Nyukserahang Bantuan ka Panti Sosial ring Buleleng, PJ. Gubernur Bali Ngaturang Suksma Majeng Tenaga Perawat
- 08 April 2024
- 19:04 WITA
- News
BULELENG,Balitopnews.com - Berbagi kasih miwah rasa urati setata katincapang olih Pemerintah Provinsi Bali, majalaran program "Pemprov Bali Hadir" antuk konsep "Ngrombo" sane kamargiang maprakanti sareng Perangkat Daerah.
Sakadi sane kakantenang Soma (8 April 2024) rahina mangkin, rikala cuti bersama mapaiketan ring Hari Raya Idul Fitri, Pj. Gubernur Bali S.M. Mahendra Jaya kadampingin Pj. Ketua Tim Penggerak PKK Provinsi Bali Ny. drg. Ida Mahendra Jaya, Sekretaris Daerah Provinsi Bali Dewa Made Indra saha makudang Kepala Perangkat Daerah ngarauhin Panti Sosial ring Kabupaten Buleleng.
Rombongan Pj. Gubernur Bali ngarauhin panti Tresna Werdha Jara Marapati, ring Desa Banjar, Kecamatan Banjar-Buleleng.
Ring Panti Sosial Tresna Werdha Jara Marapati Desa Banjar, Kecamatan Banjar-Buleleng puniki, Pj. Gubernur Bali miwah rombongan nyukserahang paket sembako majeng anak lingsir sane meneng irika. Ipun sampun meneng irika sawatara 3-7 tiban ring panti sane kaadegang duk warsa 1980. Taler rauh Pj. Ketua TP PKK Provinsi Bali Ny. drg. Ida Mahendra Jaya miwah Sekda Dewa Indra nyukserahang bubur pinaka panyemeng, sapisanan masadu ajeng sareng makudang lansia.
Ri kala punika, Pj. Gubernur Bali S.M Mahendra Jaya ngaturang suksma majeng 23 diri tenaga sane nguratiang para lansia sane wenten irika.
Kepala UPTD. Panti Sosial Tresna Werdha Jara Marapati Dewa Ayu Eka Putri Karini, nlatarang nenten kidik lansia sane kantun aktif ngaryanin sapu lidi, sarana upakara, rerajutan, mawinan ipun nenten meneng kemanten, nanging prasida makarya saha ngruruh jinah sane jagi katabung," baos dane.
Dane ngawewehin, saking 46 lansia irika, wenten 10 lansia sane nenten prasida makarya sangkaning yusan ipun sanpun wredha, rikala ipun ngajeng miwah manjus, ipun kawantu antuk tenaga perawat irika.
Salanturnyane Pj. Gubernur Bali miwah rombongan ngalanturang ngarauhin miwah ngukserahang wantuan majeng 42 alit-alit ring Panti Sosial Asuhan Anak Udyana Wiguna, ring Kelurahan Kaliuntu, Kecamatan Buleleng.
Majeng alit-alit panti asuhan, Pj. Gubernur Bali mabesen mangda ipun satata guyub, masikian pinaka keluarga besar panti, nenten putus asa miwah patah semangat yadiastun meneng ring panti. "alit-alit apang wanen ngipi dadi langit, sawireh di langit liu ada bintang-bintang magantung, alit-alit madue hak sane pateh ring anak tiosan. Alit-alite patut polih pendidikan nganutin Peraturan Pemerintah Republik Indonesia Nomor 47 Tahun 2008 Indik Wajib Belajar, ngawinang polih selah nguber bekel nyujur masa depan sane galang. Mawinan alit-alite patut dados putra-putri bangsa sane pradnyan, sehat, waged miwah inggil," teges dane.
Ring panti puniki, alit-alit puniki kauratiang becik pisan, antuk ngamargiang pola hidup disiplin miwah miwah ngamiletin pendidikan nganutin yusa.
Antuk parikrama "Ngrombo" kaaptiang nyansan akeh kramane ngamolihang uratian, saha ngarasayang kawentenan pemerintah. (Rls/Btnc)
Komentar