPR RI, maosang yening pangupaya sajeroning nguripang pariwisata Bali banget mapaiketan sareng program vaksinasi massal.
“Antuk pemerintah pusat, Bali kanikayang jagi kautamayang sajeroning ngamolihang program vaksinasi mangda prasida 70% saking samian krama Bali. Puniki banget kaaptiang prasida ngwaliang pariwisata Bali saantukan sayan akeh sane kavaksin jagi sayan prasida nees panglahlah virus. Rauh mangkin Bali sampun ngamolihang kiriman 800 tali vial vaksin miwah sampun kaicen langsung majeng krama. Utaminipun ring tigang zona hijau, minakadi Ubud ring Gianyar, Nusa Dua ring Badung, miwah Sanur ring Denpasar. Pamarginipun naenin taler kaselehin langsung antuk Presiden RI Ir. Joko Widodo, saha sampun mamargi antar. Pangrencana ipun pariwisata majeng WNA ring makatiga wewidangan punika kabungkah ring bulan Juli, nanging kantun nyelehin kahanan jagat. Mugi prasida mamargi sekadi pangaptine, nunas wantuan saking BKSAP mangda prasida nyokong program vaksin majeng Bali,” baosnyane.
“Pandemi puniki ngelingang mangda nenten ngandelang pariwisata kemanten. Ring salanturipun jagi kapidabdabin pewangunan ring widang fundamental tiosan, sekadi widang industri miwah pertanian. Tanpa raris nilarin pariwisata, widang sane tiosan majanten taler kapidabdabin mangda sayan nincap miwah dados pendapatan daerah. Widang pariwisata majanten setata katincapang,” baos Gubernur saking desa Sembiran, Buleleng puniki.
Pimpinan Rombongan BKSAP DPR RI Putu Supadma Rudana, maosang Kunker ka Bali ring galahe mangkin mangda ngamolihang tetimbang sajeroning nangiang ekonomi melarapan pariwisata Indonesia, pamekas Bali.
BKSAP jagi digelis nglaksanayang kunjungan ka Maroko, sane madue kaluihan geografis nampek sareng Eropa, sane pinaka pusat wisatawan dahat luih.
“Program sane prasida kawangun sajeroning kunjungan punika kaaptiang wenten kerjasama sister province sareng Maroco. Sekadi sane kauningin, silih tunggil kota ipun Maracas madue pangerauh 12,3 yuta wisatawan duranegara satunggil warsa. Genahnyane nampek sareng Eropa bagian selatan, mugi prasida dados kantong wisatawan sane anyar majeng Indonesia miwah Bali. Majanten wisatawan sane sayuwakti becik,” baos Supadma Rudana.
Wakil Ketua BKSAP DPR RI Mardani Ali Sera maosang yening krama Indonesia ring galahe mangkin patut nguwah pamikayun. Krama Indonesia sane majemuk antuk kaluihan wewidangannyane patut kapidabdabin becik, mawinan prasida ngadautin manah wisatawan.
“Indonesia nenten prasida kapatehang ring samian wewidangan, saha patut kauningin. I raga mangda prasida nyihnayang kaluihan sane wenten ring soang-soang wewidangan,” baosnyane sinambi nlatarang indik pengajuan Rancangan Undang-Undang (RUU) indik Pemerintah Provinsi Bali sane ring galahe mangkin sampun ngranjing Program Legislasi Nasional (Prolegnas) miwah 12 pengajuan RUU daerah tiosan sane nginutin pidabdab ring Bali, sane ring galahe mangkin kantun nyantosang pembahasan.(gix)
Komentar