Ketua Dekranasda Bali Ngerauhin Pemungkah Karya Kreatif Indonesia (KKI) 2020 Undag II
- 09 Oktober 2020
- 19:10 WITA
- News
2020UndagII.jpg)
DENPASAR,Balitopnews.com - Ketua Dekranasda Provinsi Bali, Putri Suastini Koster ngerauhin pamungkah Karya Kreatif Indonesia (KKI) 2020 undag II antuk virtual saking genah meneng Gubernur Bali, Jayasabha Denpasar, Anggara 7 Oktober 2020.
KKI pinaka parikrama awarsa apisan sane kadagongin olih produk-produk makualitas saking UMKM binaan BI, masikian sareng kementerian/lembaga inucap. KKI 2020 kalaksanayang antuk konsep virtual lan kalaksanayang antuk maundag inggih punika undag I 'Sinergi majeng UMKM Ekspor' sane kalaksanayang saking pinanggal 28-30 Agustus 2020, undag II 'Sinergi untuk UMKM Digital' sane pacang kalaksanayang 7 Oktober 2020, miwah undag III 'Sinergi UMKM untuk Sahabat Milenial', pacang kalaksanayang ring sasih November 2020.
Taler rauh ring pemungkah KKI 2020 baga II inggqih punika Ketua Umum Dekranas Wury Ma’ruf Amin, Gubernur BI Perry Warjiyo, Menteri Ketenagakerjaan Ida Fauziah, kepala BI perwakilan se-Indonesia, miwah para ketua Dekranasda provinsi utawi kabupaten/kota se-Indonesia.
Gubernur BI Perry Warjiyo nguningan antuk nyuun murda “Mendorong UMKM sebagai Kekuatan Baru Perekonomian Nasional di Era Digital”, KKI 2020 taler dados baga saking ogokan BI majeng Gerakan Nasional Bangga Buatan Indonesia (Gernas BBI).
Perry nguningan yening pameran antuk virtual puniki kasarengin olih kirang langkung 377 UMKM binaan Bank Indonesia minakadi perajin kain, pengusaha ajeng lan inuman, pemilet kriya lan UMKM kopi.
Dane taler nangiang krama Indonesia makasami mangda ngerauhin pameran KKI puniki antuk virtual melarapan website www.karyakreatifindonesia.co.id. Anggen ngedanganan kramane ngerereh produk sane kakayunin. BI sampun nyiagayang katalog lan presida kaunduh ring website punika.
"Benjangan BI masumaya jagi setata ngogokang UMKM ring Indonesia pinaka kaandelan majeng perekonomian bangsa, miwah setata masikian sareng kementerian lan lembaga inucap” ucap dane.
Tiosan raris Ketua Umum Dekranas Wury Ma’ruf Amin dahat nyumbungan pemargi BI miwah lembaga inucap rikala nincapang UMKM ring Indonesia, sekadi antuk ngefasilitasi makudang pameran. Manut dane kapilihne pameran digital puniki dahat becik, santukan kawentenan gering Covid-19 puniki nenten becik ngelaksanayang geginan mapupul.
Dane nyumbungan palingga tanganan nota kesepahaman BI lan Dekranas anggen ngogokang produksi UMKM Indonesia. “Titiang ngaptiang antuk pemargi pameran virtual puniki, krama Indonesia presida rauh miwah matumbasan anggen ngewantu perekonomian bangsa,” ucap dane.
Indik sane pateh taler kabaosang olih Menteri Ketenagakerjaan Ida Fauziah, inggih punika UMKM amangkinan nyelametan perekonomian bangsa miwah ngangge tenaga kerja sane makeh ring Indonesia.
Manut dane, kirang langkung 57,8% PDB Indonesia rauh saking UMKM, 99,99% unit usaha ring Indonesia inggih punika UMKM, semalihne UMKM taler sampun ngangge tenaga kerja makeh nyane 97% saking makasami tenaga kerja ring Indoenesia. Munggwing asapunika lantur Ida Fauziah, kawentenan UMKM patut kauratiang mangda setata nincap manut tetincap yuga.
Dane taler ngaptiang UMKM ring Indonesia presida manut sareng Revolusi Industri 4.0, antuk ngangge teknologi, minakadi rikala makarya, matumbasan utawi meadolan kantos presidas ngelimbak pasar global lan internasional.(gix)
Komentar