Satgas Netralitas ASN Pemprov Bali Nglaksanayang Sosialisasi ring Kalih Unit Kerja ring Tabanan
- 15 Desember 2023
- 12:12 WITA
- News
TABANAN,Balitopnews.com - Sajroning mastikayang netralitas pegawai ASN miwah Non ASN, Pemprov Bali makarya Satgas sane mawit tedun nureksain saha ngicen tuntunan majeng makudang OPD miwah Sekolah. Tim Satgas Netralitas ASN miwah Non ASN Pemprov Bali nglaksanayang monitoring ring kalih genah minakadi UPTD Pelayanan Pajak dan Retribusi Daerah (PPRD) Kabupaten Tabanan sane katerima olih Kepala UPTD. PPRD Kabupaten Tabanan I Ketut Sadar miwah ring Sekolah Menengah Atas (SMA) Negeri 1 Tabanan, sane katerima olih Kepala Sekolah SMAN 1 Tabanan I Nyoman Surjana, Sukra (15 Desember 2023)
Wakil Ketua Satgas Netralitas ASN miwah Non ASN Provinsi Bali I Nyoman Gde Suarditha nenten sangsaya yening samian pegawe ASN wiadin Non ASN ring lingkungan pemerintah madue kasumekenan kayun nyaga netralitas saha nenten sareng ring politik praktis. Dane ngelingang yening ASN madue asas netralitas sane kaunggahang sajeroning Undang-Undang Nomor 5 Tahun 2014 indik ASN. Ring geguat punika kabaosang yening ASN nenten kadadosang pinaka anggota utawi pengurus partai politik. "ASN taler nenten kadadosang melanin sira ugi sajeroning parikrama politik,” baosnyane.
Dane nuekang yening ASN nenten netral majanten jagi mawesana kaon majeng panegara, pemerintah,wiadin krama. Salanturnyane, monitoring wiadin pembinaan indik netralitas ASN miwah Non ASN puniki jagi kauningayang langsung majeng Penjabat Gubernur Bali.
Monitoring, pembinaan rauhing sosialisasi peraturan netralitas ASN miwah Non ASN puniki maprakanti sareng instansi sane mapaiketan, mawinan panureksan sayan dangan kalaksanayang.
Sekretaris Satgas Netralitas ASN dan Non ASN Provinsi Bali I Made Mahadi Sanatana ring arahannyane maosang yening netralitas nenten pinaka parindikan sane anyar, nanging panureksannyane sayan katincapang ring pemilu galahe mangkin. Yadiastun ASN madue hak pilih sane prasida kaanggen ring pemilihan sane jagi rauh, nanging nenten kadadosayang nyihnayang sokonganipun sadurung pencoblosan. Mawinan kabuatang kasumekenan kayun mangda nenten nyarengin parikrama-parikrama pemenangan calon partai politik. "Napi sane patut kalaksanayang sajeroning pangupaya punika, silih tunggilnyane malarapan antuk makarya pakta integritas, saha mangda luput saking pola tendensius sane nyihnayang sokongan majeng silih tunggl partai politik wiadin calon sane kausung,” baosnyane.
Dane ngawewehin, wenten 13 parindikan sane nenten kadadosang majeng ASN wiadin Non ASN. Minakadi 11 larangan antuk sanksi disiplin tingkat berat miwah 2 larangan antuk sanksi disiplin tingkat sedang. Saantukan yening kantos wenten politik praktis, oknum punika katureksain dados wiwilan pemecah belah pantaraning anggota ASN sareng Non ASN. "Iriki nenten mapiteges yening nenten dados milih, utawi nganggen hak pilih, nanging i raga sareng sami mangda sareng-sareng setata netral, nenten ngajakin anak tiosan mangda milih sakadi pilihan i raga,” baosnyane.
Satgas Netralitas ASN miwah Non ASN madue tetiga amongan minakadi pencegahan, penindakan miwah monitoring. Dane maosang, pangupaya pencegahan sampun kalaksanayang malarapan antuk makudang-kudang parikrama sakadi pengarahan Bawaslu, penandatanganan Pakta Integritas miwah pengucapan ikrar netralitas.
Dane taler maosang yening pamargin Pemilu Serentak Warsa 2024 katureksain prasida ngawetuang pelanggaran netralitas pegawai ASN wiadin Non ASN.
Sadurungnyane Pemerintah taler sampun ngamedalang Surat Keputusan Bersama (SKB) indik Pedoman Pembinaan dan Pengawasan Netralitas Pegawai Aparatur Sipil Negara (ASN) sajeroning pamargin Pemilihan Umum wiadin Pemilihan. SKB kamedalang sajeroning mastikayang netralitas ASN ring pemilihan umum wiadin pemilihan kepala daerah serentak ring warsa 2024. ( Rls/Btnc)
Komentar