Pj. Gubernur Bali S. M. Mahendra Jaya Nyineb Kolaborasi Event "Bali Digital Festival III, Bali Development Festival, Festival Seni Bali Jani, Bulan Kebangsaan" Warsa 2024
Rabu, 21 Agustus 2024
DENPASAR, Balitopnews.com - Pj. Gubernur Bali, Sang Made Mahendra Jaya, kasarengin antuk Kepala Dinas Komunikasi, Informatika, dan Statistik Provinsi Bali, Gede Pramana, taler Kadis Kebudayaan Provinsi Bali, Gede Arya Sugiartha, nyukserahang Penganugerahan Penghargaan Tertinggi Bidang Kebudayaan "Parama Bhakti Budaya" miwah "Bali Jani Nugraha" ri tatkala nyineb parikrama kolaborasi event "Bali Digital Festival III, Bali Development Festival, Festival Seni Bali Jani sajeroning eedan Bulan Kebangsaan Tahun 2024" ring Panggung Terbuka Ardha Candra, Taman Budaya Provinsi Bali, Denpasar, Anggara (20 Agustus 2024)
Penghargaan Parama Bhakti Budaya inggih punika pangargan sane kaaturang majeng ring tokoh-tokoh sane ngabdiang angga sajeroning ngukuhang miwah nglimbakang kebudayaan Bali. Petang diri tokoh sane ngamolihang panghargaan inggih punika Alm. Prof. Dr. Ida Bagus Mantra, Gubernur Bali Periode 1978-1988, antuk yasan dane ngwangun karya monumental minakadi Art Center, Bajra Sandhi, miwah ngwentuk PKB sane dados titi pangancan sajeroning nglimbakang budaya Bali rauh ring rahina mangkin; Drs. Dewa Made Beratha, Gubernur Bali Periode 1998-2008, antuk yasan dane sajeroning promosi Bali majalaran jalur kebudayaan taler ngwantu mecikang sakancan pura ring Bali tur dura Bali; Komjen Pol. (Purn.) Dr. Made Mangku Pastika, M.M., Gubernur Bali periode 2008-2018, antuk yasan dane nglimbakang program unggulan ring bidang kebudayaan minakadi Bali Mahalango miwah Bali Nawa Natya pinaka genah para seniman nyolahang kreasinipune salami awarsa; taler Dr. Anak Agung Gde Ngurah Ari Dwipayana, M.Si., sane mangkin pinaka Koordinator Staf Khusus Presiden, antuk yasan dane numbuhang nilai-nilai sane kasengguh miwah kasurat ring sajeroning sastra tetamian panglingsir.
Tiosan punika, panghargaan Bali Jani Nugraha kaaturin majeng tokoh-tokoh Bali antuk prestasi sajeroning mikukuhang miwah nglimbakang seni modern, kontemporer, tur seni inovatif tiosan. Sane ngamolihang inggih punika Sastrawan Ni Made Purnama Sari, Penyair Alm. Riyadi SH, taler Penyair H. Hartanto.
"Majeng ring sang sane ngamolihang pangargan, titiang ngangganin pemerintah daerah miwah krama Bali ngaturang suksmaning manah antuk yasan dane sajeroning ngupapira Kebudayaan Bali," baos S. M. Mahendra Jaya.
Dane taler ngaturang suksma majeng ring makasami pihak sane sampun sareng nyuksesang kolaborasi event puniki, punika taler sang angawa rat pembangunan Bali, penggiat media digital, miwah penggiat seni kontemporer Bali. Dane mawuwus mangda genah puniki kaupapira miwah makasami angga mangda nglantur ngamedalang pakaryan, berkreasi, saha nincapang tata kelola manajemen tur profesionalitas.
"Pawangunan ring sakancan bidang, minakadi ekonomi, politik, teknologi, sosial, tur kebudayaan, dados parindikan sane setata kautsahayang mamargi terintegrasi olih Pemerintah Provinsi Bali. Kearifan lokal 'NGROMBO' sampun dados silih tunggil jiwa sane prasida nepasin sakancan pikobet, minakadi kemiskinan, kesehatan, miwah kesejahteraan sosial masyarakat," baos dane, sinambi maosang wiwilan polih inspirasi kearifan lokal Bali 'Ngrombo' kakawitin saking dane dados Pj. Gubernur Bali.
Salanturnyane, S. M. Mahendra Jaya negesang sajeroning ngupapira harta karun kearifan lokal miwah memajukan Bali, iraga patut masikian, magotong-royong, maprakanti, taler sareng-sareng mautsaha. Semangat "NGROMBO" prasida dados energi positif sane nuldulin iraga mangda bangkit miwah setata nyuksemayang waranugrahan Ida Sanghyang Widhi Wasa.
"Ngangganin pemerintah miwah makasami Krama Bali, titiang ngaturang suksma majeng ring instansi pemerintah, swasta, perbankan, BUMN, miwah BUMD makasami sane wenten ring Bali sane pungkuran puniki sampun sareng maprakanti 'NGROMBO' nglimbakang Bali ," tinas dane.
Parikrama taler kadagingin antuk nyukserahang hadiah majeng ring jayanti makudang-kudang wimbakara sane kalaksanayang sajeroning kolaborasi event ngawit 14-20 Agustus 2024. Inggian punika, Lomba Stand Inovatif: Jayanti I kapolihang Kabupaten Klungkung, Jayanti II Kota Denpasar, Jayanti III Kabupaten Gianyar, Harapan I Kabupaten Badung, Harapan II Kabupaten Jembrana, tur Harapan III Kabupaten Tabanan. Lomba Stand Favorit: Jayanti I kapolihang Kabupaten Bangli, Jayanti II Kabupaten Buleleng, Jayanti III Kabupaten Karangasem. Jayanti I Lomba Desa Pangan Aman Tingkat Provinsi Bali 2024 kapolihang Desa Dawan Kelod - Klungkung. Jayanti I Pangan Aman Berbasis Komunitas kapolihang Pasar Desa Blahkiuh - Badung. Jayanti I Lomba Sekolah dengan PJAS Aman Tingkat Provinsi Bali kapolihang SMPN 3 Bangli - Bangli. Pangargan taler kaaturang majeng ring Balai BPOM Denpasar pinaka Lembaga Pembina Pendampingan Desa, Sekolah, dan Pasar Pangan Aman Terbaik sane ngamolihang prestasi Tingkat Nasional 2024. Hadiah taler kasukserahang majeng ring para jayanti wimbakara tiosan.
Parikrama puniki taler karauhin olih Sekretaris Daerah Provinsi Bali, Dewa Made Indra, Kepala Perwakilan BI Provinsi Bali, Erwin Soeriadimad, jajaran Forkompinda Provinsi Bali, taler para Manggala Perangkat Daerah ring wewidangan Pemprov Bali.(Rls/Btnc)
Komentar