Pemprov Bali Ngingetin Kramané Waspada Cuaca Ékstrem
- 15 Maret 2024
- 23:03 WITA
- News
DÉNPASAR, Balitopnews.com – Kepala Pelaksana Badan Penanggulangan Bencana Daérah (BPBD) Provinsi Bali, Madé Rentin, ngingetin krama Baliné waspada cuaca ekstrem tur tragia ri kala makarya. Painget puniki kasobyahang ring Dénpasar, Sukra Umanis Langkir (15 Maret 2004). “Kramané mangda waspada cuaca ekstrem sakadi blabar, tanah gembid, lan pepayon bah,” baos Madé Rentin.
Bendéga lan pelaku wisata bahari taler katunasin setata waspada angin tarik lan ombak tegeh kantos 2 méte. “Setata urati ring pasobyah saking pemerintah,” pinunas Madé Rentin.
Manut Madé Rentin, gatra saking Balai Besar Metéorologi, Klimatologi dan Geofisika (BBMKG) Wilayah III, ring tanggal 14-16 Maret 2024 ujan bales ring kabupatén/kota ring Bali. Salanturnyané, tanggal 17-20 Maret 2024 kantun wénten sabeh ring sajebag Bali. “Poténsi sabeh puniki ngawinang bencana hidrometeorologi sakadi tanah gembid, blabur agung, lan toya ngandeng ring genahé lebah lan paumahan, tegal, carik tur ngawinang tetanduran padiné usak,” baos Madé Rentin.
BBMKG taler nguningang Analisis Bibit Siklon Tropis 91S (panarka gencangnyané 65 km/jam), 94S (panarka gencangnyané 37 km/jam), lan 93P (panarka gencangnyaé 37 km/jam) ring Samudra Hindia makada ombak ring segarané tegeh kantos 1.25-2.5 méter) ring Selat Bali kelod, Selat Badung, Selat Lombok, lan Laut Bali. Madé Rentin nunasang kramané mangda nyimpen nomor penting yéning wénten darurat bencana. Sakadi nomor BPBD Provinsi Bali (0361-251177 utawi 085792240799), BPBD Kabupatén Badung (08113894000), BPBD Kabupatén Gianyar (0361-8598447/4795632 utawi 08113884353), BPBD Bangli (0366-91448), BPBD Karangasem (0363-22173 utawi 08123711174), BPBD Klungkung (0366-21047/23000), BPBD Tabanan (0361-811171), BPBD Jembrana (0365-41166 utawi 082145730669), BPBD Buléléng (0362-23022), BPBD Kota Dénpasar (0361-223333 utawi 081236706882), PMI Bali (0361-483465 utawi 081339474681), Basarnas Bali (0361-703300/705536 utawi 081138115115, BMKG WIL III Dénpasar (0361-751177).
Pamucuk BPBD Bali saking Mengwi puniki taler ngingetang kramané waspada ring aab jagaté mangkin. “Sané sedeng ring margi, yatnain tanah gembid lan punyan kayu pungkat. Sané makarya ring pasih yatnain ombak gedé lan angina tarik,” pakéling Madé Rentin. (Rls/Btnc)
Komentar