Nureksain Komoditi Bapok; Disperindag Provinsi Bali Maosang Aman Kantos Panguntat Warsa
- 15 Desember 2023
- 23:12 WITA
- News
DENPASAR,Balitopnews.com - Dinas Perindustrian dan Perdagangan Provinsi Bali mawali nyelehin kawentenan komoditi barang kebutuhan pokok miwah parsel. Ring galahe mangkin panureksan kalaksanayang ring Kota Denpasar, nemonin rahina Sukra (15 Desember 2023)
Pengawas Perdagangan Bidang Perlindungan Konsumen dan Tertib Niaga Disperindag Provinsi Bali, I Wayan Pasek Putra maosang pengawasan ring Kota Denpasar pinaka genah pinih untat pamargin panureksan saantukan sadurungnyane taler sampun kalaksanayang ring Kabupaten Klungkung miwah Badung. Dane ngawewehin yening pemantauan puniki kalaksanayang sajeroning nureksain kawentenan barang wiadin pabuat pokok nyanggra rahina Natal 2023 miwah warsa anyar 2024. Kebutuhan pokok sane katureksain minakadi bawang putih, bawang merah, beras, minyak goreng, tepung kantos adeng.
I Wayan Pasek Putra taler maosang saking panureksan sane kalaksanayang ring makudang pusat perbelanjaan, pasar modern wiadin pasar tradisional ring Kota Denpasar, kebutuhan bahan pokok kapanggihin kantun aman, mawit saking stok wiadin ring kawentenan rauhing ring distribusinyane. Dane maosang yening wenten serapan laporan saking para pedagang, wenten makudang pabuat pokok ring lapangan sane sampun sayan kidik stoknyane minakadi kedele. Parindikan puniki saantukan keterlambatan kapal-kapal sane makta kedele punika ka distributor. Nanging para pemasok bahan baku puniki setata mautsaha nagingin pabuat pasar pamekas nyanggra Nataru.
Tim pemantauan taler nureksain parsel sane kaadol ring Nataru. “Mapaiketan sareng parsel napi mawinan katureksain saantukan ring undang-undang taler kaunggahang yening konsumen patut ngamolihang barang sane katumbas anut sareng informasi ring parsel, saha barang punika nenten kantos kadaluarsa,” baos Pasek Putra.
Parindikan punika kaunggahang ring undang-undang yaitu UU Nomor 8 Tahun 1999 indik Perlindungan Konsumen, UU Nomor 7 Warsa 2014 indik Perdagangan, Permendag Nomor 69 Tahun 2018 indik Pengawasan Barang Beredar dan Jasa miwah Permendag Nomor 36 Tahun 2018 indik Pelaksanaan Pengawasan Kegiatan Perdagangan.
Saking panureksan sane kalaksanayang ring tigang Kabupaten minakadi Kabupaten Klungkung, Kabupaten Badung miwah Kota Denpasar kapastikayang yening kawentenan komoditi barang pabuat pokok kantun aman kantos ring pamuput warsane puniki. Indik pangarga kantun fluktuatif. Pangarga komoditi kebutuhan pokok kantun kapanggihin nincap saha nedunang nanging kawentenanane nenten signifikan. (Rls/Btnc)
Komentar