Pemerintah Provinsi Bali Jagi Nglaksanayang Seleksi Calon Anggota Komisi Informasi Provinsi Bali Masa Jabatan 2025-2029
Kamis, 29 Agustus 2024
DENPASAR, Balitopnews.com - Mapaiketan antuk panguntat masa jabatan Anggota Komisi Informasi Provinsi Bali periode 2021-2025, Pemerintah Provinsi Bali mawali nglaksanayang seleksi Calon Anggota Komisi Informasi Provinsi Bali Masa Jabatan 2025-2029. Seleksi puniki manut amanat Undang-Undang Nomor 14 Tahun 2008 tentang Keterbukaan Informasi Publik, Pasal 30 ayat (2), maosang rekrutmen Calon Anggota Komisi Informasi dilaksanakan secara terbuka, jujur, dan objektif oleh pemerintah. Pinaka pamargin pangawit, sampun kacumponin Tim Seleksi Calon Anggota Komisi Informasi Provinsi Bali Masa Jabatan 2025-2029 antuk Surat Keputusan Gubernur Bali Nomor 567/03-E/HK/2024 tentang Tim Seleksi dan Sekretariat Seleksi Calon Anggota Komisi Informasi Provinsi Bali Masa Jabatan 2025-2029.
Manut Kepala Dinas Komunikasi, Informatika, dan Statistik Provinsi Bali, Ir. Gede Pramana, S.T., M.T., Tim Seleksi Calon Anggota Komisi Informasi Provinsi Bali Masa Jabatan 2025-2029 mawit saking makudang-kudang angga, inggih punika: I Dewa Putu Sunartha, S.E., M.Si., Asisten Administrasi Umum Sekretaris Daerah Provinsi Bali pinaka unsur Pemerintah; Prof. Ir. Ngakan Putu Gede Suardana, M.T., Ph.D., Guru Besar Fakultas Teknik Universitas Udayana pinaka unsur Akademisi; Prof. Dr. Ir. Gede Sedana, M.Sc., M.M.A., Guru Besar Fakultas Pertanian dan Bisnis Universitas Dwijendra Denpasar pinaka unsur Akademisi; Gede Narayana, S.E., M.Si., Komisioner Komisi Informasi Pusat Republik Indonesia pinaka unsur Komisi Informasi Pusat Republik Indonesia; miwah Drs. IGMB Dwikora Putra, Wakil Ketua Bidang Pendidikan Persatuan Wartawan Indonesia Pusat pinaka unsur Masyarakat.
“Tim Seleksi Calon Anggota Komisi Informasi Provinsi Bali puniki jagi makarya kirang langkung salami 6 sasih saha sampun ngamargiang palet pangawit, sakadi rapat pembahasan jadwal taler rapat nentuang tata cara seleksi sane sampun kakawitin saking pangawit Juli,” paweweh Gede Pramana. Palet salanturnyane inggih punika pengumuman seleksi sane jagi kalaksanayang ngawit tanggal 2 September 2024 nyantos 4 September 2024. Pengumuman seleksi prasida kauningin olih kramane saking media cetak, media elektronik, utawi antuk piranti online. Tiosan punika, informasi taler prasida kapolihang ring situs resmi Diskominfos Provinsi Bali (https://diskominfos.baliprov.go.id/) miwah Pemerintah Provinsi Bali (https://www.baliprov.go.id/web/).
Paletan seleksi sampun karincikang, nganutin Peraturan Komisi Informasi Nomor 4 Tahun 2016 tentang Pedoman Pelaksanaan Seleksi dan Penetapan Anggota Komisi Informasi. “Titiang mapangapti proses seleksi Calon Anggota Komisi Informasi puniki ngamolihang partisipasi aktif saking krama nyantos prasida ngamolihang calon-calon andel sane kayun mautsaha nincapang transparansi miwah akuntabilitas informasi publik ring Bali,” paweweh Gede Pramana.
Antuk kawentenan pendaftaran seleksi sane ngawit kabungkah saking tanggal 2 September 2024 nyantos 4 September 2024, calon sane arsa dados ngakses situs resmi Diskominfos Provinsi Bali miwah Pemerintah Provinsi Bali inggian informasi sajangkepnyane.(Rls/Btnc)
Komentar