Gubernur Bali Ngamedalang SE Nomor 9 Warsa 2021 Indik PPKM Darurat
- 02 Juli 2021
- 21:07 WITA
- News
DENPASAR, Balitopnews.com - Gubernur Bali ngamedalang Surat Edaran (SE) Nomor 9 Warsa 2021 Indik Pemberlakuan Pembatasan Kegiatan Masyarakat (PPKM) Darurat Covid-19 Sajeroning Tatanan Kehidupan Era Baru ring Provinsi Bali, nganutin Instruksi Mendagri Nomor 15 Warsa 2021 Indik Pemberlakuan Pembatasan Kegiatan Masyarakat Darurat Covid- 19 ring wewidangan Jawa miwah Bali.
SE Gubernur puniki kamedalang madasar antuk kalih wiwilan minakadi sayan agengnyane panglimbak Covid-19 ring Bali miwah sayan mabuatnyane rasa eling samian angga sajeroning nyaga kesehatan, katreptian wiadin karahayuan krama Bali.
PPKM Darurat Covid-19 kamargiang majeng 9 Kabupaten/Kota ring Bali nganutin kriteria level 3 antuk ngamargiang parindikan-parindikan minakadi: pamargin pangajah-ajah (Sekolah, Perguruan Tinggi, Akademi, wiadin genah Pendidikan/Pelatihan) kalaksanayang melarapan antuk daring/online, parikrama sektor non esensial 100 persen ngamargiang Work From Home (WFH)
Parikrama ring sektor esensial sekadi keuangan kalih perbankan, pasar modal, sistem pembayaran, teknologi informasi komunikasi, perhotelan non penanganan karantina Covid-19, industri orientasi ekspor kamargiang 50 persen, pinih akeh staf Work From Office (WFO) antuk setata ngutamayang protokol kesehatan.
Widang pemerintahan sane ngicen ayahan publik sane nenten prasida kaandegang, prasida ngawigunayang 25 persen pinih akeh staf WFO antuk setata ngutamayang protokol kesehatan; kritikal sekadi energi, kesehatan, keamanan, logistik, transportasi, industri makanan, minuman wiadin panyokong ipun, petrokimia, semen, objek vital nasional, penanganan bencana, proyek strategis nasional, konstruksi, utilitas dasar (listrik kalih toya), industri pemenuhan kebutuhan pokok masyarakat sarahina prasida kamargiang 100 persen staf Work From Office (WFO) antuk setata ngutamayang protokol kesehatan.
Majeng supermarket, pasar tradisional, toko kelontong, kalih pasar swalayan sane ngadol pabuat sarahina jam operasional ipun kawatesin kantos galah 20.00 Wita antuk kapasitas pengunjung 50 persen miwah majeng apotek kalih toko obat prasida kabungkah 24 jam.
Pamargin parikrama sekadi ngajeng/nginum ring genah umum (warung makan, rumah makan, kafe, pedagang kaki lima, wiadin lapak jajanan) inggian sane madue genah soang-soang utawi sane wenten ring pusat perbelanjaan/mall wantah ngicen ayahan delivery/take away saha nenten kaicen ngajeng irika (dine-in).
Parikrama ring pusat perbelanjaan/mall/pusat perdagangan katutup dumun sajabaning akses majeng restoran, supermarket, kalih pasar swalayan kantun kaicen, pamargin parikrama konstruksi (genah konstruksi wiadin proyek) prasida operasi 100 persen antuk ngutamayang protokol kesehatan.
Parikrama agama (Masjid, Mushola, Gereja, Pura, Vihara, utawi Klenteng wiadin genah umum tiosan sane kaanggen nglaksanayang pagubaktian) kalaksanayang antuk ngwatesin pamilet ipun saha mangda ngamolihang ijin saking Satgas Covid-19 Kabupaten/Kota.
Sarana umum (genah publik, taman umum, genah wisata umum, wiadin genah publik sane tiosan) katutup dumun, parikrama seni, budaya, olahraga wiadin sosial kemasyarakatan (genah seni, budaya, sarana olahraga wiadin parikrama sosial sane prasida ngawetuang pupulan krama) katutup dumun.
Transportasi umum (kendaraan umum, angkutan masal, taksi (konvensional wiadin online), wiadin kendaraan sewa/rental) prasida kalaksanayang antuk kapasitas pinih akeh 70 persen miwah setata ngutamayang protokol kesehatan.
Pamargin pawiwahan karauhin pinih akeh 30 diri krama antuk setata ngutamayang protokol kesehatan saha nenten ngicen ngajeng ring genah upacara, nanging kaicen yening kabkta ring jero soang-soang.
Majeng sane nglaksanayang perjalanan transportasi udara patut madue kartu vaksin (Paling nenten vaksin suntik 1), surat keterangan asil negatif uji swab berbasis PCR paling suwe 2 x 24 jam sadurung malelungan. Majeng transportasi darat wiadin laut wajib madue kartu vaksin (paling nenten marupa vaksin suntik 1), surat keterangan asil negatif uji swab berbasis PCR utawi asil negatif uji Rapid Test Antigen paling suwe 2 x 24 jam sadurung malelungan. Majeng sopir kendaraan logistik wiadin transportasi barang tiosan nenten keni geguat madue kartu vaksin. Sajeroning mastikayang asil negatif uji swab berbasis PCR utawi asil negatif uji Rapid Test Antigen asli, surat keterangan patut madaging Barcode/QRCode; saha nganggen masker nganutin geguat saha nenten kaicen nganggen face shield kewanten tan panganggen masker.
