Ngaresmiang MPP Buleleng, Pj Gubernur Mahendra Jaya Nuekang MPP Pinaka Pangupaya Nguwah Panampen Kaon Indik Pelayanan Publik
- 08 Desember 2023
- 21:12 WITA
- News
BULELENG,Balitopnews.com - Penjabat (Pj) Gubernur Bali, SM Mahendra Jaya ngajiang becik kawentenan Mal Pelayanan Publik (MPP) Kabupaten Buleleng sane kaaptiang prasida ngicen pelayanan pinih becik majeng kramane. “Parindikan puniki anut sareng arahan Bapak Presiden indik reformasi birokrasi, Presiden ngaptiang penyederhanaan prosedur wiadin tata kelola pamekas indik tata laksana pelayanan publik miwah perizinan,” baos Mahendra Jaya ri kala mungkah resmi MPP Kabupaten Buleleng ring lantai III Pasar Banyuasri, Kota Singaraja, Buleleng rahina Sukra (8 Desember 2023) semeng.
Pj. Gubernur Bali taler maosang yening malarapan antuk kawentenan sistem satu pintu majanten ngawinang layanan sayan becik, efisien wiadin gelis, saha taler ngirangin resiko penyelewengan sajeroning layanan publik. “Yening teorinyane kejahatan prasida wenten saantukan sampun wenten kayun saha wenten selah. Malarapan antuk pangupaya nincapang sistem layanan sakadi puniki majanten ngirangin kawentenan kejahatan,” baosnyane.
Mahendra Jaya taler ngaptiang kawentenan MPP puniki taler degdeg kawentenane, tiosan dados pilihan kramane sajeroning ngruruh pelayanan publik. “Puniki wantah pakibeh. Para pegawe taler patut sumeken nglaksanayang swadarmannyane, ngwangun kanti sane becik, sistem terintegrasi saha setata ngutamayang pelayanan ramah, cepat miwah tepat,” baos Dane sane embas ring Singaraja, Buleleng.
Manutnyane, parindikan punika mabuat, saantukan kantos mangkin kantun wenten panampen kaon indik alur pelayanan publik sane meweh saha muatang galah sane sue. “Mawinan kabuatang pangupaya sajeroning nguwah panampen punika. Malarapan antuk MPP puniki Titiang manggihin yening wenten kayun saha konsep ring Buleleng sane nenten kaduenang olih samian daerah. Antuk punika Titiang ngajiang becik pangupaya puniki,” baosnyane. "Rahina puniki pinaka pangupaya nyata sajeroning transformasi pelayanan publik ring Kabupaten Buleleng,” baosnyane.
Pj. Bupati Buleleng Ketut Lihadnyana nlatarang yening kawentenan MPP sane terintegrasi sareng pasar Banyuasri kaaptiang prasida dados pusat perekonomian ring wewidangan Kota Singaraja miwah Buleleng . “Titiang ngaptiang mangda kawentenan MPP puniki taler prasida nyokong kawentenan investasi luar ngranjing ka Buleleng,” baos Lihadnyana.
Lihadnyana taler nuekang ring salanturnyane Mal Pelayanan Publik nenten malih indik pelayanan publik terintegrasi satu atap, nanging prasida kalimbakang dados MPP digital miwah MPP mobile mawinan sayan dangan majeng kramane sajeroning ngamolihang pelayanan publik ring Kabupaten Buleleng. “Titiang taler madue kasumekenan kayun mangda MPP prasida mamargi antar, prasida nagingin pabuat kramane majeng pelayanan publik,” baosnyane.
Sesampun ngresmiang MPP Kabupaten Buleleng malarapan antuk nglingga tanganin prasasti miwah pemotongan pita, Pj. Gubernur Mahendra Jaya taler nureksaian langsung satunggil loket pelayanan publik irika. MPP Buleleng sampun kategepin antuk 152 layanan minakadi 18 Organisasi Perangkat Daerah (OPD) vertikal wiadin horizontal. Rumasuk sajeroning makarya paspor, samsat kantos layanan majeng kaum disabilitas.
Parikrama punika taler karauhin olih Ketua DPRD Kabupaten Buleleng, Sekda Kabupaten Buleleng, Forkopimda Buleleng, Kepala Kepolisian Resor Buleleng, Kepala Kejaksaan Negeri Buleleng, Ketua Pengadilan Negeri Singaraja, Rektor/Ketua Perguruan Tinggi Negeri/Swasta ring Kab. Buleleng, Camat se-Kabupaten Buleleng miwah Pimpinan OPD wiadin BUMD ring Pemkab Buleleng.(Rls/Btnc)
Komentar