Pj. Gubernur Mahendra Jaya Ngelingang Ri Kala Nganggen Dana DIPA wiadin TKD Anut Prioritas miwah Fokus Hasil
- 11 Desember 2023
- 21:12 WITA
- News
DENPASAR,Balitopnews.com - Penjabat (Pj) Gubernur Bali S.M. Mahendra Jaya ngelingang mangda belanja negara sane kaicen majeng daerah marupa Daftar Isian Pelaksanaan Anggaran (DIPA) miwah Dana Transfer ke Daerah (TKD) Warsa 2024 kaanggen nganutin prioritas miwah fokus hasil. Pangapti punika kabaosang ri kala parikrama nyukserahang DIPA miwah TKD Tahun Anggaran 2024 antuk digital ring Ruang Wiswa Sabha Utama Kantor Gubernur Bali, Soma (11/12/2023). Patut kauningin, ring tahun anggaran 2024, Bali ngamolihang alokasi APBN agengnyane Rp. 23,604 triliun, marupa belanja pemerintah pusat (DIPA) agengnyane Rp. 11,995 triliun miwah TKD agengnyane Rp. 11,609 triliun.
Pj. Gubernur Mahendra Jaya ngaptiang dana DIPA miwah TKD kamedalang sajroning nyokong pamargin program prioritas ring warsa 2024 minakadi nees kemiskinan, ngaluputang kemiskinan ekstrim wiadin nedunang prevalensi stunting malarapan antuk nglaksanayang pemutakhiran data sajeroning nincapang akurasi program perlindungan sosial malarapan intervensi kolaboratif. Tiosan punika, pemerintah taler madue uratian majeng pangupaya nincapang kualitas pelayanan pendidikan miwah kesehatan, revitalisasi industri miwah penguatan riset terapan sajeroning nincapang daya saing saha penguatan rantai pasok rauhing daya saing usaha malarapan antuk ngwangun iklim investasi sane ramah, kondusif, nincapang daya saing UMKM, koperasi, pertanian miwah kelautan perikanan. “Percepatan pembangunan infrastruktur dasar miwah konektivitas sajeroning nyokong parikrama ekonomi miwah aksesibilitas nyujur pusat pelayanan dasar taler dados program prioritas pemerintah ring warsa salanturnyane,” baosnyane.
Manut arahan Presiden RI Joko Widodo, Pj. Gubernur Mahendra Jaya ngelingang mangda dana DIPA miwah TKD kaanggen malarapan antuk disiplin, teliti, efisien miwah efektif. “Belanja patut nguratiang prioritas sane uleng majeng asil, nincapang transparansi miwah akuntabilitas saha nenten dados korupsi,” baosnyane. Tiosan punika, Dane taler nuekang indik mabuatnyane sinkronisasi pembangunan pusat miwah daerah wiadin percepatan eksekusi pelaksanaan anggaran ring pangawit warsa mawinan kawigunannyane digelis karasayang olih kramane.
Ring pamuput sambrama wacanannyane, Dane maosang indik pamargin Pemilu Serentak Warsa 2024. Mahendra Jaya ngaptiang samian jajaran kementerian/lembaga wiadin pemerintah daerah ngwangun sinergi mawinan pemilu prasida mamargi antar. “Titiang taler nyarengang samian krama mangda nyokong pamargin pemilu,” baosnyane.
Kepala Kantor Wilayah Direktorat Jenderal Perbendaharaan (Kanwil DJPb) Provinsi Bali Teguh Dwi Nugroho maosang yening ring warsa 2020 kantos panguntat warsa 2023, APBN dados instrumen sane banget kaandelang sajeroning ngarepin makudang pikobet sakadi pandemi rauhing panincap pangarga energi miwah pangan. APBN taler mabuat sajeroning pemulihan ekonomi saha nyayubin kramane. Dane maosang yening majeng Daerah Bali, APBN Warsa 2023 sampun ngasilang output mabuat sajeroning akselerasi pembangunan miwah pertumbuhan ekonomi. “Output punika minakadi makudang pewangunan infrastruktur sakadi Pelabuhan Sanur, Shortcut Mengwitani, Bendungan Sidan, Penataan Kawasan Pura Agung Besakih miwah pewangunan margi rauhing jembatan sane kawigunannyane prasida karasayang olih kramane,” baosnyane.
Dwi Nugroho maosang yening kebijakan fiskal 2024 ngunggahang unteng “Mendukung Transformasi Ekonomi sane Inklusif miwah Berkelanjutan”. Anut sareng tema punika, APBN 2024 katitenin sajeroning akselerasi transformasi ekonomi, mawinan prasida nyayubin kramane saha prasida nyaga stabilisasi ekonomi saking guncangan global sakadi stabilisasi pangarga pangan, ketahanan energi miwah pengendalian inflasi. Tiosan punika, APBN pinaka instrumen pinaka pangupaya nyujur kasukertan krama, nees kemiskinan ekstrem, stunting, wiadin kesenjangan.
Penyerahan DIPA miwah TKD antuk digital kacihnayang antuk penyentuhan gawai olih Pj. Gubernur Mahendra Jaya sane kasaksiang Ketua DPRD Bali I Nyoman Adi Wiryatama miwah Kakanwil DJPb Bali Teguh Dwi Nugroho. Parikrama taler kadagingin palinggatanganan pakta integritas olih Sekda Provinsi Bali Dewa Made Indra, Instansi Vertikal miwah Bupati/Walikota se-Bali utawi pejabat sane ngangganin . (Rls/Btnc)
Komentar