Pemerintah Provinsi Bali mawali Ngamolihang Predikat Sangat Baik sajeroning Evaluasi SPBE Warsa 2023
- 14 Januari 2024
- 22:01 WITA
- News
DENPASAR,Balitopnews.com - Pemerintah Provinsi Bali mawali ngamolihang predikat "Sangat Baik" sajeroning evaluasi penyelenggaraan Sistem Pemerintahan Berbasis Elektronik (SPBE) warsa 2023. Indeks SPBE Pemerintah Provinsi Bali taler nyihnayang panincap ageng, nincap saking 3,68 ring warsa 2021 dados 4,07 saking skala 5,0 poin tertinggi ring warsa 2023. Penetapan puniki kauningayang malarapan antuk Keputusan Menteri Pendayagunaan Aparatur Negara dan Reformasi Birokrasi Republik Indonesia Nomor 13 Warsa 2024, sane kaumumang daweg rahina Sukra, 12 Januari 2024.
Prestasi puniki taler karuntutin olih tigang Pemerintah Daerah tiosan ring Bali, sane taler ngamolihang prestasi antuk predikat "Sangat Baik," minakadi Pemerintah Kota Denpasar (Indeks SPBE 3,80), Pemerintah Kabupaten Tabanan (Indeks SPBE 3,77) miwah Pemerintah Kabupaten Badung (Indeks SPBE 3,66). Majeng Pemerintah Buleleng (Indeks SPBE 3,45), Pemerintah Kabupaten Jembrana miwah Gianyar (Indeks SPBE 3,14), majeng Pemerintah Kabupaten Klungkung (Indeks SPBE 3,02) ngamolihang predikat "Baik." Pemerintah Pemerintah Kabupaten Bangli (Indeks SPBE 2,48) miwah Kabupaten Karangasem (Indeks SPBE 2,30) ngamolihang predikat "Cukup."
“Indeks SPBE sane ageng pinaka indikator mabuat sajeroning tata kelola pemerintahan sane bersih, efektif, transparan, miwah akuntabel. Indeks puniki taler mapaiketan sareng peningkatan kualitas layanan publik malarapan pamargin sistem pemerintahan berbasis elektronik,” baos Sekretaris Daerah Provinsi Bali Dewa Made Indra sajeroning siaran persnyane ring Denpasar, Redite (14/1).
Evaluasi puniki ngingkupin papat domain utama, minakadi Kebijakan, Tata Kelola, Manajemen, miwah Layanan, minakadi kutus aspek miwah 47 indikator penilaian. Kutus aspek puniki minakadi Kebijakan Tata Kelola miwah Perencanaan Strategis SPBE, Tata Kelola TIK miwah Penyelenggara SPBE, Manajemen Penerapan SPBE miwah Audit TIK rauhing tingkat penyelenggaraan Layanan Administrasi Pemerintahan miwah Layanan Publik Berbasis Elektronik.
“Pamikolih puniki nyihnayang kolaborasi sane adung pantaraning instansi ring Pemerintah Provinsi Bali, miwah kawentenan pengawasan rauhing evaluasi sane berkelanjutan,” baos Sekda Dewa Indra
Tiosan punika, Pemerintah Provinsi Bali sampun prasida taler nglaksanayang integrasi layanan antuk makudang entitas, rumasuk Layanan Pemerintah Pusat, sakadi Satu Data Indonesia, Sistem Informasi Pembangunan Daerah (SIPD), miwah Layanan Aspirasi miwah Pengaduan Online Rakyat (LAPOR!). Tiosan punika, layanan kepegawaian sane terintegrasi antuk platform digital manajemen ASN (SI ASN) taler pinaka pahan sane ngawinang mapikolih. Bali taler ngwangun kanti sareng Pusat Data Nasional (PDN) sajeroning ngawigunayang sabecik-becikne infrastruktur wiadin layanan sane wenten.
Penerapan Layanan Single Sign-On (SSO) ring Pemerintah Provinsi Bali taler kaangkenin pinaka best practice, saha dados acuan majeng makudang Pemerintah Daerah ring Indonesia. Rauh mangkin, sampun wenten 57 layanan digital sane terintegrasi ring SSO, antuk langkungan saking 33 tali pengguna sane sampun terdaftar, rumasuk Pemerintah Provinsi Bali, Pemerintah Daerah ring Kabupaten/Kota ring Bali, 1.500 Desa Adat ring Bali, makudang fasilitas kesehatan ring Bali, wiadin makudang Instansi Pusat/Vertikal ring Bali. Pamargin puniki sampun ngadautin makudang instansi tiosan ring Indonesia sajeroning nglaksanayang studi tiru ring Bali. Minakadi Pemerintah Provinsi Jawa Barat sane kadaut nglaksanayang Sistem Penghubung Layanan Pemerintah (SPLP) miwah mekanisme Layanan SSO ring Bali mangda prasida kamargiang ring wewidangannyane. Napi malih, program Happy Digital X olih Tsinghua University ring United in Diversity Bali Campus (UIDBC) ngranjingang penerapan Layanan SSO sane terintegrasi sareng Layanan Kepegawaian ring Bali pinaka silih tunggil benchmarking sajeroning nglaksanayang penerapan layanan sane pateh ring Pemerintah Daerah tiosan, rumasuk Pemerintah Kabupaten Sumedang.
Evaluasi Sistem Pemerintahan Berbasis Elektronik warsa 2023 nyarengang 621 Instansi Pusat miwah Pemerintah Daerah, antuk paletan evaluasi sane kakawitin saking Juni 2023. Pamarginnyane ngingkupin sosialisasi, penilaian mandiri, penilaian interviu, miwah penilaian visitasi secara selektif. Penilaian mandiri kalaksanayang antuk intensitas tinggi sane nyarengang samian unit Perangkat Daerah ring Pemerintah Provinsi Bali. Salanturnyane, penilaian interviu kalaksanayang antuk daring tanggal 26 September 2023 sane kapucukin langsung olih Sekretaris Daerah Provinsi Bali, Dewa Made Indra, magenah ring Ruang SPBE Dinas Komunikasi, Informatika dan Statistik Provinsi Bali antuk partisipasi samian Perangkat Daerah Pemerintah Provinsi Bali.
Sekda Dewa Indra maosang prestasi antuk Indeks SPBE sane agengnyane 4,07 majanten nenten pinaka apresiasi kewanten, nanging taler dados tantangan majeng samian Unit Perangkat Daerah ring Pemerintah Provinsi Bali wiadin Pemerintah Daerah tiosan.
“Pemerintah setata mautsaha nincapang kualitas pelayanan publik malarapan perbaikan kebijakan, tata kelola sane efisien, manajemen SPBE sane berkualitas, miwah pemantauan saha evaluasi sane nenten surud-surud. Malarapan antuk punika, Indeks SPBE kaaptiang dadis parindikan mabuat sajeroning ngardi tata kelola pemerintahan sane bersih, efektif, transparan, miwah akuntabel majeng samian Instansi Pusat wiadin Pemerintah Daerah ring Indonesia,” baosnyane.(Rls/Btnc)
Komentar