Wartawan Saking Korea Kedaut Mromosiang Genah Wisata Tabanan ring Penegarannyane
- 03 November 2019
- 23:20 WITA
- News
Balitopnews.com, Tabanan
Kesumekenan Pemerintah Kabupaten Tabanan sane kemanggalaning Bupati Tabanan Ni Putu Eka Wiryastuti, rikala ngenjot sektor pariwisata sayan sering kemargiang. Risampun ngeresmiang nerapang tiket elektronik ring DTW Tanah Lot, sane mangkin Pemkab Tabanan ngawentenang sima krama sareng para juru warta saking sinalih tunggil penegara tetangga, inggih punika saking Korea.
Rombongan wartawan Korea sane kemanggalaning Presiden Wartawan Korea Mr. Jong, katerima Asisten Pemerintahan lan Kesra Setda Kabupaten Tabanan I Wayan Miarsana sane kedampingin Kadis Pariwisata I Gede Sukanada lan Kabag Humas lan Protokol Setda Kabupaten Tabanan I Ketut Ridia ring ocean Restoran, Tanah Lot, rahina Saniscara (2/11) wengi sane sampun lintang.
Sadurung katerima ring Tanah Lot, rombongan wartawan sane meakeh 11 diri punika sadurungnyane keanter nyingakin keulangunan DTW Ulun Danu Beratan. Riantuk akidiknyane galah, rombongan saking Korea punika wantah presida nelokin mekudang kudang genah wisata kemanten.
Yadiastun kadi asapunika Manggala rombongan Mr. Jong mawosang rumasa seneng lan puas, sawireh sampun kesagiang genah wisata sane ngulangunin. Dane raler maosang yadiastun nenten prsesida nyingakin matanai enceb ring Tanah Lot sangkaning kabanda antuk galah, ring acara ramah tamah sane kemargiang, ragannyane taler maosang sampun miragi encebnyane matanai ring wewidangan Tanah Lot wiyakti dahat ngulangunin.
Kawewehin, ragannyane nyambatang rumasa seneng lan angayubagia presida megenah ring Tanah Tabanan, nenten lali maosang acara punika jagi pacang kelanturang. Ngewalinin rombongan Mr. Jong taler ngaturang dahat suksma majeng ring Pemkab Tabanan, lemekasnyane majeng Ring Murdaning Jagat Tabanan. Manut dane, acara punika dahat penting.
Ngewalinin Murdaning Jagat Tabanan, Asisten Pemerintahan lan Kesra Sekda Tabanan I Wayan Miarsana maosang, Kabupaten Tabanan medue tetiga genah wisata sane sampun kasub, inggih punika Ulundanu Beratan, Tanah Lot, lan Jatiluwih. Pemekasnyane kebawosng Jatiluwih pinaka Warisan Budaya Dunia antuk sistem lan tata cara pertaniannyane sane sampun kasub mewasta Subak.
Antuk sepengerauh rombongan wartawan saking Korea punika ngewalinin Murdaning Jagat Tabanan ngaturang suksma lan penghargaan sane pinih tegeh, taler ngaptiang manda pertemuan nenten puput rauh amunika, nanging keapti mangda sinaian sida sareng mromosiang genah lan obyek wisata Kabupaten Tabanan ring penegarnnyane ring Korea. (Balitopnews.com/WM/Hms)
Komentar