Mungkah Pelatihan Satpol PP Pariwisata, Mahendra Jaya Nuekang Kawijakan Pemerintah ring Destinasi Wisata
- 22 Januari 2024
- 20:01 WITA
- News
DENPASAR,Balitopnews.com -Penjabat Gubernur Bali, S.M. Mahendra Jaya mungkah parikrama Pelatihan Satuan Polisi Pamong Praja Khusus Pariwisata magenah ring BKPSDM Provinsi Bali, Soma (22 Januari 2024).
Pelatihan puniki kamiletin olih 71 pamilet minakadi 40 anggota Satpol PP Pariwisata Kabupaten Badung miwah 31 anggota Satpol PP Provinsi Bali.
Pj. Gubernur Bali, S.M. Mahendra Jaya maosang yening kawentenan Satpol PP khusus pariwisata mabuat kawentenane ring Bali saantukan Bali pinaka genah pariwisata ring Indonesia sepisanan talet pinaka genah tetujon utama pariwisata dunia. Malarapan antuk kawentenan Satpol PP pariwisata ring destinasi wisata ring Bali kaaptiang prasida nincapang katreptian, keamanan wiadin penegakan Perda ring destinasi pariwisata.
“I raga mapikayun nguwah paradigma polisi pamong praja,” baos Mahendra Jaya. Dane mapikayun mangda Satpol PP nenten malih kabaosang pinaka tukang gebuk miwah tukang rusuh nanging pinaka perwakilan daerah sajeroning nyaga katreptian sane humanis.
Mahendra Jaya ngaptiang Satpol PP Pariwisata tiosan sajeroning nyaga katreptian ring genah wisata taler prasida nguningayang napi sane dados wiadin nenten kadadosang olih wisatawan ring destinasi wisata mawinan prasida nees pamurug sane kalaksanayang wisatawan sakadi sane akeh kapanggihin pungkuran puniki.
Napi malih jagi kalaksanayang kebijakan pungutan majeng wisatawan asing sane mawit kalaksanayang ring tanggal 14 Februari 2024 sane jagi rauh. Dane ngaptiang mangda Satpol PP pamekas pariwisata puniki prasida ngamargiang becik kawijakan pemerintah punika ring genah-genah wisata ring Bali. “Sameton sami wantah angga sane kaaptiang sajeroning ngelingang turise mangda nglaksanayang swadarmannyane,” baosnyane.
Manut Mahendra Jaya pungutan majeng wisatawan asing nenten prasida kalaksanayang ring pintu kedatangan ri kala rauh ring Bali. Mawinan tiosan nganikain wisman mangda naur sadurung berangkat ke Bali, Dane taler ngaptiang mangda pungutan prasida kataur ring hotel utawi ring destinasi-destinasi wisata sane wenten ring Bali.
Tiosan punika, Dane taler ngelingang mangda Satpol PP pamekas pariwisata prasida nyaga nama baik Pemerintah Provinsi Bali ri kala nglaksanayang tugas. “Sampunang ngaonang citra Satpol PP pamekas pariwisata,” baosnyane. Dane ngaptiang mangda Komite Penjamin Mutu BKPSDM Provinsi Bali mangda nenten nureksain indik pangweruhan wiadin kompetensi anggota Satpol PP Pariwisata kewanten, nanging taler nureksain indik tata laksanannyane.(Rls/Btnc)
Komentar