Sekda Dewa Indra Resmikan Taman INISIATIF BPJS Kesehatan
Kamis, 29 Agustus 2024
DENPASAR,Balitopnews.com - Kacihnayang antuk nglingga tanganin prasasti, Sekretaris Daerah Provinsi Bali, Dewa Made Indra, ngresmiang Taman INISIATIF BPJS Kesehatan antuk program Organization Social Responsibility (OSR) ring Lapangan Niti Mandala Renon, Denpasar, Wraspati (29 Agustus 2024)
Sajeroning sambrama wecanan dane, Sekda Bali nyuksemayang kawentenan sarana olahraga miwah Taman INISIATIF pinaka silih tunggil utsaha sajeroning nincapang momot kesehatan krama. Kawentenan taman puniki taler pinaka wentuk prakanti miwah sinergi pantaraning Pemerintah Provinsi Bali miwah BPJS Kesehatan sajeroning ngaturang kawigunan miwah nincapang kesejahteraan majeng krama.
“Titiang mapangapti antuk kawentenan Taman INISIATIF miwah sarana olahraga puniki prasida mawiguna saha mapuara becik majeng ring krama. Titiang taler mapangapti BPJS Kesehatan sayan konsisten ring program OSR antuk pangingkup sane sayan jimbar ring sarana prasarana umum tiosan sane mawiguna ring kahuripan krama,” paweweh dane.
Sekda Dewa Indra taler mapangapti BPJS Kesehatan setata nginggilang komitmen ring peserta, mawinan transformasi mutu layanan sane dangan, gelis, miwah setara prasida karasayang olih kramane sami.
Tiosan punika, Direktur Utama BPJS Kesehatan, Prof. Ali Ghufron Mukti, sajeroning sambrama wacanannyane maosang Taman INISIATIF wantah silih tunggil utsaha BPJS Kesehatan sajeroning ngaturang layanan kesehatan mamomot sane komprehensif majeng ring krama Bali, taler pinaka utsaha nincapang promosi miwah nambakin pikobet kesehatan. Kawentenan taman puniki taler matetujon nyinahang nilai-nilai INISIATIF (Integritas, Kolaborasi, Pelayanan Prima, dan Inovatif) majeng ring krama.
Parikrama punika taler karauhin olih Kepala Dinas Kesehatan Provinsi Bali, Deputi Direksi Bidang Kantor Pusat BPJS Kesehatan, Deputi Direksi Wilayah XI BPJS Kesehatan, miwah uleman tiosan sane mapaiketan. (Rls/Btnc)
Komentar