Sekda Dewa Indra Mapangapti FGD Komite IV DPD RI Ngicen Kontribusi Positif majeng ring Bali Mapaiketan antuk Pelaksanaan Anggaran Transfer Daerah
Senin, 26 Agustus 2024
BADUNG, Balitopnews.com - Pinaka lembaga legislatif, DPD RI madue genah strategis ring fungsi legislasi, pengawasan, miwah penganggaran sane kamargiang sajeroning kerangka fungsi representasi. Silih tunggil fungsi DPD RI inggih punika nglaksanayang pengawasan pamargin undang-undang, saha pamargin Anggaran Pendapatan dan Belanja Negara (APBN). Forum Group Discussion (FGD) matetujon migumang data miwah informasi detail parindikan Transfer ka Daerah (TKD) warsa 2024 taler parindikan sane mapaiketan antuk RUU APBN 2025.
Pemerintah Provinsi Bali nyokong makasami angga sane rauh mangda tatas nlatarang data, kondisi, miwah pikobet indik Alokasi Transfer ring Provinsi Bali warsa 2024, taler parindikan sane mapaiketan ring RUU APBN 2025. DPD RI kaaptiang prasida 'menyerap miwah memotret' kondisi riil ring Provinsi Bali midabdabin miwah nginkinang tetimbang majeng ring Rancangan Undang-Undang APBN TA 2025. Punika kasobyahang olih Sekretaris Daerah Provinsi Bali Dewa Made Indra rikala rauh dados narawakya ring Focus Group Discussion Komite IV DPD RI, magenah ring Hotel Le Meridien, Jimbaran - Badung, rahina Soma (26 Agustus 2024)
Salanturnyane, Sekda Dewa Indra maosang Pemerintah Provinsi Bali ngaturang suksma majeng ring pemerintah pusat sane sampun ngawentenang pendanaan ring daerah antuk Anggaran Transfer ka Daerah (TKD), sane yukti nyokong pamargin program ri tepengan katunan kawentenan pendanaan ring daerah. Sakewanten sajeroning pamargi, metu sakancan pikobet ring lapangan, silih tunggilnyane kirang beciknyane proses perencanaan, sane ngawinang sering dados keterlambatan. Tiosan punika taler wenten keterlambatan sajeroning makarya petunjuk teknis olih kementerian soang-soang, miwah sering kawentenang panguwah nomenklatur miwah kodifikasi, sane ngawinang penyesuaian ring tengahin pamargi (pergeseran) sane ngiusin kecepatan realisasi.
Dewa Indra mapangapti, sajeroning FGD puniki, perwakilan kabupaten sane rauh, inggih punika Gianyar, Badung, miwah Karangasem, prasida nyobiahang pikobet sane wenten dadosnyane DPD RI prasida menyerap aspirasi sane metu ring lapangan.
Tiosan punika, Koordinator Tim Kunjungan Kerja Komite IV DPD RI, Made Mangku Pastika, maosang kawentenan perekonomian Bali pasca COVID-19 cenderung positif, antuk tingkat inflasi sane kantun becik. Sakewanten, antuk nincapnyane tren pariwisata, makeh pikobet minakadi kemacetan, perdagangan ilegal olih sakancan WNA ring Bali, taler metunyane pikobet daerah tiosan. Duaning asapunika, pemerintah pusat setata nganggarang TKD ngwantu kawentenan fiskal daerah. Sakewanten, pitaken sane metu napike anggaran punika sampun tepat sasaran, miwah pikobet napi manten sane wenten ring lapangan nyantos prasida kaakomodasi mangda prasida kabaosang sareng DPR RI.
“Titiang mapangapti iraga sareng sami iriki prasida becik-becik maosang indik napi sane metu taler napi pikobetnyane, dadosnyane iraga prasida sareng-sareng nepasin,” baos dane.
Ring galah punika taler rauh Pimpinan Komite IV DPD RI, Amang Syahfrudin sapisanan mungkah acara FGD, taler kalih narawakia tiosan, inggih punika Kepala Kantor Wilayah Ditjen Perbendaharaan Provinsi Bali, Muhamad Mufti Arkan, Akademisi Universitas Udayana, I Nyoman Mahendra Yasa, angga anggota Komisi IV DPD RI miwah uleman tiosan.(Rls/Btnc)
Komentar