Ngrauhin Peresmian Kantor Konjen Timor Leste, Sekda Dewa Made Indra Ngaptiang Kerjasama Widang Pendidikan miwah Kesehatan
- 19 Januari 2024
- 10:01 WITA
- News
DENPASAR,Balitopnews.com - Sekretaris Daerah Provinsi Bali Dewa Made Indra mewakili Pj. Gubernur Bali, ngrauhin parikrama Peresmian Gedung anyar Kantor Konsulat Jenderal Timor Leste ring Jl. Tukad Mas I No.4, Renon, Denpasar, Sukra Kliwon, Tolu tanggal 19 Januari 2024.
Malarapan antuk karesmiangnyane Gedung Anyar Konsulat Timor Leste ring Bali, manut Sekda Dewa Made Indra sajeroning sambrama wacanannyane, nenten ring struktur fisik kewanten, nanging prasida kasemertiang pinaka simbol pakilitan becik pantaraning makakalih pemerintahan. Irika kapanggihin wenten komitmen kuat saking Pemerintah Republik Demokratik Timor Leste sajeroning ngwangun hubungan bilateral sane sayan rumaket sareng Pemerintah Republik Indonesia.
"Pemilihan Kantor Konsulat Jenderal Timor Leste ring Bali majanten wenten pertimbangan strategis, Titiang Pemerintah Daerah Bali majanten dahat ledang antuk kawentenan Kantor Konsulat Jenderal Timor Leste ring Bali," baos Sekda Dewa Indra.
Dewa Made Indra maosang yening pantaraning Indonesia sareng Timor Leste madue pakilitan budaya miwah historis secara emosional. Sangkaning punika, Dane taler nyarengang pemerintah Timor Leste kasarengin Indonesia pamekas Pemprov Bali sajeroning nincapang hubungan bilateral sane salami puniki sampun mamargi antar.
"Tiosan pinaka genah wisata, titiang mikayunkn yening Bali prasida dados genah nyobyahang potensi sane kaduenang Timor Leste. Punika taler Bali taler madue potensi perkebunan, pertanian, peternakan miwah perikanan. Puniki dados peluang majeng pengusaha ring Timor Leste sajeroning ngambil produk Bali sane akeh mangda prasida katanjaang ring Timor Leste. Selah kerjasama ring widang kesehatan miwah pendidikan taler ageng sane kaaptiang prasida kawangun ring benjang pungkur. Saantukan Bali taler madue universitas / perguruan Tinggi sane madue kredibilitas becik, miwah layanan kesehatan makudang RS sane madue srana snae becik bertaraf internasional," baosnyane.
Parindikan sane pateh taler kabaosang Konsul Jenderal Republik Demokratik Timor Leste, Aleixo da Silva, sane taler ngaptiang mangda prasida kawangun kerjasama sane sayan becik. Dane taler ngajiang becik sokongan pemerintah Indonesia pamekas Pemprov Bali selami puniki.
Pamargin peresmian karuntutin antuk palingga tanganan prasasti olih Perdana Menteri Republik Demokratik Timor Leste, Kay Rala Xanana Gusmão.(Rls/Btnc)
Komentar