Ngunggahang Unteng Kebhinekaan, Pj. Ketua TP PKK Provinsi Bali Ngajiang Becik Lomba Gerak Tari miwah Lagu LPP RRI Denpasar
- 06 Januari 2024
- 21:01 WITA
- News
DENPASAR,Balitopnews.com - Pj. Ketua Tim Penggerak PKK Provinsi Bali, Ny. Ida Mahendra Jaya ngrauhin grand final lomba gerak tari miwah lagu sane kalaksanayang olih LPP RRI Denpasar magenah ring auditorium RRI Denpasar ring rahina Sukra (6 Januari 2024) siang. Wenten tigang soroh pacentokan minakadi lomba lagu, fashion show miwah tari kreasi dadong rerod.
Ny. Ida Mahendra Jaya maosang yening Dane ngajiang becik pamargin parikrama puniki. Napi malih ngunggahang unteng harmonisasi dalam kebhinekaan, dane nureksain yening unteng punika prasida nincapang karumaketan saha toleransi pantaraning krama ring Provinsi Bali. “Ngiring sareng-sareng masikian saha nyaga keberagaman puniki, saling ngajiang, saling bertoleransi saha saling sokong,” baosnyane.
Majeng ring pamilet lomba, Dane ngaturang suksma sampun nyarengin ngramianin lomba. Dane ngaptiang mangda samian prasida misuguhang sane pinih becik, nenten beban saha nenten uleng ring pamikolihnyane kewanten.
Kepala LPP RRI Denpasar, Joko Purnomo maosang yening parikrama puniki pinaka silih tunggil cihna sinergitas LPP RRI Denpasar sareng makudang institusi wiadin angga tiosan rumasuk sareng Tim Penggerak PKK Provinsi Bali. Dane ngaptiang sinergitas puniki setata kalanturang malarapan antuk kerjasama tiosan.
Ring galahe punika Ny. Ida Mahendra Jaya sareng ngramianin parikrama malarapan antuk nyumbang lagu sane mamurda ‘Aku Makin Cinta’ sane kapopulerang olih Vina Panduwinata. Tiosan punika istri Pj. Gubernur Bali puniki taler nyarengin fashion show sareng uleman sane tiosan.(Rls/Btnc)
Komentar