Sekda Dewa Indra Nureksa Kesiapan Seremoni 'Bali Nice' Mapaiketan ring WWF 2024

Selasa, 14 Mei 2024

DENPASAR,Balitopnews.com -  Sekretaris Daerah (Sekda) Provinsi Bali Dewa Made Indra, nureksa pidabdab nuju Upacara Segara Kerthi ring wawidangan Pantai Bali Turtle Island Development (BTID), Serangan, Denpasar, sane mapaiketan ring World Water Forum (WWF) ke-10 galah 18-25 Mei 2024.

Sekda Dewa Indra kasarengin antuk para manggala perangkat daerah, nureksain sarana miwah prasarana sane jagi kaanggen sajeroning seremoni sane mamurda 'Bali Nice' punika. Ngawit saking panggung utama, genah VVIP, tribun pamilet nyantos alur ngranjing miwah medal sajeroning pamargin seremoni. 

Birokrat saking Pemaron, Kabupaten Buleleng puniki taler mastikayang kesiapan pengisi acara, pragina nyantos pemuka agama taler kapastikayang H-1 acara, genah miwah sajangkepnyane sampun sayaga. 

Sakadi sane sampun kagatrayang sadurungnyane, Upacara Segara Kerthi mabuat pisan sajeroning utsaha pemuliaan air miwah anut pisan ring parikrama WWF.

Antuk patitis ‘Merawat Air Melindungi Sarwa Prani’, Upacara Segara Kerthi matetujon nunas waranugraha mangda sagarane suci nirmala sekala lan niskala taler parikrama WWF kaping-10 mamargi antar. 

Parikrama sane jagi kalaksanayang ring tanggal18 Mei 2024 punika jagi kasarengin olih prawartaka nasional miwah pamilet WWF, Gubernur miwah para Manggala OPD Pemprov Bali, Bupati/Walikota se-Bali, pejabat instansi vertikal, tokoh adat saha krama Desa Adat Serangan sane wenten ring wawidangan pasisi BTID.

Tiosan ring upacara miwah sasolahan tari, sajeroning Upacara Segara Kerthi puniki taler kalaksanayang pelepasan satwa inggian punika 1.000 ukud tukik, 1.000 ukud kedis miwah 5 ukud penyu. 

Parikrama punika taler karauhin olih Kepala Dinas Perhubungan I Wayan Samsi Gunarta, Kepala Dinas Lingkungan Hidup dan Kehutanan Provinsi Bali I Made Teja, Kepala Dinas Kebudayaan Provinsi Bali I Gede Arya Sugiartha, Kepala Dinas Perindustrian dan Perdagangan Provinsi Bali I Wayan Jarta, Kepala Dinas PUPR dan Kawasan Permukiman Provinsi Bali Nusakti Yasa Wedha, Kepala Dinas Kesehatan Provinsi Bali I Nyoman Gede Anom miwah Kepala Biro Umum dan Protokol Setda Provinsi Bali I Wayan Budiasa.(Rls/Btnc)

• TAGS:
• Pemprovbali