Koster: Nularin Semangat "Founding Father" Majeng Ring Generasi Milenial
- 30 Mei 2019
- 14:38 WITA
- News
Balitopnews.com, Denpasar
Pakeling 1 Juni pinaka dina embasnyane Pancasila miwah Bulan Bung Karno kalaksanayang olih Pemerintah Provinsi Bali antuk tema Gerakan Kekuatan Pancasila (The Movement of Pancasila Power). Tema puniki kasinahang antuk parikrama ngamargiang oratorium kolosal miwah teatrikalisasi puisi Aku Melihat Indonesia, sane pinaka sajak pakardin Bung Karno, sane jagi kamargiang ring Ardha Chandra Taman Budaya, rahina Saniscara (1 Juni 2019).
Parikrama Oratorium puniki pacang kasaksiang olih kramane saking lintas agama, Bendesa Adat, Kepala Desa/Lurah, pelajar/mahasiswa, seniman, tokoh masyarakat, pejabat pemerintah Provinsi/Kabupaten/Kota, miwah wakil rakyat. Bulan Bung Karno sane kamargiang salami asasih ngawit tanggal 1 Juni puniki wantah perayaan Bulan Bung Karno sane kakuwubnyane ageng tur kapertama kamargiang ring Bali. Sajabaning kadagingin antuk makudang-kudang pacentokan sane kamiletin olih para sisya miwah anak muda/yowana, ring acara Bulan Bung Karno puniki taler pacang kasolahang makudang kesenian, silih sinunggilnyane nyolahang naskah drama sane kasurat utawi kakardinin olih Bung Karno.
Gubernur Bali Wayan Koster maosang inggian pamargin parikrama Bulan Bung Karno puniki madue lalima tatujon sane pinih mautama. Asiki, patut satata ngutamayang tur nginggilang Pancasila ring sajeroning kahuripan krama Bali. Kaping kalih, nincapang pangeweruh krama Bali ring saparindikan sejarah, filosofi, tur nilai-nilai Pancasila. Kaping tiga, ngukuhang inklusi sosial ring pantaraning kontestasi nilai (ideologi) miwah kepentingan sane mapuara ring upaya ngukuhang rasa politisi identitas. Kaping pat, nincapang miwah ngupapira tur ngemit memori kolektif krama Bali indik ketokohan miwah keteladanan Ir. Soekarno pinaka sang sane ngeripta tur menggali Pancasila miwah pinaka Proklamator Kemerdekaan Republik Indonesia. Kaping lima, ngukuhang institusionalisasi nilai-nilai Pancasila manut ring kearifan lokal krama Bali. "Ring Bulan Juni puniki wenten tetiga peristiwa historis sane dahat mabuat majeng ring Bangsa Indonesia tur makasami peristiwa punika wenten paiketannyane ring Bung Karno. Ring tanggal 1 Juni iraga pacang mikelingin dina embasnyane Pancasila, ring tanggal 6 Juni mikelingin dina embasnyane Bung Karno, lan ring tanggal 21 Juni mikelingin dina sedannyane Bung Karno," baos dane.
Dina embasnyane Pancasila manut ring daging pidarta Bung Karno ritatkala sidang/parum Badan Penyelidik Usaha-usaha Persiapan Kemerdekaan Indonesia (BPUPKI) duk tanggal 1 Juni 1945. Ring parum sane kamargiang ngawit tanggal 29 Mei punika, para tokoh pergerakan kemerdekaan Indonesia maosang utawi mikamkamin makudang wicara utawi daging bebaosan sane dahat mabuat pisan, silih sinunggilnyane rarincikan indik dasar negara.
