Pj. Gubernur Mahendra Jaya Nglaksanayang Kunjungan Kerja ring Dinas PMD Dukcapil Bali
- 04 Januari 2024
- 15:01 WITA
- News
DENPASAR,Balitopnews.com - Sesampun nglaksanayang kunjungan kerja ring Dinas Kesehatan Provinsi Bali, Penjabat (Pj) Gubernur Bali S.M Mahendra Jaya kasarengin Kepala Inspektorat Provinsi Bali Wayan Sugiada salanturnyane rauh ring Dinas Pemberdayaan Masyarakat, Desa, Kependudukan dan Pencatatan Sipil (PMD Dukcapil) Provinsi Bali rahina Wraspati (4 Januari 2024) sore.
Pangrauh Pj. Mahendra Jaya kasanggra langsung Kepala Dinas PMD Dukcapil Provinsi Bali Putu Anom Agustina, Sekretaris Dinas PMD Dukcapil Provinsi Bali Nyoman Suyastini miwah pejabat tiosan.
Ring galahe punika, Mahendra Jaya ngaturang suksma antuk utsaha ageng saking Dinas PMD Dukcapil salami warsa 2023. Dane ngaptiang, ring warsa 2024 capaian sane sampun becik mangda setata kauratiang.
"Titiang ngaturang suksma majeng Pak Kadis miwah staf tiosan. I raga prasida nglintangin warsa 2023 antuk sakancan pakibeh, pikobet miwah sakancan pamikolih sane sampun prasida kapolihang. Napi sane sampun kapolihang ring warsa 2023, majanten ring warsa 2024 taler prasida kapikolihang, bilih-bilih prasida katincapang malih," Baosnyane.
Tiosan punika, kunjungan kerja Pj. Gubernur Mahendra Jaya taler sajeroning nguningin parikrama sane sampun kalaksanayang ring warsa 2023 miwah program kerja sane jagi kalaksanayang olih PMD Dukcapil mawinan prasida ngamolihang prestasi sane dahat becik ring warsa 2024.
"Napi sane sampun kapolihang mangda setata katitenin becik. Ring salanturnyane, napi sane muatang penguatan mangda kaulengang mawinan pamikolihnyane sayan becik. Titiang ngajiang becik napi sane sampun kapolihang desa-desa ring Bali sane sampun ngamolihang penghargaan wiadin prestasi tiosan," Baosnyane.
Kadis PMD Dukcapil Provinsi Bali Putu Anom Agustina ngaturang suksma antuk pangrauh Pj. Gubernur Bali.
"Titiang rumasa bagia Bapak sweca ledang rauh ring kantor puniki. Pangrauh Bapak, Titiang aptiang mangda prasida ngicen semangat sajeroning nglaksanayang amongannyane ring benjang pungkur," Baos Anom.
Tiosan punika, Anom Agustina ring galahe punika taler nguningayang makudang-kudang laporan minakadi, kapertama indik pamargin program/parikrama warsa 2023. Kaping kalih indik pikobet saha pamargi mapaiketan sareng program/parikrama warsa 2023. Kaping tiga, capaian Indeks Desa Membangun (IDM) miwah pembentukan BUMDESA ring Provinsi Bali kantos ring warsa 2023. Kaping pat, indik pangrencana pamargin program/parikrama ring warsa 2024.(Rls/Btnc)
Komentar