Sekda Dewa Indra: Pamikolih RPJPD Bali Warsa 2005-2025 Becik saha Langkungan ring Rata-Rata Nasional
- 16 Januari 2024
- 21:01 WITA
- News
DENPASAR, Balitopnews.com - Sekretaris Daerah (Sekda) Provinsi Bali Dewa Made Indra maosang yening Target Rencana Pembangunan Jangka Panjang Daerah (RPJPD) warsa 2005-2025 ring kahanan makro sampun kapikolihang, napi malih agengnyane langkungan ring rata-rata nasional.
Parindikan punika kabaosang ri kala ngicen sambrama wacanan ngangganin Pj. Gubernur Bali S.M. Mahendra Jaya ri kala pamargin parikrama Kunjungan Kerja Komite IV DPD RI, mapaiketan sareng pamargin Pengawasan atas Pelaksanaan Undang-Undang Nomor 17 warsa 2007 indik Rencana Pembangunan Jangka Panjang Nasional 2005-2025, magenah ring Gedung Wiswa Sabha Utama, Kantor Gubernur Bali, Denpasar rahina Anggara (16/1).
“Target makro pertumbuhan ekonomi salami siyangolas warsa kakirangan masa Covid-19 puniki majanten sampun prasida kapolihang. Sajabaning masa Covid saantukan punika nenten prasida kaluputang sangkaning pakibeh jagat,” baosnyane ring parikrama sane taler karauhin olih Manggalaning DPD RI Dr. H. Mahyudin, S.T., M.M, Manggala MPR RI Prof. Fadel Muhammad, Wakil Ketua Komite IV Fernando Sinaga, S.Th., miwah Koordinator Tim/Prov. Bali Dr. Made Mangku Pastika, M.M.
Birokrat saking Desa Pemaron, Buleleng punika maosang yening inflasi ring Bali sawetara salami kalih dasa warsa puniki prasida kaarepin. “Sajabaning daweg sesampun Covid-19, saantukan pariwisata wau kabungkah saha daya beli kramane majanten nincap sane ngawetuang inflasi. Nanging ring warsa 2023 inflasi mawali prasida kakendaliang,” baosnyane. Tiosan punika, angka sane becik taler karuntutin antuk Indeks Gini Ratio, sane prasida kapanggihin saking ketimpangan ring Bali doh saking angka Nasional.
Dane ngawewehin yening tingkat kemiskinan ring Bali doh saking Nasional. Manutnyane kemiskinan nenten prasida kaluputang saantukan wenten kahanan fisik taler ngicen pawesana. Sakadi kawentenan krama disabilitas wiadin demografi. Indik kemiskinan ekstrim sane nincap ring pungkuran puniki manutnyane yening ring Bali nenten banget ageng kawentenannyane.
Mapaiketan indik makudang-kudang parindikan sane nedunang sakadi ring widang peternakan, perikanan wiadin pertanian, Dane ngangkenin yening wenten makudang produksi sane nedunang. Nanging wenten indikator tiosan sane taler sandang uratian sakadi nilai tukar petani sane kakantenang becik. “Produksi nedunang nanging karuntutin antuk panincap nilai tukar petani, mawinan parindikan punika prasida ngimbangin,” baosnyane.
Wakil Ketua Komite IV DPD RI Fernando Sinaga maosang indik Rencana Pembangunan Jangka Panjang Nasional (RPJPN) pinaka dokumen perencanaan pembangunan nasional majeng periode 20 warsa sane madue tetujon makarya rancangan sistem perencanaan pembangunan nasional sane kalaksanayang madasar antuk asas umum penyelenggaraan negara. Manutnyane RPJPN taler dados geguat majeng Kepala Daerah sajeroning nyusun RPJPD. Dane taler ngawewehin yening pikobet sane wenten ring Indonesia sane dados uratian ageng saking DPD RI Komisi IV minakadi tingkat kemiskinan sane kantun ageng, pendapatan negara sane kantun menengah miwah kesenjangan pembangunan ring daerah.
Pimpinan DPD RI Mahyudin nuekang RPJPN mangda prasida ngutsahayang pabuat daerah sane durung prasida kamargiang, mawinan ring galahe puniki kaaptiang aspirasi daerah Bali prasida kadagingin. Parindikan sane pateh taler kabaosang olih Anggota DPD Dapil Bali Made Mangku Pastika sane taler ngaptiang mangda parikrama puniki prasida ngambil daging pikayun widin aspirasi komprehensif sane kabuatang majeng pewangunan Bali.
Komentar