Pj. Gubernur Bali Mahendra Jaya Ngajiang Becik Uratian Krama Bali Nglaksanayang Bakti Sosial Ngrombo
- 19 Januari 2024
- 21:01 WITA
- News
DENPASAR,Balitopnews.com - Pj. Gubernur Bali S.M Mahendra Jaya ngajiang becik kawentenan parikrama Bakti Sosial Ngrombo sane kapikamkam Badan Kesatuan Bangsa dan Politik Provinsi Bali pinaka silih tunggil pangupaya ngarepin kawentenan krama tuara. Parikrama bakti sosial Ngrombo sane nyarengang 601 organisasi masyarakat se-Bali miwah sampun kalaksanayang ping 32 selami 2023 dados parikrama sane patut kalanturang satunggil warsa. Parindikan punika kabaosang ri kala ngrauhin Bakti Sosial Ngrombo ring Genah Parkir Kantor Badan Kesatuan Bangsa dan Politik Provinsi Bali, Sukra (19 Januari 2024)
Ring galahe punika, Pj. Gubernur Bali, Mahendra Jaya ngaptiang mangda parikrama bakti sosial ngrombo setata kalanturang. “I raga patut mangrastiti saantukan prasida nglintangin warsa 2023, sane majanten akeh kaarepin antuk pakibeh. Nanging antuk kawentenan bapak ibu sane urati majeng anak tiosan sane muatang wantuan, titiang rumasa bagia, saha ngaturang suksma dahat. Antuk sayan akehnyane krama sane urati saha lascarya, majanten titiang nenten sengsaya jagi prasida nglintangin satunggil ujian sane wenten satunggil warsa. Antuk semangat wiadin karumaketannyane, titiang taler ngaptiang mangda samian angga ring Bali, mangda setata nyaga karumaketan saha katreptian wewidangan ring tahun politik kadi mangkin. Titiang ngaptiang samian angga prasida nyanggra pesta demokrasi, antuk nenten ngawigunayang pabinayan sane wenten sajeroning ngawetuang byuta,” baosnyane.
Mahendra Jaya taler ngawewehin, mangda samian angga prasida dados cooling system, ri kala wenten pitungkas ring tengah pabinayan sane wenten. Nglanturang daging kawijakan saking Presiden RI, saantukan manut titiang, i raga sane sampun mardika selami 78 warsa saha maurip ring Bali, pinaka genah wisata, majanten nenten adil majeng kramane sane kantun tuara, napi malih kantun keni pikobet stunting rauhing kemiskinan ekstrim.
Kepala Badan Kesatuan Bangsa dan Politik Provinsi Bali, I Gusti Ngurah Wiryanata maosang yening Badan Kesatuan Bangsa dan Politik Provinsi Bali ring Warsa 2023 sampun nglaksanayang “Bakti Sosial Ngrombo" kasarengin Organisasi Kemasyarakatan, Yayasan, Komunitas wiadin Paguyuban Etnis sajeroning nees kawentenan kemiskinan ekstrim ring wewidangan Provinsi Bali sampun kalaksanayang ping 32 . Parikrama ngrombo puniki kauelengang majeng krama tuara, miskin ekstrem, disabilitas wiadin yatim piatu ring 9 Kabupaten/Kota se-Bali sane kalaksanayang satunggil rahina Sukra semeng. Ring warsa 2024, Badan Kesbangpol Provinsi Bali kasarengin 87 organisasi masyarakat mawali nglaksanayang Bakti Sosial Ngrombo sane kaping 33, antuk ngicen sumbangan marupa 2 kursi roda, 7 paket wantuan uang sekolah anak yatim piatu, 1 paket wantuan modal usaha, 61 paket bantuan sembako, miwah wantuan marupa ajengan, minuman, tas sekolah wiadin barang tiosan, sane akehnyane sami Rp29.678.000.
Saking pangawit kantos mangkin pamargin bakti sosial Ngrombo, sumbangan saking Organisasi Kemasyarakatan, Yayasan, Komunitas wiadin Paguyuban Etnis minakadi marupa paket sembako, kursi roda, uang sekolah, voucher belanja, makudang soroh ajeng-ajengan wiadin sane tiosan akehnyane Rp 825 yuta langkung.
Sesampune ngrauhin Bhakti Sosial Ngrombo, ring genah parkir Kantor Badan Kesatuan Bangsa dan Politik Provinsi Bali, Penjabat Gubernur Bali Mahendra Jaya taler nureksain kasiagayan anggota Satuan Polisi Pamong Praja, sane ring galahe mangkin ngawewehin anggota Satpol PP Pariwisata. Dane mapakeling mangda Satuan Polisi Pamong Praja setata ngutamayang parilaksana humanis sajeroning ngarepin pamurug ring lapangan, saantukan ring penindakan majanten sampun wenten sane ngamongin. "Mangda sampunang kantos Satuan Polisi Pamong Praja dados meseh kramane, nanging becikan manados sawitran krama antuk nyayubin krama madasar antuk parilaksana sane tegas miwah mendidik,” baosnyane.(Rls/Btnc)
Komentar