Ibu Putri Haryani miwah Dinsos Bali Ngicenin Wantuan majeng ring Lansia I Wayan Keten-Marniah
- 01 November 2019
- 20:51 WITA
- News
Balitopnews.com, Denpasar
Pemerintah Provinsi Bali malaksana gelis antuk ngicenin wantuan marupa fasilitas panti jompo majeng ring lansia sane tiwas. Parikrama mangkin kamargiang ring wawidangan Sekar Tunjung Denpasar, ring genah pasangan lansia I Wayan Keten (66) miwah Marniah (63) sane lascarya manahnyane sareng kalih jenek ring kubu alit sane kantun malularan tanah.
Ring kubu sane kasengker lan katawengin antuk asbes punika, Keten wantah sida masare matatakan antuk kain kelambu sane tipis. Wangunan sane kajenekin punika, kawangun antuk kayu-kayu sisa sane nenten kukuh tur kasuen-suen meh-mehan prasida bah utawi runtuh. Sane banget ngawinang sedih manah sang ngatenang, antuk pinakit sane katandangin olih ipun, mawinan Keten mangkin nenten prasida mamargi malih, napimalih makarya ngarereh pangupajiwa. Ipun sane sarahina wantah sida masare kemanten katimpalin olih somah ipune sinambi nyantosang wantuan saking sanak kulawarga tur jadma tiosan sane sih nyingakin kahanan ipun sareng kalih.
Ngarepin indik puniki, Pemerintah Provinsi Bali sane kaanganin olih Dinas Sosial maparilaksana gelis ngicenin wantuan marupa fasilitas mangda pasangan lansia puniki prasida gelis kagingsirang ke fasilitas panti jompo. Fasilitasi punika kasobyahang olih rabin sang nyakrawati nomor kalih ring Bali, Ibu Tjokorda Putri Haryani Sukawati sane kanjekan punika nyingakin langsung ring genah jeneknyane pasangan I Wayan Keten-Marniah. "Antuk kautsahayang fasilitas mangda kagingsiran ke Panti Jompo, dadosnyane bapak miwah ibu Keten prasida molihang fasilitas sane becikan tur layak. Kesehatannyane taler jagi katitenin, katureksa secara periodik, dadosnyane lebih terjamin," teges Ibu Putri Haryani.
Tios ring punika, Kepala Dinas Sosial Provinsi Bali, Dewa Gde Mahendra Putra maosang inggian fasilitasi ke panti jompo puniki wantah sasana sane patut kamargiang saking pemerintah provinsi madasar antuk kahanan sang sane katuju dahat merluang wantuan." Kahanan genah jenek sang lansia dahat nenten becik tur patut digelis katitenin. Duaning punika, digelis pacang gingsirang titiang ke panti jompo Werdha Syailendra, (Jimbaran, Kabupaten Badung.red) mangda pungkuran prasida katitenin lebih maksimal. Kesehatan ipun taler pacang katureksanin mangda lebih intensif," baos Dewa Mahendra. Indik puniki manut ring Perda No. 11 Warsa 2018 sane maosang indik kasukertan lansia, inggian punika nyihnayang komitmen pemda majeng ring kasukertan lansia saking sisi alokasi anggaran daerah miwah penanggung jawab pelaksana kebijakan ring tingkat daerah.
Pihaknyane sampun nyungkemin nenten pacang ngampakang pintu sane lebar-lebar majeng ring kulawarga sane kahyun nyenukin napimalih pungkuran wenten sane jagi nyemput sang lansia yening karasa ring widang ekonomi sampun prasida mapan. "Sane pastika, sajabaning kesehatan miwah genah anggen jenek sane layak, kapungkur sang lansia pacang ngamolihang makudang-kudang kegiatan positif anggen nagingin hari tuanyane, mangda nenten nyantos padidian malih," baos dane.
Sawusan kunjungan punika, rombongan taler berkunjung tur nyaksiang Yayasan Metta Mama lan Maggha ring Jalan Gunung Lawu, Pemecutan Kelod, Denpasar Barat. Yayasan non profit punika maderbe tujuan sane mulia inggih punika nampung tur melihara bayi utawi anak alit sane terlantar miwah katelantarang. (Balitopnews.com/MD/Hms)
Komentar