Masadu Ajeng Sareng Pj. Gubernur Bali, BSWA Maosang Keberatan Pengenaan Pajak Hiburan 40-75 Persen
- 15 Januari 2024
- 22:01 WITA
- News
DENPASAR - Pengusaha sane maingkupan ring Bali Spa & Wellness Association (BSWA) sane kasayubin PHRI Bali nguningayang nenten cumpunyane indik pengenaan pajak hiburan 40 – 75 persen sane kaunggahang sajeroning Undang-Undang Nomor 1 Warsa 2022 indik Hubungan Keuangan pantaraning Pemerintah Pusat sareng Pemerintah Daerah (HKPD). Parindikan punika kabaosang Ketua BPD PHRI Bali Prof. Tjokorda Oka Artha Ardhana Sukawati (Cok Ace) sane rauh masadu ajeng sareng Pj. Gubernur Bali S.M Mahendra Jaya kasarengin angga pengurus BSWA Bali, Soma (15 Januari 2024)
Ketua PHRI Bali Cok Ace nuekang yening amanat UU sane ngranjingang usaha mandi uap/Spa pinaka hiburan. Saantukan manutnyane, Spa sane nglimbak ring Bali madue caciren sane matiosan, saha sampun kaangkenin ring WTO pinaka usaha ring widang kesehatan. Cok Ace sane sampun dados Ketua PHRI Bali selami petang periode puniki taler maosang indik wiwilan kawentenan BSWA sane mawit saking pengusaha Spa & Wellness ring Pulo Dewata. Kawentuk daweg warsa 2002, organisasi puniki wenten sajeroning nambakin panampen kaon majeng kawentenan panti pijat. Ri kala wau kawentuk, BSWA Bali anggotanyane 13 pengusaha saha setata maweweh saha sane mangkin antuk 185 anggota. “Ring panincap kawentenan anggota, BSWA setata mautsaha nincapang kualitas layanan malarapan pelatihan SDM mawinan usaha Spa ring Bali prasida ngamolihang penghargaan,” baosnyane.
Wakil Gubernur Bali Periode 2018-2023 puniki ngawewehin, usaha Spa sane nglimbak ring Pulo Dewata majanten matiosan kawentenane saantukan irika madaging misi penggalian miwah pengembangan potensi lokal ‘boreh Bali’. “Antuk ngawigunayang potensi miwah kearifan lokal, Spa puniki jagi setata kasenengin olih wisatawan,” baosnyane. Anut sareng panglimbaknyane, widang usaha puniki sayan akeh ngambil pamikarya miwah BSWA Bali anggotanyane sampun wenten roras tali terapis. Napi malih ri kala rauh ka Polandia, Cok Ace ngamolihang gatra yening 337 terapis Bali makarya ring panegara punika. “Punika nyihnayang yening usaha puniki muatang pamikarya sane akeh saha prasida nyokong PDRB Bali,” baosnyane.
Tokoh Puri Ubud puniki taler ngambil pamiteges saking WTO sane maosang yening Spa sane nglimbak ring Bali linier sareng usaha kesehatan, nenten pinaka hiburan. “Saantukan Spa ring Bali majanten matiosan sareng spa ring wewidangan tiosan,” baosnyane. Sangkaning punika, anggannyane nenten cumpu yening usaha Spa ring Bali keni pajak hiburan 40-75 persen. BSWA Bali taler sampun ngambil pangupaya ngajuang judicial review majeng Undang-Undang Nomor 1 Warsa 2022. “Judicial review sampun kaajuang ring 5 Januari saha kacatat sampun wenten 22 pemohon, rumasuk pengusaha saking dura Bali,” baosnyane. Anut sareng proses pengajuan judicial review, ring galah nampek puniki PHRI sareng BSWA Bali jagi nglaksanayang FGD maosang indik pro kontra pamargin UU Nomor 1 Warsa 2022 sane rencanannyane jagi ngrauhang Menparekraf miwah Menteri Keuangan RI. Mapaiketan sareng keberatan BSWA, Cok Ace banget ngaptiang sokongan saking Pj. Gubernur Bali.
Pj. Gubernur Mahendra Jaya prasida ngrasayang sapunapi rasa osah BSWA miwah PHRI Bali indik pamargin pajak hiburan 40-75 persen, sane ngingkupin usaha mandi uap/Spa. Satinut sareng Ketua PHRI, Mahendra Jaya taler nureksain yening Spa sane wenten ring Bali mapaiketan sareng pengembangan potensi sumber daya lokal. Sangkaning punika, Dane ngajiang becik pidabdab hukum sane kamargiang BSWA Bali malarapan antuk ngajuang judicial review majeng Undang-Undang Nomor 1 Warsa 2022. Nanging, pararel sareng pidabdab punika, Mahendra Jaya taler ngaptiang mangda PHRI miwah BSWA Bali ngajuang permohonan insentif fiskal sane salanturnyane jagi kaunggahang ring Peraturan Kepala Daerah. Manutnyane pidabdab punika kaunggahang sajeroning pasal 101 UU Nomor 1 Warsa 2022 sane maosang yening gubernur/bupati/walikota prasida ngicen insentif fiskal majeng pelaku usaha ring wewidangannyane sajeroning nyokong kawijakan kemudahan berinvestasi. “Judicial review mamargi, pengajuan insentif fiskal taler mangda kalaksanayang. Ring salanturnyane Titiang jagi nyokong pemerintah kabupaten/kota sane madue amongane punika,” baosnyane.
Patemon sareng PHRI Bali taler kawigunayang olih Pj. Gubernur Mahendra Jaya sajeroning ngaptiang sokongan sajeroning pamargin pungutan majeng wisman sane mawit kamargiang ring tanggal 14 Februari 2024. Sokongan PHRI Bali dahat kabuatang saantukan Pemprov Bali jagi nincapang pungutan ri kala tamu rauh ring hotel genahnyane marerepan. Kakalih pamargin pembayaran sane tiosan minakadi, wisman prasida naur sadurung rauh ring Bali malarapan antuk aplikasi Love Bali wiadin naur ring bandara.
Ring patemon punika, Ketua PHRI Bali Cok Ace rauh kasarengin Sekjen PHRI Ferry Markus, Pembina BSWA Regina Winkler, Wakil Ketua BSWA Feny Sri Sulistiawati miwah makudang angga pengurus tiosan. Pj. Gubernur Mahendra Jaya kasarengin Kepala Dinas Pariwisata Tjok Bagus Pemayun miwah Kepala Bapenda Bali I Made Santha.(Rls/Btnc)
Komentar