Nyokong Program KPK : Bupati Tabanan Ngamiletin Seminar Pakeling Hari Anti Korupsi Sedunia
- 01 Desember 2021
- 20:12 WITA
- News
TABANAN,Balitopnews.com – Bupati Tabanan Dr. I Komang Gede Sanjaya kasarengin olih Asisten 3, Kepala Bakeuda, Kepala Inspektorat miwah Kepala DPMTSP, ngamiletin seminar Pakeling Hari Anti Korupsi Sedunia sane kalaksanayang antuk hybrid ring sajebag Indonesia, ring TCC, Kantor Bupati Tabanan, Buda (1/12).
Seminar Nasional ngunggahang unteng “Transformasi Perizinan Berbasis Risiko Ring Widang Pertambangan” puniki pinaka dudonan pakeling (Hari Anti Korupsi Se-Dunia) Hakordia 2021 sane kapakelingin nepek ring tanggal 9 Desember 2021 miwah kapikamkam olih Komisi Pemberantasan Koripsi. Antuk kapucukin olih Komjen Pol. Firli Bahuri, M.Si pinaka ketua KPK miwah kasiarang langsung saking Sulawesi Selatan, seminar puniki taler kamiletin daring olih Gubernur miwah para Bupati / Walikota Sajebag-Indonesia.
Sajeroning pamargin seminar, Firli Bahuri pinaka ketua KPK ngicen piteket ring samian Kepala Daerah sane ngamiletin seminar, mapaiketan ring pikobet wangsa panegara sane majanten patut kapuputang ring Indonesia. Pikobet punika minakadi kaepah dados papat parindikan ; kapertama mapaiketan ring bencana inggian bencana alam wiadin nenten sangkaning alam, rumasuk krisis kesehatan sane kaawinang sangkaning Pandemi Covid-19 saha mawesana kaon majeng ekonomi nasional. Salanturnyane mapaiketan ring narkoba, terorisme, radikalisme miwah pinih untat wantah pikobet korupsi.
Pikobet punika patut digelis kapuputang, sajeroning nagingin tetujon nasional sane anut sareng daging Alinea ka-4 pancasila. Rumasuk melindungi segenap bangsa Indonesia dan seluruh tumpah darah Indonesia, memajukan kesejahteraan umum, mencerdaskan Kehidupan bangsa dan Ikut melaksanakan ketertiban dunia yang bedasarkan kemerdekaan, perdamaian abadi dan keadilan sosial.
Bupati Sanjaya ngamiletin parikrama seminar nasional puniki, saantukan parindikan puniki karasayang dahat mabuat majeng pemerintahan, mawinan prasida nyarengin ngareba pewangunan ring Indonesia. “Titiang banget ngajiang dudonan parikrama saking Hakordia sane ngunggahang unteng Satu Padu Bangun Budaya Antikorupsi, sane anut sareng komitmen pemerintah Kabupaten Tabanan sajeroning masikian saha maprakanti sareng KPK wiadin angga sane mapaiketan sajeroning ngaluputang kawentenan tindak pidana korupsi ring Tabanan” baos Sanjaya.
Firli Bahuri ngelingang majeng samian kepala daerah sajeroning ngamargiang swadarmannyane ngamargiang dharma negara, nganutin sareng swadharma kepala daerah sajeroning ngardi tetujon panegara negara miwah madue tanggung jawab sajeroning mastikayang stabilitas politik kalih katreptian wewidangan. Salanturnyane sajeroning mastikayang katreptian krama mawinan luput saking kawentenan bencana, prasida nangiang ekonomi, mastikayang dangan sajeroning nglaksanayang investasi wiadin perizinan berusaha, saha mastikayang pamargin program pembangunan nasional.
Dane ngaptiang mangda setata numbuhang sikap pemimpin daerah yening Korupsi wantah pikaryan duratmaka, , Negara nenten prasida raris ngardi tetujon panegara sangkaning korupsi. “Korupsi nenten pinaka kejahatan sane ngamocolang panegara kemanten, nanging korupsi taler pinaka parilaksana dahat kaon ngambil hak saking krama wiadin hak asasi manusia, mawinan korupsi prasida kabaosang kejahatan melawan kemanusiaan” baosnyane.
Seminar mamargi saking galah 08.00 semeng antuk kalih narawakya utama minakadi Staf Khusus Menteri ESDM antuk daging bebaosan Pendelegasian Kewenangan Perizinan Pertambangan Antar Pemerintah Pusat sareng Pemerintah Daerah miwah narawakya Staf ahli BIdang Peningkatan Daya Saing Penanaman Modal Kementerian Investasi / BKPM, mapaiketan ring Transformasi Perizinan Berbasis Risiko sajeroning Perizinan Tambang. Kalanturang raris antuk dharmatula sane kasarengin samian pamilet sane majanten mapaiketan langsung sareng ijin pertambangan. (Md/rls)
Komentar