Sekda Dewa Indra Nrima Asil Penilaian Kepatuhan Penyelenggaraan Pelayanan Publik saking Ombudsman
- 08 Januari 2024
- 17:01 WITA
- News
DENPASAR,Balitopnews.com – Ring panguntat warsa, Pemprov Bali ngamolihang anugerah Penilaian Kepatuhan Penyelenggaraan Pelayanan Publik kategori tingkat Pemerintah Provinsi, Ombudsman Provinsi Bali nyukserahang Asil miwah Piagam Penghargaan Penyelenggaraan Pelayanan Publik Warsa 2023 sane katerima langsung olih Sekretaris Daerah (Sekda) Provinsi Bali Dewa Made Indra, magenah ring Ruang Rapat Sekda, Kantor Gubernur Bali, Denpasar, rahina Soma (8 Januari 2024)
Sekda Dewa Indra ngajiang becik antuk pamikolih punika, saha matur suksma majeng Ombudsman sane pinaka mitra Pemprov Bali antuk prakanti becik sane kamargiang salami puniki. Dane ngaptiang mangda samian angga nenten rumasa waneh saha lenga sangkaning pamikolih becik puniki, nanging mangda prasida kaanggen motivasi mangda prasida sayan becik, utaminipun ring widang pelayanan publik.
Dane taler ngaptiang mangda ring salanturnyane panureksan mangda nenten kalaksanayang ring makudang OPD kewanten, nanging samian OPD, mangda kualitas pelayanan Pemprov Bali sayan becik. “Yening ngranjing kategori pelayanan majanten akeh wenten UPT, yening ring widang administrasi majanten samian OPD prasida katureksain. Mawinan samian OPD prasida midabdabin angga,” baosnyane.
Dane taler ngajiang becik kawentenan Ombudsman sane sampun ngicen kajian majeng Desa Adat. Manutnyane Dinas Pemajuan Desa Adat sane kasayubin antuk Kepala Dinasnyane sampun ngamargiang langsung kajian punika. “MDA ring institusional pinaka dinas sane anyar, saha kawentenane majanten durung lincah sakadi dinas tiosan. Mawinan masukan-masukan majanten dahat kabuatang. Nanging, titiang ngajiang MDA sane sampun digelis nampenin kajian Ombudsman,” baosnyane.
Ketua Ombudsman RI Perwakilan Provinsi Bali Ni Nyoman Sri Widhiyanti nguningayang samian penilaian Kepatuhan Penyelenggaraan Publik warsa 2023. Manutnyane ring warsa sane sampun lintang wenten tigang OPD sane katureksain minakadi Dinas Pendidikan antuk skor 95.56, Dinas Penanaman Modal dan Pelayanan Terpadu Satu Pintu antuk skor 96.39, miwah RSUD Bali Mandara antuk skor 97.43. “Mawinan skor samian majeng Pemprov Bali minakadi 96.46, antuk kategori A miwah opini Kualitas Tertinggi,” baosnyane. Antuk pamikolih punika, Pemprov Bali ngamolihang peringkat ka-3 kategori Pemerintah Provinsi.
Dane taler maosang yening makudang tetimbang wiadin pangranjingan saking Pemprov Bali jagi kauningayang ring Ombudsman Pusat. Mapaiketan sareng kajian Desa Adat, Dane taler ngajiang becik Dinas PMA sane antuk digelis ngelaksanayang kajian. “Tanggal 28 Agustus 2023 jagi kasukserahang kajiannyane majeng Dinas PMA, miwah 22 November 2023 asil kajian sane marupa SOP kantos sosialisasi asil Pesamuhan Agung sampun kamargiang sami. Titiang ngajiang becik pisan pidabdab gelis sane kaambil Pemprov Bali,” baosnyane.
Parikrama rahina semeng punika taler karauhin olih Asisten Pemerintahan dan Kesra Setda Prov Bali I Dewa Gede Mahendra Putra, Kepala Dinas Pemajuan Desa Adat I.G.A.K. Kartika Jaya Saputra, Kepala Dinas Pendidikan Kepemudaan. dan Olahraga Provinsi Bali, Dr. KN Boy Jayawibawa, miwah Dirut RSBM dr. Ketut Suarjaya.(Rls/Btnc)
Komentar