Pakeling Rahina AIDS Sedunia, Wagub Cok Ace Ngelingang Samian Mangda Nyarengin Ngarepin AIDS
- 01 Desember 2021
- 16:12 WITA
- News
DENPASAR, Balitopnews.com - Ring pakeling Rahina AIDS sedunia nepek ring tanggal 1 Desember, Wakil Gubernur Bali Tjokorda Oka Artha Ardana Sukawati nyarengang samian krama mangda ngwangun rasa eling samian angga nyarengin ngarepin pikobet AIDS. Parindikan puniki kabaosang Wagub Bali sesampune rauh ka Kantor Komisi Penanggulangan AIDS (KPA) Provinsi Bali ring Jalan Melati , Denpasar, Rabu (1 Desember 2021).
Wagub Bali kasarengin Kepala Dinas Kesehatan Provinsi Bali Ketut Suarjaya maosang, ring tengahing pandemi Covid-19 kawentenan krama sane keni sungkan AIDS kakantenang nedunang, parindikan puniki nyihnayang yening rasa eling krama sajeroning ngadohin sahananing parindikan sane prasida ngawetuang pinyungkan AIDS sayan nincap.
"Titiang ngaptiang yadiastun ring tengahing pandemi Covid-19, kawentenan krama sane keni sungkan AIDS taler prasida nedunang," baosnyane.
Kawentenan kasus AIDS ring tengahing krama sane nedunang, wiwilan ipun saantukan rasa eling krama sajroning ngadohin sahananing parindikan sane prasida ngawetuang AIDS miwah ngamargiang pola hidup sehat sayan nincap. Tiosan punika, mauwahnyane panampen krama majeng sane keni AIDS taler sayan becik, mawinan krama sane keni sungkan puniki eling sajeroning nureksain angga saking rihin.
“ Rasa eling saha pangweruhan krama majeng pinyungkan AIDS sane sayan nincap, ngawinang sane sungkan AIDS nenten malih kasepekang utawi keni diskriminasi ring tengahing krama. Tiosan punika sangkaning panincap teknologi wiadin obat-obatan sane sayan nglimbak, ngawinang krama sayan eling matamba. Titiang ngaptiang ring salanturnyane mangda kasus AIDS prasida nedunang, napi malih krama sayan eling indik kawentenan pinyungkane puniki, “ pawewehnyane.
Kepala Sekretariat KPA Provinsi Bali A A Ngurah Patria Nugraha maosang ring tengahing pandemi Covid 19 sekadi mangkin anggannyane setata nglaksanayang sosialisasi mapaiketan ring HIV AIDS ring tengahing krama melarapan antuk parikrama webinar wiadin media online. Melarapan antuk punika kaaptiang mangda kawentenan kasus AIDS ring Provinsi Bali prasida nedunang miwah kesehatan krama prasida sayan nincap.(gix)
Komentar