Pangupaya mangda vaksinasi digelis puput, sajeroning nyayubin kawentenan krama saha pangupaya puniki kalaksanayang sajeroning nees panglimbak virus saha ngutamayang kaselametan krama sane katureksain dangan sungkan rahat kantos padem sangkaning virus (sekadi lansia, wiadin krama sane komorbid) saantukan kapasitas kesehatan nenten akeh saha pawesana jangka panjang saking infeksi Covid-19.
Bupati kalih Walikota sane nenten nglaksanayang geguat punika sekadi sane munggah ring SE Gubernur kakeniang pamidanda administrasi marupa teguran tertulis dua kali berturut-turut kantos pemberhentian sementara sekadi sane kaunggahang ring Pasal 68 ayat (1) dan ayat (2) Undang-Undang Nomor 23 Warsa 2014 indik Pemerintahan Daerah.
Majeng pelaku usaha, restoran, pusat perbelanjaan, transportasi umum sane nenten nglaksanayang geguat sekadi sane munggah ring SE Gubernur keni pamidanda administratif kantos penutupan usaha nganutin geguat sane munggah ring peraturan perundang-undangan.
Sira ugi, Pelaku Usaha, Pengelola, Penyelenggara utawi Penanggung jawab genah kalih Fasilitas Umum sane nglaksanayang parikrama, kapatutang ngamargiang protokol kesehatan minakadi: ngamargiang pola hidup sehat saha luput saking Covid-19 antuk 6 M: Memakai masker standar dengan benar, Mencuci tangan, Menjaga jarak, Mengurangi bepergian, Meningkatkan imun, miwah Mentaati aturan.
Sira ugi patut ngwatesin parikrama ipun saha ngwatesin malelungan utaminipun ring genah sane ngranjing zona merah.
Kawentenane ring Bandar Udara, Pelabuhan, kalih Transportasi Darat mangda nincapang panureksannyane majeng pamargin prokes wiadin ring prasarat perjalanan PPDN, rumasuk ngatur indik kawentenan SDM kalih sarana ipun, saha antuk ngicen laporan harian majeng Satgas Penanganan COVID-19 Provinsi Bali. Majeng Pelabuhan penyeberangan Ketapang-Gilimanuk panureksannyane mangda katincapang utaminipun ring asil tes PPDN, antuk makarya pos pemeriksaan gabungan sane kapucukin olih Kantor Kesehatan Pelabuhan (KKP), kawantu antuk PT. ASDP Indonesia Ferry.
Majeng Perbekel/Lurah maprakanti sareng Bandesa Adat mangda digelis makarya Satgas Gotong Royong Penanganan Covid-19 Berbasis Desa Adat antuk struktur organisasi, tugas, kalih fungsi kaunggahang ring Keputusan Bersama Gubernur Bali kalih Majelis Desa Adat Provinsi Bali indik Pembentukan Satuan Tugas Gotong Royong Penanganan Covid-19 Berbasis Desa Adat ring Bali.
Sadurung Satgas Gotong Royong Penanganan Covid-19 Berbasis Desa Adat kawentenang, pamargin PPKM Berbasis Desa/Kelurahan dados amongan Relawan Desa/Kelurahan wiadin Satgas Gotong Royong Pencegahan Covid-19 berbasis Desa Adat ring Bali saha nangiang kawentenan Pos Komando (Posko) Gotong Royong Pencegahan Covid-19 berbasis Desa Adat ring Bali pinaka genah Satgas Gotong Royong nglaksanayang swaginannyane nganutin baos ring huruf a;
Pamargin ipun sekadi sane munggah ring huruf c, majeng Posko tingkat Desa prasida nguwah regulasi melarapan antuk kawentenan peraturan desa, peraturan kepala desa wiadin keputusan kepala desa.
Majeng Bupati/Walikota se-Bali mangda makarya Pos Komando (Posko) Gotong-Royong Penanganan Covid-19 Kecamatan sane kapucukin antuk Camat, majeng supervisi kalih pelaporan Posko tingkat Desa/Kelurahan.
Ring Bupati/Walikota se-Bali mangda nglaksanayang becik kawentenan PPDN sane nganggen Pelabuhan wiadin Jalan Nasional antuk nangiang kawentenan pos pemeriksaan sane maprakanti sareng angga TNI/Polri ring wates-wates wewidangan sajeroning mastikayang protokol kesehatan kalih prasarat perjalanan PPDN.
Majeng Panglima Kodam IX/Udayana, Kepala Kepolisian Daerah Bali, Kepala Satuan Polisi Pamong Praja Provinsi Bali kalih Pacalang Desa Adat mangda nglaksanayang operasi penegakan disiplin sane sayan intensif, masif, saha tegas, mastikayang yening Edaran puniki sayuwakti kamargiang.
Edaran puniki ngawit kamargiang saking rahina Saniscara 3 Juli 2021 kantos Anggara 20 Juli 2021.
Melarapan antuk Edaran puniki, Surat Edaran Gubernur Bali Nomor 08 Warsa 2021 indik Perpanjangan Pemberlakuan Pembatasan Kegiatan Masyarakat Berbasis Desa/Kelurahan Dalam Tatanan Kehidupan Era Baru ring Provinsi Bali kacabut sane nenten kamargiang malih.(gix)
Komentar