RSBM Nuju Standar Internasional Warsa 2025: Bali Midabdabin Genah Anyar Sajeroning Wisata Kesehatan
Selasa, 23 Juli 2024
DENPASAR,Balitopnews.com – Sekretaris Daerah (Sekda) Provinsi Bali Dewa Made Indra ngangkenin mabuat nyane kawentenan tim Australian Council on Healthcare Standards (ACHS) sane pacang ngawentenang asesmen ring Rumah Sakit Bali Mandara (RSBM) Bali, sajeroning utsaha RSBM madue standar internasional warsa 2025 sapisanan ngunggahang kawentenan Bali pinaka destinasi wisata kesehatan ring mata wisatawan mancanegara.
Indike punika kabaosang olih Sekda Dewa Made Indra rikala mungkah International Accreditation by ACHS International, magenah ring RSBM, Denpasar, rahina Anggara (23 Juli 2024)
Manut birokrat saking Desa Pemaron, Buleleng punika, RSBM sampun terakreditasi paripurna utawi paling inggil ring tingkat nasional. “Nanging, Pemprov ngaptiang lebih santukan mawit kawangun RS piniki nenten nglayanin krama lokal, taler wisatawan mancanegara, napimalih magenah ring Sanur, ring genah wisata,” baos dane majeng angga media rikala wawancara.
Danr maosang Pemprov Bali ngulengang standar Internasional prasida medal ring warsa 2025. “Proses Akreditasi kantun mamargi astungkara warsa 2025 iraga sampun maderbe standar punika (internasional-red),” paweweh dane. Santukan prasida ngawewehin rasa percaya krama miwah wisatawan mancanegara ring pelayanan RSBM. “indike puniki mangda wisatawan mancanegara nenten sumandangsaya, sapisanan nincapang kelas RS puniki ,” baos dane.
Dane ngalanturang peluang wisata kesehatan pungkuran nyansan akeh, saking tren pangrauh wisatawan mancanegara ka Bali taler nyansan nincap, sapunika taler kualitas wisatawan sane nyansan mecikang. Nenten prasida kalempasin, akeh krama sane mawisata sapisanan ngrereh layanan kesehatan utawi kasengguh Health Tourism. “Mawinan ngiring sanggra selah puniki. Nampenin selah punika RSBM patut nincapang angga mangda kramane utaminyane wisatawan mancanegara taler percaya,” pawuwus dane.
Tios punika, dane taler ngaptiang krama Bali miwah Indonesia nenten malih lunga ka dura negara jagi ngrereh layanan kesehatan, santukan malih jebos Bali pacang maderbe RS antuk standar internasional.
Sajeroning laporan dane Direktur RSBM dr. I Gusti Ngurah Putra Dharma Jaya, M.Kes nguningang RSBM sampun madue standar internasional minakadi kualitas pelayanan, keamanan nyantos kepuasan pasien. Nanging durung terakreditasi, sajeroning nincapang kepercayaan internasional muatang pisan akreditasi.
Tios punika, dame taler maosang RSBM sampun madue tenaga-tenaga sane kooperatif miwah profesional, nanging kantun muatang malih pawarah konstruktif saking asesor.
Samalihnyane Ketua Tim Asesor saking ACHS Timothy Gardner maosang ACHS pinaka prakanti nincapang momot layanan kesehatan sane andel majeng organisasi-organisasi kesehatan ring sajebag jagat. ACHS jantos mangkin uleng ring momot pelayanan RS. Nganinin RSBM dane ngangeknin RS sampun maderbe standar sane becik, nanging mangda nyansan kapercayen, mawinan RSBM muatang akreditasi saking organisasi sane terpercaya." (Rls/Btnc)
Komentar