Nagingin Target 3 Yuta Diri Ngamolihang Vaksin, Gubernur Koster Ngamargiang Vaksinasi Majeng sane Mayusa 12-17 Warsa
- 05 Juli 2021
- 22:07 WITA
- News
DENPASAR, Balitopnews.com - Gubernur Bali Wayan Koster nyelehin indik pidabdab Vaksinasi majeng Anak Alit Mayusa 12-17 Warsa ring Provinsi Bali magenah ring SMA Negeri 4 Denpasar, Soma (5 Juli 2021).
Ring pangrauhnyane, Gubernur Koster maosang nganutin saking piteket Presiden RI mangda Provinsi Bali nglaksanayang percepatan vaksinasi massal. Akeh krama Bali wenten 4,3 yuta diri. 70 persen utawi sawetara tigang yuta diri jagi kaicen vaksin.
Rauh mangkin vaksinasi suntik paletan kapertama sampun kaicen majeng 2,3 yuta diri utawi 77 persen. Nanging saking tigang yuta diri punika, wenten sane durung kadadosang vaksin minakadi anak alit utawi yowana sane mayusa 12-17 warsa, mawinan durung prasida nagingin target tigang yuta diri.
Akeh Anak alit sane mayusa 12-17 warsa ring sajebag Bali wenten 520.000 diri. Mangda prasida nagingin target punika, ngawit mangkin kalaksanayang vaksinasi ring sajebag Bali majeng sisia SMP kalih SMA/SMK, sane kapidabdabin jagi kamargiang ring sajebag kabupaten/kota ring Bali. Pangaptine samian sisia SMP wiadin SMA/SMK ngamiletin program vaksinasi puniki.
"Tiang ngaptiang mangda alit-alite iriki nguningayang majeng sawitran-sawitrannyane mangda nglaksanayang vaksin, mawinan samian prasida sehat saha nenten keni Covid-19," pakesiarnyane.
Gubernur Koster taler maosang target vaksinasi puniki paling suwe kalaksanayang kantos ring 10 Juli 2021 majeng samian sisia SMP wiadin SMA sane mayusa 12-17 warsa.
"Tiang ngaturang suksma majeng para sisia irika sane sampun rauh semenge puniki sajeroning nglaksanayang vaksin. Sampunang ajerih saantukan pidabdabe puniki ngawinang prasida nees panglahlah virus. Suksmaning manah taler katur majeng ring tenaga kesehatan sane sampun becik pisan sajeroning ngamargiang swadarmannyane. Punika taler majeng ring Dinas Kesehatan Provinsi Bali kalih Polda Bali sane banget kasokong antuk Bapak Kapolda," baosnyane.
Dane ngawewehin majeng ring Kabupaten/Kota, antuk sinarengan ring rahinane mangkin kamargiang vaksinasi sisia SMP kalih SMA sane kapucukin antuk Bupati/Walikota sajebag Bali.
"Puniki pinaka cihna agengnyane uratian saking Bapak Presiden Joko Widodo, Bali kautamayang sajeroning ngamargiang vaksinasi massal. Pangaptine mangda samian krama Bali sane akehnyane tigang yuta prasida kavaksin saha Bali prasida ngranjing zona hijau saha nenten wenten panglahlah Covid-19. Antuk punika pariwisata wiadin ekonomi ring Bali kaaptiang prasida mewali sekadi jati mula," pangaptinnyane.
Koster taler ngaptiang mangda para sisia ngamargiang becik protokol kesehatan yadiastun sampun ngamolihang vaksinasi.
"Tiang banget mapengapti mangda alit-alit iriki prasida trepti nglaksanayang vaksinasi, setata nyaga jarak, nganggen masker saha sampunang pisan mapupul. Risampune jagi mawali ka jero soang-soang sampunang madesek-desekan. Tiang ngaptiang ring Bapak Kepala Sekolah, bapak ibu guru samian mangda nureksaian sisiannyane mangda samian pamargine trepti, saantukan Bali wiadin Denpasar panincap kawentenan covid rumasuk ageng. Samian mangda yakti-yakti waspada, mangda sampunang para sisia kantos keni covid-19," baosnyane.(gix)
Komentar