Putri Koster Ngawirangang Kayun Atlet Renang Bali Mangda Bendera Bali prasida makibarang ring PON XX Papua
- 29 Mei 2021
- 21:05 WITA
- News
DENPASAR, Balitopnews.com - Putri Suastini Koster sane taler pinaka Dewan Pembina Pengurus Provinsi (Pengprov) Persatuan Renang Seluruh Indonesia (PRSI) Bali ngawirangang kayun para atlet sane nglaksanayang time trial sajeroning midabdabin angga nyanggra PON XX Papua warsa 2021.
Putri Koster ngaptiang para atlet muda Bali prasida mautsaha sabecik-becikne mangda bendera Bali prasida kakibarang ring PON XX .
"Atlet renang Bali puniki sane jagi ngibarang bendera Bali ring parikrama PON. Samian krama Bali jagi ngrastitiang, mangda para atlet prasida midabdabin angga saantukan parikrama PON sane sampun mamargi saking suwe saha mautama puniki muatang pamidabdab sane becik," baosnyane ring parikrama inucap, ring kolam renang Tirta Arum Blahkiuh Badung Bali Saniscara (29 Mei 2021).
Putri Koster maosang yening Bali ketah kabaosang pinaka 'istana' atlet berprestasi utaminipun atlet muda. " Majeng altet senior majanten mangda taler kapidabdabin becik. Sayan akeh sarana sane kasediayang saha mugi pemerintah ring salanturnyane sayan nincap uratiannyane majeng para atlet. Yening kukuh ring pikayunan majanten napi sane kaaptiang prasida kakardinin," baosnyane.
Putri Koster nuekang, widang olahraga sane madue selah ageng kalimbakang majanten patut setata katincapang.
"Wenten renang, beladiri wiadin sane tiosan. Mangda taler wenten penghargaan majeng para atlet, kesehatan wiadin kasukertannyane mangda taler kauratiang becik, saantukan Bali majanten nenten kasub sangkaning seni budaya kewanten. Para atlet mangda sayuwakti kauratiang rauhing ring masa depan ipun," baosnyane.
Yening kabuatang, anak istri sane taler pinaka Ketua TP PKK Bali puniki taler ngaptiang mangda Bali prasida ngardi parindikan punika, ngawit ring sarana rauhing ring masa depan para atlet.
"Pemerintah taler ngwangun prakanti sareng swasta mapaiketan ring pikaryannyane. Tiang jagi nguningayang ring bapak gubernur," pamicutetnyane.
"Nanging sane mangkin cihnayang dumun prestasi sane katur majeng Bali saantukan sekadi sinonggane " Sekali berarti setelah itu mati". Antuk punika ngiring mangda sayuwakti uleng, lascarya saha ngaatang angga, Men sana in corpore Sano, ring angga sarira sane kenak majanten wenten jiwa sane kukuh," pinaka atur pamuputnyane.
Ketua Umum PRSI Bali, Anak Agung Ngurah Adhi Ardhana nlatarang, Pelatda kawiaktiannyane sampun kakawitin saking April sane sampun lintang miwah para atlet nglanturang ngamiletin time trial mangda prasida ngamolihang catatan waktu pinih becik.
"Iriki kalaksanayang sistem promosi- degradasi ring Pelatda. Atlet sane ngamolihang catatan waktu pinih becik, utawi ngamolihang rekor jagi kasokong sajeroning ngamiletin pelatda ring Jakarta," baosnyane.
Ardhana taler maosang yening olahraga akuatik ring Bali dahat akeh prestasi ipun, napi malih kabaosang pinaka raja ring kelompok umur junior.
"Ring PON Papua yening prasida mapikolih sekadi pangaptine, majanten jagi ngarsaang infrastruktur level internasional," pangaptine.
Ketua KONI Bali I Ketut Suwandi maosang, sampun galahnyane majeng para para atlet nyujur prestasi sadurung pamargin PON XX ring Papua.
"Utsaha saha kayun sane ageng jagi ngawetuang prestasi, pinaka catatan sejarah sane mabuat majeng yayah rena, daerah wiadin soang-soang angga. Antuk punika galah 120 rahina puniki mangda kawigunayang becik sajeroning latihan," baosnyane.
Suwandi taler maosang yening cabor Renang Bali prasida ngamolihang rekor ring PON 2016 Jabar, daweg punika pinaka galah kapertama prasida ngamolihang emas.
" Jagi kabuktiyang yening ring warsa 2021 taler prasida sekadi punika. Cihnayang yening jagi prasida nyihnayang prestasi. Yadiastun anggaran alit, nanging Bali prasida wenten ring undagan kaping 6 ring nasional," baos Suwandi.
Komentar