Sekda Dewa Indra Mungkah Evaluasi AKIP Pemprov Bali 2024
Kamis, 18 Juli 2024
DENPASAR, Balitopnews.com - Sekretaris Daerah Provinsi Bali Dewa Made Indra mungkah Evaluasi Akuntabilitas Kinerja Instansi Pemerintah (AKIP) Pemprov Bali warsa 2024, magenah ring Gedung Wiswa Sabha Utama, Kantor Gubernur Bali duk Wraspati (18 Juli 2024)
Sajeroning parikrama punika, Sekda Dewa Indra nyanggra tim Evaluasi saking Kemenpan RB, sane jagi ngamargiang evaluasi AKIP ring Pemprov Bali antuk nglaksanayang evaluasi kinerja majanten Pemerintah Daerah prasida nguningin genah kakirangannyane miwah prasida anggen jalaran nyiksik bulu. Irika taler kasobyahang, nganinin indik evaluasi AKIP warsa 2023 sampun kamargiang becik, salanturnyane prasida nadosang daerah ngamolihang makudang-kudang penghargaan AKIP.
Salanturnyane, Sekda Dewa Indra taler maosang manut reformasi birokrasi Kemenpan RB sane nginggilang 3 tematik dados patitis utama inggih punika penanganan stunting, pengentasan kemiskinan miwah kemiskinan ekstrem, saha peningkatan ekonomi miwah pengendalian inflasi, sane prasida kalaporang indik penanganan stunting Pemprov Bali wenten ring posisi paling sor inggian stunting ring Indonesia. Samalihnyane pengentasan kemiskinan ekstrim ring Bali taler magenah ring posisi kemiskinan paling sor ring Indonesia tur inflasi ring Bali prasida katepasin.
“Yening kaselehin ring wewidangan kinerja-kinerja makro, iraga relatif magenah ring posisi sane langkungan saking rata-rata nasional, Sapuniki Rasio iraga 0.3 soran saking rata-rata nasional. Tingkat pengangguran terbuka ring Bali paling sor miwah Indeks Pembangunan Manusia ring Bali 7.8 langkungan saking rata-rata nasional,” baosnyane.
Duaning asapunika, Dewa Indra mapangapti antuk ngawentenang evaluasi AKIP puniki prasida nyokong Bali mauwah mangda sayan nincap nyantos pawangunan miwah reformasi birokrasi ring Bali prasida nglimbak sayan positif.
Tiosan punika, Sekretaris Deputi Reformasi Birokrasi, Akuntabilitas Aparatur, dan Pengawasan, Kementerian PAN-RB, Hidayah Azmi Nasution, maosang tim evaluasi sane rauh ka daerah-daerah matetujon nureksain pamargin progres kinerja sane sampun kamargiang, salanturnyane prasida ngicen support utawi sokongan anggen mecikang sane patut kabecikang. Evaluasi AKIP wantah wibaga saking pembinaan sane matetujon ngwangun sistem sane sayan becik tur sayan maju pamekasnyane majeng ring pihak internal. Mangda ngamedalang panglimbak kinerja pelayanan sane sayan becik.
Sane rauh sajeroning prikrama punika makasami Manggala Perangkat Daerah ring wewidangan Pemerintah Provinsi Bali miwah para uleman tiosan. (Rls/Btnc)
Komentar