Pemprov Bali Ngicen Diskon Piutang Pajak, Gratis Bea Balik Nama miwah Pemutihan Pajak Kendaraan Bermotor
- 02 Juni 2021
- 20:06 WITA
- News
DENPASAR, Balitopnews.com - Ring kawentenan pandemi sane kantun nibenin rauh mangkin, napi malih ekonomi krama Bali kantun lesu ngawinang Pemerintah Provinsi Bali mawali nglaksanayang relaksasi pajak melarapan Peraturan Gubernur Nomor 21 Warsa 2021 indik Pembebasan Pokok Pajak miwah Penghapusan Sanksi Administratif marupa Bunga wiadin Danda Pajak Kendaraan Bermotor miwah Bea Balik Nama Kendaraan Bermotor.
Tiosan punika ring warsa 2021 puniki Gubernur Bali Wayan Koster ngamedalang tigang kawijakan sinarengan minakadi Diskon Piutang Pajak Kendaraan, Gratis Bea Balik Nama miwah Pemutihan Pajak Kendaraan Bermotor.
Sekadi punika kabaosang Sekretaris Daerah Provinsi Bali Dewa Made Indra ring pamargin sosialisasi Kebijakan Strategis Gubernur Bali sane ngambil genah ring Badan Pendapatan Daerah Provinsi Bali, ring rahina Buda (2 Juni 2021).
Dewa Indra maosang yening Diskon Pajak Kendaraan puniki kaicen majeng wajib pajak sane nunggak pajak langkungan ring kalih warsa, prasida naur pajak kalih warsa kewanten, antuk pajak ring warsa kaping tiga wiadin pat kaluputang. Kawijakan diskon pajak ngawit kamargiang saking tanggal 8 Juni kantos 3 September 2021.
Salanturnyane majeng kawijakan GRATIS Bea Balik Nama Kendaraan Bermotor II (BBNKB II) kakawitin saking tanggal 4 September kantos 17 Desember 2021. Gratis BBNKB II kaicen majeng wajib pajak sane jagi nglaksanayang balik nama, mutasi lokal wiadin mutasi saking dura Bali.
Majeng kawijakan Pemutihan Pajak wantah pinaka pembebasan Bunga wiadin dande mapaiketan ring urunan Pajak Kendaraan Bermotor (PKB) miwah Bea Balik Nama Kendaraan Bermotor II (BBNKB II), sane ngawit kamargiang saking tanggal 8 Juni kantos 17 Desember 2021.
Antuk punika, melarapan antuk kawentenan relaksasi pajak punika Dewa Indra ngaptiang prasida ngicen selah majeng krama sajeroning muputang saha naur pajak ring tengahing Pandemi Covid-19, tiosan punika relaksasi puniki taler kaaptiang prasida nincapang pendapatan daerah.
“Tiang ngaptiang melarapan antuk kawentenan kawijakan puniki prasida kauningin antuk para petugas sane wenten ring lapangan saha salanturnyane kasobiahang majeng krama saha mangda petugas prasida ngicen ayah-ayahan sabecik-becikne majeng krama sane sampun eling ring swadarmannyane, saha petugas mangda prasida mastikayang krama ngamolihang haknyane nganutin geguat sane munggah ring pergub puniki”, baosnyane.
Kepala Badan Pendapatan Daerah Provinsi Bali Made Santha maosang, tiosan ring relaksasi pajak kawijakan Gubernur Bali, taler wenten kawijakan relaksasi pajak sane kamedalang antuk Pemerintah Pusat melarapan antuk Kementerian Keuangan sane kaunggahang ring PMK No. 20/PMK.010/2021 nganinin indik Pajak Penjualan Atas Barang Mewah Atas Penyerahan Barang Kena Pajak sane ngranjing barang Mewah marupa Kendaraan Bermotor Tertentu sane katanggung Pemerintah warsa 2021.
“Yening krama numbas mobil sane sampun wenten geguatnyane sampun kapidabdabin pemeritah majanten pajak pembelian jagi kataur 100 % saking PPnBM yang terutang majeng masa pajak maret 2021 kantos masa pajak mei 2021, periode kaping kalih kataur 50 % saking PPnBM yang terutang majeng masa pajak juni 2021 rauhing masa pajak agustus 2021 miwah periode kaping tiga kataurin 25 % saking PPnBM yang terutang majeng masa pajak september 2021 kantos masa pajak desember 2021”, baosnyane.
“Kawijakan puniki jagi kamargiang ring warsane puniki kemanten saha durung majanten jagi wenten ring warsa salanturnyane. Sangkaning punika, kawijakan puniki mangda prasida kawigunayang becik olih krama”, baosnyane.(gix)
Komentar