Sekda Dewa Indra Ngaptiang Ngwigunayang Teknologi sajeroning Nyokong Pariwisata Berkelanjutan
- 11 Januari 2024
- 21:01 WITA
- News
BADUNG, Balitopnews.com - Panglimbak teknologi ring sakancan widang kauripan ring samian panegara ngawinang samian sarwi dangan saha nyokong panglimbak sakancan inovasi. Nanging panglimbak teknologi sane wenten mangda kawigunayang antuk wicaksana nganggen konsep keberlanjutan, pamekas sajeroning nglimbakang widang pariwisata. Parindikan punika kabaosang Sekretaris Daerah Provinsi Bali Dewa Made Indra sajeroning sambrama wacanannyane ri kala mungkah Asia Pacific Tourism, Hospitality Summit & Digital Brand Award 2024 ring Pecatu Hall BNDCC Nusa Dua, Kabupaten Badung, Wraspati (11 Januari 2024).
Napi sane kabaosang olih Sekda Dewa Indra punika mapaiketan sareng tetiga unteng bebaosan ageng sane kabaosang sajeroning parikrama Asia Pacific Tourism, Hospitality Summit & Digital Brand Award 2024 minakadi teknologi bidang pariwisata, investasi pariwisata miwah pariwisata berkelanjutan.
Dane taler maosang, panglimbak industri pariwisata sane kacihnayang antuk panincap pangrauh wisatawan minakadi wisatawan domestik wiadin duranegara sane majanten dados pakibeh majeng Bali sajeroning nyayubin kawentenan budaya wiadin nyayubin kalestarian palemahan. Sajeroning ngarepin pakibeh punika, krama Bali ngamel becik filosofi sane kabaos Tri Hita Karana. Dane maosang, kearifan lokal sane kantun kagamel krama Bali majanten dahat ngwantu sajeroning nyayubin kawentenan budaya wiadin palemahan Bali. Dane maosang Tri Hita Karana pinaka tigang parindikan sane prasida ngardi kahanan bagia, keselarasan wiadin keseimbangan ring kauripan puniki. Makatiga parindikan punika minakadi kahanan adung pantaraning manusa sareng Sang Hyang Widi (Parahyangan), manusa sareng manusa (Pawongan) wiadin manusa sareng lingkungan (Palemahan). “Puniki pinaka katatwan sane dados dasar kauripan krama Bali. Punika mawinan, sira ugi sane rauh ka Bali jagi ngrasayang kahanan degdeg saha bagia,” baosnyane.
Dewa Indra ngaturang rahajeng rauh ring Pulo Dewata majeng samian pamilet ring parikrama puniki. Dane taler ngaturang suksma majeng angga prawartaka acara sane sampun milih Bali pinaka tuan rumah. Manutnyane parindikan puniki pinaka sarana promosi sane dahat mawiguna majeng wewidangan Bali. “Puniki nyihnayang yening Bali nenten pinaka genah pariwisata kewanten sane ngadautin kayun, nanging taler becik kaanggen genah patemon wiadin bisnis,” baosnyane sinambi ngaptiang mangda vibrasi Bali ngicen iyusan becik majeng para pamilet mawinan parikramane puniki sayuwakti ngicen pawesana becik majeng panincap pariwisata. Ring pamuput sambrama wacanannyane, Sekda Dewa Indra nyarengang samian pamilet mangda nyelagang galahnyane sajeroning ngrauhin makudang genah wisata sane wenten ring Bali.
Menteri Pariwisata dan Ekonomi Kreatif RI Sandiaga Salahuddin Uno sajeroning panlatarannyane maosang indikator masa depan pariwisata banget mapaiketan sareng gaya hidup berkelanjutan. Indikator punika minakadi, konsumsi sane bertanggung jawab, perencanaan sane berkelanjutan, mobilitas sane berkelanjutan, daur ulang miwah ngirangin nganggen plastik, ketahanan pangan miwah ngardi generasi ramah lingkungan. Sangkaning punika, Kemenparekraf RI sampun ngamedalang makudang program inisiatif sakadi pedoman pengelolaan sampah plastik ring objek wisata bahari, ngicen sertifikat majeng destinasi wisata wiadin desa wisata, implementasi penggunaan sumber energi terbarukan, ngicen penghargaan majeng desa wisata miwah program tiosan sajeroning ngardi konsep pariwisata berkelanjutan.
Patut kauningin, Asia Pacific Tourism, Hospitality Summit & Digital Brand Award 2024 sane kabungkah olih Menparekraf Sandiaga Uno pinaka parikrama sane kalaksanayang kapertama malarapan antuk prakanti pantaraning Kemenparekraf RI sareng Enhaiier Corporation.
President Director Enhaiier Irmansjah Madewa sajeroning atur piuningnyane maosang yening parikrama puniki maosang indik tetiga bebaosan utama minakadi teknologi bidang pariwisata, investasi pariwisata miwah tourism sustainability. “Teknologi miwah investasi kapatutang mangda prasida adung sareng palemahan mawinan prasida nyaga kalestarian palemahan pinaka silih tunggil parindikan sane dahat mabuat sajeroning nyokong widang pariwisata,” baosnyane. Dane ngawewehin, parikrama sane kalaksanyang salami kalih rahina puniki kadagingin antuk makudang parikrama sakadi open booth, table top, live streaming, flash sale, tourism product, makan malam miwah penganugerahan penghargaan. Pamilet sane nyarengin parikrama minakadi mawit saking CEO, general manager bidang pariwisata wiadin perhotelan, komunitas intelektual, akademisi bidang pariwisata wiadin perhotelan ring Indonesia wiadin pejabat sane ngangganin makudang-kudang widang pariwisata dan perhotelan.(Rls/Btnc)
Komentar