Gubernur Koster Mikelingin 118 Warsa Embasnyane Bung Karno
- 05 Juni 2019
- 13:50 WITA
- News
Balitopnews.com, Denpasar
Bulan Juni madruwe kasukseman sane mabuat majeng ring bangsa utawi panagara Indonesia. Sajabaning pinaka bulan embasnyane Pancasila (1 Juni), taler pinaka bulan embasnyane Proklamator sapisanan Bapak Bangsa Indonesia, Soekarno (6 Juni).
Malarapan antuk punika, Gubernur Bali Wayan Koster rahina Wraspati (6 Juni) benjang sore pacang ngamargiang acara mikelingin 118 warsa embasnyane Bung Karno sapisanan karuntutin antuk Halal Bihalal Idul Fitri 1440 Hijriah, magenah ring Rumah Jabatan Gubernur Bali, Jaya Sabha, Denpasar.
Anggen nyihnayang rasa hormat miwah bhakti majeng ring Bung Karno pinaka Bapak Bangsa, Pemerintah Provinsi Bali sampun ngamargiang Bulan Bung Karno sane madaging runtutan acara salami asasih.
"Nilai-nilai sane kawarisin olih Bung Karno dahat adung pisan yening jagi anggen utawi margiang iraga ring aab jagat mangkin. Ketuhanan sane maderbe dasar kebudayaan, persatuan, gotong royong, miwah bekerja keras wantah kunci karahajengan iraga sareng sami," baos Koster.
Koster sane taler kamanggehang pinaka Ketua DPD PDI Perjuangan Bali punika raris mapakeling dahat mabuat pisan mangda ngamargiang piteket-piteket utawi ajaran-ajaran saking Bung Karno ring sajeroning kahuripan iraga sarahina.
"Sampun janten pinaka cihna penghormatan sane pinih mautama wantah antuk nerapang tur nulad sakancan ide, pemikiran, gagasan, tur cita-cita Bung Karno nuju Indonesia Raya," dane negesang.
Koster malih ngawewehin, inggian runtutan parikrama bulan Bung Karno kadagingin antuk Pameran Foto Bung Karno miwah keragaman Indonesia, pemutaran film dokumenter Bung Karno, lomba cerdas cermat, miwah pidato Bung Karno, pergelaran utawi pentas seni miwah budaya, miwah ramah tamah lintas agama.
Runtutan acara pacang kasindeb ring tanggal 30 Juni 2019 antuk ngawentenan sasolahan teater sane kaangkat saking naskah drama sane kasurat olih Bung Karno.
"Makasami acara kamargiang ring Taman Budaya miwah kampus Institut Seni Indonesia (ISI) Denpasar," baosnyane.
Kawewehin malih olih Koster, pamargin parikrama Bulan Bung Karno puniki sampun anut ring visi Pemerintah Provinsi Bali inggih punika "NANGUN SAT KERTHI LOKA BALI." Majalaran antuk pembangunan semesta berencana, sane maderbe kasukseman nyaga utawi ngemit kasucian miwah keharmonisan alam Bali miwah sadagingnyane anggen pinaka jalaran ngawerdiang kahuripan krama Bali sane sukerta miwah rahajeng, sekala lan niskala ngaruruh kahuripan krama miwah gumi Bali manut ring prinsip Tri Sakti Bung Karno inggih punika berdaulat secara politik, berdikari secara ekonomi, miwah berkepribadian dalam kebudayaan majalaran antuk pembangunan sane terpola, menyeluruh, terencana, terarah, miwah terintegrasi utawi menyatu ring sajeroning bingkai Negara Kesatuan Republik Indonesia nganutin Nilai-Nilai Pancasila 1 Juni 1945. (Balitopnews.com/Amo Bali )
Komentar