Matemu sareng GIPI Bali, Pj. Gubernur Mahendra Jaya Maosang Indik Pariwisata miwah Pungutan Wisman
- 02 Januari 2024
- 16:01 WITA
- News
DENPASAR,Balitopnews.com - Penjabat (Pj) Gubernur Bali S.M. Mahendra Jaya nyanggra pangrauh audiensi Ketua Gabungan Industri Pariwisata Indonesia (GIPI) Bali Ida Bagus Agung Partha Adnyana, Anggara (2/1/2024). Tiosan maosang makudang parindikan ring widang pariwisata, parikrama sane kalaksanayang ring Ruang Adi Sabha Kantor Gubernur Bali punika taler maosang indik tata titi sajroning ngambil pungutan wisatawan mancanegara (wisman) sane mawit kalaksanayang ring tanggal 14 Februari 2024.
Ring pangawit baosnyane, Ida Bagus Agung Partha Adnyana sane rauh kasarengin manggalaning asosiasi industri pariwisata sane maingkupan ring GIPI nguningayang indik optimisme majeng panglimbak pariwisata Bali ring warsa 2024. “Sakadi sane sampun ketah kauningin, perekonomian daerah Bali majanten akehan ngandelang pariwisata saha ring galahe mangkin kawentenane sampun becik. Titiang nureksain yening ring warsa 2024 puniki jagi sayan becik, nanging majanten sami mangda setata waspada,” baos anak lanang sane ketah kabaosang Gus Agung. Dane ngawewehin, pariwisata sane pinaka widang sane dangan keni iyusan kaon utawi rentan majanten mangda setata tangar majeng sahananing gatra sane wenten sakadi ring sokongan infrastruktur wiadin ring kahanan global sane kantun tegang kantos mangkin.
Salanturnyane, Gus Agung taler maosang indik pungutan wisman sane mawit kalaksanayang ring tanggal 14 Februari 2024 sane jagi rauh. Tiosan indik kejelasan mekanisme pemungutan, dane taler ngicen tetimbang indik jinah sane prasida kapupulang. Dane ngaptiang jinah sane prasida kapolihang taler kapidabdabin majeng parikrama sane pawesanannyane karasayang langsung olih wisatawan. “Yening ring Perda, majanten sampun kabaosang indik pabuat utawi pemanfaatannyane minakadi ngarepin pikobet luu wiadin penguatan budaya. Punika kantun abstrak saha durung prasida karasayang langsung olih wisatawan mancanegara,” baosnyane. Yening prasida antuk, Dane ngaptiang revisi Perda mangda prasida taler kabuatang majeng pabuat tiosan sakadi asuransi. Saantukan saking gatra sane kapolihang saking Bali Medical Tourism Association, wenten makudang kasus wisman nenten prasida naur prabea pengobatan ri kala sungkan utawi kecelakaan ri kala liburan ring Bali. “Saantukan nenten samian wisman madue asuransi saha yening mrasidayang mangda dana pungutan wisman taler kasisaang anggen nuku prabea punika,” baosnyane.
Tiosan ring Gus Agung, pimpinan asosiasi industri pariwisata sane maingkupan ring GIPI Bali taler antuk magilihan nguningayang makudang parindikan sane mapaiketan sareng pariwisata. Ketua ASITA Bali I Putu Winastra nguningayang yening organisasi sane kamanggalain antuk dane mewadahi 400 biro perjalanan. Ring galahe punika, Dane ngaptiang penataan sane sayan becik majeng Daerah Tujuan Wisata (DTW) sajeroning ngicen rasa degdeg majeng wisatawan. Ketua DPD Himpunan Pramuwisata Indonesia (HPI) Bali I Nyoman Nuarta ngaptiang mangda wenten penegakan hukum majeng kawentenan guide liar.
Pj. Gubernur Mahendra Jaya nguningayang rasa bagianyane saantukan prasida masadu ajeng sareng jajaran GIPI Bali. Satinut sareng Gus Agung, Pj. Gubernur Mahendra Jaya taler nureksain trend positif panglimbak pariwisata Bali. Dane nureksain, samian angga ngicen uratian ageng majeng widang pariwisata. Napi malih sakadi sane ketah kauningin Bali nenten madue sumber daya alam marupa tambang sakadi wewidangan tiosan. “Suksma aturang Titiang majeng jajaran GIPI Bali, saantukan pariwisata Bali prasida tumbuh sakadi puniki majanten sangkaning pangremba bapak ibu,” baosnyane. Pemprov Bali taler setata ngutsahayang nincapang kawentenan sarana prasarana pendukung pariwisata, silih tunggilnyane ring kawentenan transportasi minakadi pangrencana ngwangun LRT.
Indik pungutan wisman, Pemprov ngutsahayang mekanisme pinih becik mangda nenten ngaonang agar tak rasa degdeg utawi kenyamanan wisatawan sane rauh ka Pulo Dewata. Indik mekanisme pemungutan, Pemprov Bali sampun ngamikukuhang tigang pamargi. Pamargi kapertama, Pemprov Bali nyokong wisman mangda naur sadurung rauh ring Bali malarapan aplikasi Love Bali. Pamargi kaping kalih, Pemprov taler memfasilitasi pembayaran ring bandara. “Pamargi kaping tiga minakadi indik pembayaran sane kalaksanayang ri kala tamu rauh ring genahnyane marerepan. Ring pamargin ipun majanten jagi setata kalaksanayang evaluasi,” baosnyane.
Komentar