Dana Hibah Pemilukada Terealisasi 100%, Bali Polih Apresiasi
Selasa, 30 Juli 2024
BADUNG,Balitopnews.com - Pj. Gubernur Bali S.M. Mahendra Jaya nguningayang realisasi dana hibah majeng ring KPU Daerah, Bawaslu Daerah, Polri miwah TNI ring Bali sampun terealisasi 100% sane kaanggen nyokong parikrama Pemilukada serentak warsa 2024. Penandatanganan NPHD hibah saking Provinsi ka Kabupaten/Kota se-Bali taler sampun kalaksanayang sapisanan ring Gedung Wiswa Sabha Utama, Kantor Gubernur Bali.
Indike punika kasobyahang ri tatkala ngicen sambrama wacana sajeroning acara Rapat Koordinasi Kesiapan Penyelenggaraan Pemilukada Serentak Tahun 2024 ring wawidangan Bali miwah Nusa Tenggara, sane magenah ring BNDCC, ITDC Nusa Dua, rahina Anggara (30 Juli 2024)
Inggian rincian dana hibah saking Provinsi sane kaicen ring KPU Daerah Bali agengnyane Rp.155 miliar, Bawaslu Daerah agengnyane Rp. 41 miliar, Polri Rp. 30 miliar miwah TNI agengnyane Rp. 9 miliar. Samalihnyane total rincian dana hibah saking Kabupaten/Kota se-Bali majeng ring KPU Daerah agengnyane Rp. 300 miliar, Bawaslu Daerah agengnyane Rp. 80 miliar, Polri agengnyane Rp. 68 miliar, TNI agengnyane 24 miliar.
“Titiang taler nguningayang pamargin Pemilu 2024 sane sampun lintang ring Bali sampun mamargi trepti, antar lan sukses antuk ngutamayang prinsip-prinsip pemilu sane demokratis," tinas dane.
Indik punika prasida kasobyahang antuk nguratiang tingkat partisipan Pemilu agengnyane 83.34% langkungan saking partisipan nasional sane agengnyane 81,7%. "Integritas miwah profesionalisme penyelenggara pemilu taler becik pisan. Cihnanyane prasida kapanggih saking pemilu sane mamargi trepti tur antar taler negepin asas jujur, adil, transparan miwah akuntabel," imbuh dane.
Pj. Mahendra Jaya taler maosang penegakan hukum Pemilu berkepastian, antuk sakancan pikobet sane metu prasida kapuputang manut peraturan perundang-undangan.
"Antuk kerja keras miwah kebersamaan utawi Ngrombo, titiang optimis prinsip-prinsip punika taler prasida kamargiang ring Pemilukada serentak warsa 2024," puput dane.
Apresiasi antuk realisasi hibah olih Provinsi Bali kaapresiasi olih Menko Polhukam Marsekal TNI Hadi Tjahjanto. Dane ngaptiang daerah-daerah tiosan ring Nusa Tenggara prasida nuladin Bali santukan Pemilukada jagi gelis kalaksanayang.
Ri kala punika, dane maosang manut Peraturan KPU Nomor 2 tahun 2024 tentang Penyelenggaraan Pemilihan Gubernur dan Wakil Gubernur Bupati dan Wakil Bupati serta Walikota dan Wakil Walikota, mawinan Pemilukada serentak warsa 2024 jagi kalaksanayang ring tanggal 27 November 2024 olih 545 Daerah ring Indonesia.
Antuk punika, dane taler negesang mabuatnyane sinergitas pemerintah, penyelenggara pemilu miwah peserta pemilu mangda pamargin Pemilukada serentak prasida aman, trepti lan santi.
Sajeroning paletan Pemilukada 2024, dane taler nunas mangda ASN, TNI lan Polri mangda netral miwah makarya manut koridor hukum sane kainggilang. "parindikan punika taler kabuatang mangda nenten metu pikobet selami Pemilukada sane prasida ngiusin legitimasi krama majeng ring pikolih Pemilu," tinas dane.
Menkopolhukam nunas mangda media/pers prasida ngaturang gatra sane akurat, berimbang tur nenten hoax. Dane taler mapangapti mangda krama sareng ngwantu ngwentenang Pemilukada sane santi, trepti tur antar. " Punika taler sareng ngawasin pamargin Pilkada mangda anut ring aturan sane berlaku," puput dane.
Parikrama ring siang punika taler karauhin olih narawakia inggih punika Menteri Dalam Negeri RI Tito Karnavian antuk materi "Perancis Pemerintah Pusat dan Daerah dalam Memfasilitasi Penyelenggaraan Pemilukada Serentak 2024 ring Wawidangan Bali miwah Nusa Tenggara. Narawakia kaping kalih inggih punika Ketua KPU RI Mochammad Afifuddin antuk babaosan "Kesiapan dan Dinamika Penyelenggaraan Pilkada Serentak tahun 2024 ring Wewidangan Bali miwah Nusa Tenggara. Narawakia kaping tiga inggih punika Ketua Bawaslu RI Rahmat Bagja antuk babaosan “Pemetaan dan Strategi Pengawasan Tahapan Pilkada Serentak 2024 ring Wewidangan Bali miwah Nusa Tenggara. Pamaos salanturnyane inggih punika ASOPS Kapolri Irjen Pol Drs. Verdianto I. Bitticaca antuk materi "Menjaga Stabilitas Keamanan dan Ketertiban Masyarakat untuk Menyukseskan Pilkada Serentak Tahun 2024 ring Wewidangan Bali miwah Nusa Tenggara. Pamaos salanturnyane inggih punika Pangkogabwilhan II Marsdya TNI M. Khairil Lubis sane maosang indik "Kesiapan Bantuan TNI sajeroninh Penyelenggaraan Pilkada 2024 ring Wewidangan Bali miwah Nusa Tenggara". Pamaos sane kaping untat inggih punika Deputi Bidang Operasi Keamanan Siber dan Sandi BSSN Mayjen TNI Dominggus Pakel sane maosang "Ketahanan Siber dalam Penyelenggaraan Pilkada 2024 ring Wewidangan Bali miwah Nusa Tenggara". Parikrama pabligbagan punika kaenterang antuk moderator Tysa Novenny.
Parikrama kapuputang antuk Pembacaan Deklarasi Pilkada Damai olih makasami pamilet rakor sane rauh saking sakancan unsur ring wewidangan Bali Nusra.(Rls/Btnc)
Komentar