Pj. Gubernur Bali S.M. Mahendra Jaya Namprnin Pandangan Umum Fraksi ring Sidang Paripurna kaping 23
Senin, 26 Agustus 2024
DENPASAR,Balitopnews.com - Nampenin pandangan umum limang fraksi indik Raperda Provinsi Bali indik Perubahan APBD Semesta Berencana Provinsi Bali TA 2024 kawacen ring 19 Agustus sane sampun lintang, Pj. Gubernur Bali, S.M. Mahendra Jaya, negesang apresiasin dane antuk pangenjuh miwah sarin pikayun fraksi-fraksi punika. Parindikan puniki kasobyahang ring sidang paripurna kaping 23 warsa 2024 DPRD Bali ring gedung DPRD Bali, Soma (26 Agustus 2024)
Ring ajeng Ketua DPRD Provinsi Bali, Adi Wiryatama, Anggota Dewan, miwah Kepala Perangkat Daerah Provinsi Bali, Pj. Gubernur Bali, S.M. Mahendra Jaya, nlatarang pendapatan daerah sane kasusun ring Raperda Perubahan APBD Semesta Berencana Provinsi Bali Tahun Anggaran 2024 sampun nimbangin potensi realistis miwah pikenoh evaluasi saking realisasi pendapatan warsa 2023, proyeksi realisasi warsa 2024, taler kondisi capaian miwah proyeksi indikator makro ekonomi Bali.
Nganinin indik nincapang target retribusi daerah ring genah puniki, miwah nedunang target ring pos Lain-Lain PAD sane Sah ring sisi tiosan, Mahendra Jaya negesang indik perubahan puniki nganutin ketentuan PP Nomor 35 Tahun 2023 tentang Ketentuan Umum Pajak Daerah dan Retribusi Daerah, sane sadurungnyane sumber-sumber pendapatan sane kaunggahang dados Lain-Lain PAD sane Sah patut kagingsirang dados retribusi daerah.
"Titiang satinut pisan sareng pangenjuh anggota dewan mangda ngoptimalang PAD saking Pungutan Bagi Wisatawan Asing. Duaning asapunika, titiang setata nglaksanayang sakancan utsaha optimalisasi, minakadi sosialisasi miwah edukasi indik kebijakan Pungutan Wisatawan Asing taler kerja sama sareng asosiasi pariwisata miwah Bank Pembangunan Daerah Bali," paweweh dane.
Mahendra Jaya taler satinut sareng pandangan dewan inggian tumbuhnyane ekonomi miwah kemudahan investasi jagi ngawentenang selah ekonomi anyar. Duaning asapunika, iklim investasi sane becik patut kaupapira antuk kemudahan pelayanan perizinan Online Single Submission (OSS), sosialisasi OSS, Bimtek Laporan Kegiatan Penanaman Modal (LKPM), business matchmaking, taler ngwentuk tim terpadu pembinaan miwah pengawasan pembangunan Provinsi Bali mangda prasida nincapang kepatuhan pelaku usaha ring peraturan sane kamargiang.
Tios punika, Mahendra Jaya taler nampenin wicara kemudahan investasi miwah kepastian hukum. Kemudahan investasi patut terukur miwah anut ring sasuduk, mangda prasida mawiguna sajeroning nawengin lingkungan, adat, budaya, miwah tradisi Bali.
Pemerintah Daerah sampun mutusang Perda Nomor 3 Tahun 2024 tentang Pemberian Insentif dan Kemudahan Investasi, sane jagi kaanggen sepat siku-siku sajeroning ngicenin insentif miwah kemudahan investasi madasar antuk asas kepastian hukum, kesetaraan, transparansi, akuntabilitas, efektivitas, miwah efisiensi.
"Titiang satinut ring pangenjuh dewan untuk menggali potensi pendapatan saking perdagangan karbon. Sakewanten, indik puniki durung prasida kalaksanayang santukan kabanda antuk regulasi indik kewenangan pemerintah daerah sajeroning perdagangan karbon kantun ring tahap pamuput ring pemerintah pusat," tinas dane.
Mapaiketan antuk belanja daerah, Pj. Gubernur Bali maosang nincapnyane belanja pegawai sane agengnyane Rp31 miliar langkung sajeroning Raperda tentang Perubahan APBD Tahun Anggaran 2024 kaanggen negepin swadarma Tambahan Penghasilan miwah Tunjangan Profesi Guru Bulan Desember 2023 sane mawit sking DAK Non Fisik, taler kekurangan PPh miwah TPP ASN warsa 2024.
Mahendra Jaya taler nlatarang kaunggahang nyane pinjaman daerah sajeroning Perubahan APBD Tahun 2024 bersifat administratif anggen negepin defisit pembiayaan anggaran akehnyane Rp842,85 miliar langkung. "Ring sajeroning pamargi, titiang jagi mautsaha nepasin defisit punika antuk nincapang pendapatan daerah miwah efisiensi belanja, mangda pinjaman daerah puniki kautsahayang nenten mamargi" tinas dane.
Tiosan uleng ring saking indikator lama tinggal (length of stay) miwah pengeluaran wisatawan (spending money), Pj. Gubernur Bali setata nincapang koordinasi sareng instansi sane mapaiketan mangda nglaksanayang pengawasan ring wisatawan asing sane mamurug uger-uger kunjungan/visa salami ring Bali. Dane taler berkoordinasi sareng instansi sane mapaiketan ngendaliang miwah ngwatesin kendaraan dura Bali sane mamargi ring Bali, mangda meminimalisir kemacetan sane metu ring makudang ruas jalan.
"Antuk pangenjuh anggota dewan sajeroning nepasin kemacetan lalu lintas, pamekasnyane saking miwah nuju daerah tujuan wisata favorit ring Bali, pawangunan miwah pengembangan koridor transportasi massal antuk kereta (Bali Urban Rail and Associated Facilities) wantah silih tunggil panepas strategis majeng ring pikobet puniki," baos Mahendra Jaya.
Pawangunan miwah pengembangan koridor transportasi massal antuk kereta puniki sami prabean nyane mawit saking mitra strategis mangda nenten meratin APBD.
Duaning asapunika, Mahendra Jaya nunas sokongan saking anggota dewan indik pamargin pawangunan puniki mangda pikobet kemacetan lalu lintas ring jalur destinasi wisata sane mabuat prasida katepasin.
Mangda prasida nincapang pengelolaan pariwisata sane nglantur ring Bali, makudang-kudang pidabdab sampun kaambil, minakadi penguatan regulasi miwah kebijakan pemerintah sajeroning perlindungan lahan pertanian, sosialisasi pengelolaan sampah sane bijak, edukasi majeng dunia usaha miwah wisatawan inggian praktik ramah lingkungan, nyokong investasi ring infrastruktur publik sane ngicen manfaat langsung majeng krama lokal, taler memfasilitasi kerja sama pantaraning komunitas lokal, bisnis, miwah asosiasi pariwisata untuk nyokong pengembangan pariwisata sane mamargi ngalantur utawi berkelanjutan.(Rls/Btnc)
Komentar