Bali and Beyone Travel Fair 2024, Nargetang Rp. 7,61 Triliun
Kamis, 13 Juni 2024
BADUNG,Balitopnews.com - Bali and Beyone Travel Fair (BBTF) 2024 sane kalaksanayang ring Bali International Convention Center Nusa Dua, Wraspati (13 Juni 2024) nargetang transaksi Rp. 7,61 triliun.
BBTF sajeroning parikrama Travel Exchange (Travex) offline kabungkah olih
Pj. Gubernur Bali S. M. Mahendra Jaya.
Sajeroning sambrama wacanannyane, Mahendra Jaya ngaturang suksma antuk pamargin parikrama sane dahat mabuat puniki. "Ngangganin Pemerintah Daerah, titiang ngaturang suksmaning manah antuk kawentenan BBTF kaping 10 sane ngarauhang seller miwah buyer saking makudang-kudang panegara," baosnyane. Dane nguningin, pamargin event sane ageng puniki janten nenten ja dangan.
"Pamargin parikrama sakadi puniki muatang semangat, kerja keras miwah sumber daya akeh," baos dane.
Mahendra Jaya sumeken, parikrama puniki akeh pikenohnyane majeng ring angga pariwisata miwah masyarakat. Duaning asapunika, dane mapangapti mangda BBTF dados event sane pamarginyane ngalantur. "Sakadi sane sampun kawikanin, pariwisata Bali prasida nglimbak ngantos mangkin nenten lempas saking kawentenan sakancan stakeholder pariwisata," baosnyane.
Kantun saking sambrama wacanannyane, dane taler ngelingang mangdane panglimbak sektor pariwisata setata nginggilang utsaha palestarian kearifan lokal sane sampun masikian sareng masyarakat Bali. "Bali patut kajaga. Pangaptin titiang pratisentanane pungkuran uning ring kaasrian jagat miwah budaya nenten wantah saking dokumen sakadi gambar, video utawi cerita," baosnyane.
Panguntat sambrama wacanannyane, Mahendra Jaya magatra indik kawentenan perekonomian Daerah Bali sane sayan becik tur sampun becik pasca pandemi Covid-19. Ring warsa 2023 Bali prasida manggehang pertumbuhan ekonomi agengnyane 5,71 persen, langkungan ring angka pertumbuhan ekonomi sadurung pandemi 5,6 persen. "Bilih-bilih ring triwulan kapertama warsa 2024, pertumbuhan ekonomi sampun nyantos 5,98 persen," baosnyane. Dane mapikayun, sayan beciknyane kawentenan perekonomian Daerah Bali nenten lempas saking sektor pariwisata sane mecikang tur kasokong antuk parikrama sakadi BBTF miwah event tiosan.
Ri sampune mungkah Travex BBTF, Mahendra Jaya kasarengin antuk Deputi Kepala Perwakilan Bank Indonesia Provinsi Bali Gusti Agung Diah Utari miwah Kadispar Bali Tjokorda Bagus Pemayun nglaksanayang saseleh ring makudang-kudang stand pameran. Tiosan nyapa angga stand, dane taler ngicen pakeling indik makudang-kudang parindikan sane mapaiketan antuk utsaha nincapang daya saing minakadi mabuatnyane nguratiang kemasan produk.
Mangda tatas kawikanin, acara BBTF 2024 sane kabungkah rahina Buda (12 Juni 2024) olih Wakil Menteri Luar Negeri RI Pahala Mansury jagi kalaksanayang nyantos sukra (14 Juni 2024). Ketua Asosiasi Agen Perjalanan Wisata Indonesia (Asita) Bali taler pinaka Ketua Panitia Penyelenggara BBTF 2024 I Putu Winastra nlatarang, pameran warsane puniki kasarengin antuk 370 pembeli saking 45 panegara. Buyer punika mawit saking panegara-panegara ring Eropa, Afrika, Australia, miwah Amerika Serikat. Samalihnyane sane ngadol paket pariwisata ring BBTF warsane puniki nyantos 282, mawit saking pelaku usaha saking kutus panegara minakadi: Nepal, Timor Leste, China, Amerika Serikat, Malaysia, Afrika Selatan, Iran miwah Indonesia.
Tiosan punika, wenten 11 provinsi ring Indonesia sane nyarengin madolan, inggih punika: DKI Jakarta, NTB, Jawa Barat, Jawa Tengah, Kepulauan Riau, Yogyakarta, NTT, Bangka Belitung, Sulawesi Selatan, miwah Kalimantan Timur.
Winastra taler ngawewehin, pamilet BBTF nenten wantah perusahaan ring baga perjalanan wisata kemanten, taler mawit saking sakancan usaha sane nganinin indik bidang pertemuan/konferensi (MICE), penyelenggaraan kegiatan (EO), usaha pernikahan (WO) miwah segmentasi korporasi. Tiosan ring tetujon nincapang potensi ekonomi kreatif miwah pariwisata tanah air, parikrama pameran pariwisata puniki taler matetujon nincapang kunjungan wisatawan berkualitas.(Rls/Btnc)
Komentar