Babaosan indik dasar negara punika nenten ngamolihang panepas sane inggil, nyantos rauh panamayane giliran Bung Karno sane nyobyahang pidarta. Bung Karno, sane duk punika mayusa 44 (petang dasa pat) tiban, nyobyahang pidarta nenten muatang teks/naskah. Ring pidartannyane punika, Bung Karno ngaturin pangrancana indik rarincikan dasar panagara sane kaicen parinama Pancasila. Makasami pamilet sidang cumpu nerima rarincikan punika antuk aklamasi. Pidarta punika raris kasurat utawi kabukuang olih BPUPKI tur kaicen murda Lahirnya Pancasila olih mantan Ketua BPUPKI, KRT. Radjiman Wedyodiningrat. Pancasila punika katetepang olih BPUPKI pinaka Dasar Negara Republik Indonesia lintang adina risampune Proklamasi Kemerdekaan. "Pamargin kahuripan Bung Karno prasida dados tauladan majeng ring para yowana mangda mrasidang menginisiasi perubahan sosial sane positif miwah progresif. Bung Karno punika madue rasa wanen miwah rasa prawira sane dahat kalintang, ring tuuhnyane sane wimuda pisan sampun wanen ngalawan penjajah nyantos dane kaambil, karanjingan ring bui/penjara, tur kaselong. Naning, makasami pikobet punika nenten makahawinan rered pikahyunan dane pacang nyingakin panagarannyane ngamolihang kamardikan," baos Ketua DPD PDI Perjuangan Bali puniki. "Yening generasi milenial iraga prasida nganggen pratiwimba inggian kawanenan, kapradnyanan, tur semangat kebangsaan Bung Karno dadosnyane titiang kapiandel pisan Indonesia pacang dados bangsa miwah panagara sane ageng," teges Koster.
Bulan Bung Karno sane kamargiang ring Taman Budaya Denpasar miwah Kampus Institut Seni Indonesia (ISI) Denpasar pacang kakawitin antuk acara mikelingin 74 (pitung dasa pat) warsa dina embasnyane Pancasila ring 1 Juni magenah ring Panggung Terbuka Ardha Chandra. Acara pakeling punika, pacang kacihnayang antuk pameran foto Bung Karno miwah Keberagaman Indonesia, miwah kalih sasolahan sane mabuat : teatrikalisasi puisi "Aku Melihat Indonesia" olih Ibu Putri Suastini Koster miwah sasolahan oratorium kolosal sane ngangkat tema Gerakan Kekuatan Pancasila. Oratorium puniki kasutradarain olih dosen ISI Denpasar, Made Sidia.
Bulan Bung Karno taler pacang kadagingin antuk acara ramah-tamah Lintas Agama ring tanggal 6 Juni 2019 anggen mikelingin 118 warsa dina embasnyane Bung Karno. Pemutaran film dokumenter, lomba cerdas cermat, miwah Pidato Bung Karno ring 21 Juni 2019 anggen mikelingin 49 warsa dina sedannyane Bung Karno. Pinaka panguntat pamargin parikrama Bulan Bung Karno ring tanggal 30 Juni 2019 pacang kasolahang teater kontemporer nganutin naskah drama sane kariptayang olih Bung Karno.
Bung Karno sujatinnyane polih ngaripta makudang naskah drama, bilih-bilih dane naenin polih ngawangun grup teater sadaweg ngamargiang pengasingan ring Ende, NTT duk warsa 1930-an. "Sane pacang solahang titiang sareng sami wantah naskah reriptan Bung Karno sane mamurda Koetkoetbi. Ring ajeng, Koetkoetbi makanten pinaka carita dendam asmara, nangin dagingnyane wantah nelatarang indik pikolihe sane kalintang becik pisan yening ring sajeroning kahuripan puniki iraga prasida lepas saking rasa dendam," baos Putu Satria, tokoh teater Bali Utara sane nyutradarayang pementasan/sasolahan punika.
Koetkoetbi pacang kasolahang antuk nganggen teknik-teknik sasolahan drama gong gaya Buleleng. "Drama Gong gaya Buleleng madruwe hubungan sareng seni drama modern duaning akting miwah sasolahannyane makanten sakadi bergaya realis. Drama Gong gaya Buleleng embas saking interaksi sareng teater zaman kolonial, inggih punika stambul miwah tonil, nanging drama gong Bali Selatan ngalimbak saking sendratari. (Balitopnews.com / Amo Bali )
Komentar